ଭୁବନେଶ୍ୱର,୧୬/୧୨: ୨୦୧୪ ମସିହା ଆଜିର ଦିନରେ ନ୍ୟୁଜ୍-୭ ଲୋକଙ୍କ ଟିଭି ଭାବେ ଉଭା ହୋଇଥିଲା । ଲୋକଙ୍କ ବିଶ୍ୱାସ ଜିଣି ଖବର ପରିବେଷଣ କରିଥିଲା । ଇତିମଧ୍ୟରେ ସାଧାରଣ ଲୋକଙ୍କ ସମସ୍ୟାକୁ ଅଧିକାରୀ ଓ ରାଜନେତାଙ୍କ ଦୃଷ୍ଟି ଆକର୍ଷଣ କରିପାରିଛି ଟିମ୍ ନ୍ୟୁଜ୍-୭ । ଅନୁସନ୍ଧାନମୂଳକ ଖବର ପରିବେଷଣ କରି ଦୁର୍ନୀତିର ପର୍ଦ୍ଦାଫାସ୍ କରିଛି । ପ୍ରାକୃତିକ ଦୁର୍ବିପାକ, ଦୁର୍ଘଟଣା ସ୍ଥଳରେ ଆଗୁଆ ପହଞ୍ଚି ଟିକିନିଖି ଖବର ପ୍ରସାରଣ କରିଛି । ଆଉ ଏହି ୧୦ ବର୍ଷର ଯାତ୍ରା ଭିତରେ ଖବର ପରିବେଷଣର ନିରପେକ୍ଷତାକୁ ବଜାୟ ରଖି ଆସିଛି । ନ୍ୟୁଜ୍-୭ର ଦଶମ ସ୍ୱନକ୍ଷତ୍ର ଉତ୍ସବରେ ଯୋଗଦେଇ ସୁମା ରିଅଲ୍ ମିଡିଆର ନିର୍ଦ୍ଦେଶିକା ଶାଶ୍ୱତୀ ଦାସ ଏହା କହିଛନ୍ତି ।
ଚ୍ୟାନେଲ୍ ମୁଖ୍ୟ କାର୍ଯ୍ୟାଳୟରେ ସୋମବାର ନ୍ୟୁଜ୍-୭ର ଦଶମ ସ୍ୱନକ୍ଷତ୍ର ଦିବସ ପାଳନ କରାଯାଇଥିଲା । ଏହି କାର୍ଯ୍ୟକ୍ରମରେ ଶାଶ୍ୱତୀ ଦାସ ଯୋଗଦେଇ କହିଥିଲେ, ନ୍ୟୁଜ୍-୭ ଆଗକୁ ବଢ଼ିବା ସହ ସମସ୍ତଙ୍କୁ ସାଙ୍ଗରେ ନେଇ ଦର୍ଶକଙ୍କ ଆସ୍ଥା ଭାଜନ ହୋଇଛି । ସଫଳତା ପଥରେ ଅଗ୍ରସର ହେବା ସହ ସମାଜର ଦୁର୍ବଳ ଶ୍ରେଣୀର ଲୋକଙ୍କ ସପକ୍ଷରେ ସ୍ୱର ଉତ୍ତୋଳନ ପାଇଁ ନିର୍ଭୀକ ଭାବେ କାର୍ଯ୍ୟ କରିବାକୁ ଶ୍ରୀମତୀ ଦାସ ପରାମର୍ଶ ଦେଇଥିଲେ ।
ନ୍ୟୁଜ୍-୭ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସୁନୀଲ ଦାସ କହିଥିଲେ ଯେ ଏହି ଚ୍ୟାନେଲ୍ ୧୦ ବର୍ଷ ଭିତରେ ଲୋକଙ୍କ ଚ୍ୟାନେଲ ଭାବେ ନିଜକୁ ପ୍ରତିପାଦିତ କରିପାରିଛି । ଆଗକୁ ମଧ୍ୟ ଏହି ଧାରା ଜାରି ରହିବ । ଖବର ସଂଗ୍ରହ ଠାରୁ ଆରମ୍ଭ କରି ଟିଭି ପରଦାରେ ଏହାକୁ ଉପସ୍ଥାପନା କରିବାରେ ସାମୂହିକ ଉଦ୍ୟମ ବଳବତ୍ତର ରଖିବା ନେଇ ସେ ପରାମର୍ଶ ଦେଇଥିଲେ ।
‘ପ୍ରମେୟ’ ଓ ନ୍ୟୁଜ୍-୭ର ଗ୍ରୁପ ଏଡିଟର ଗୋପାଳକୃଷ୍ଣ ମହାପାତ୍ର କହିଥିଲେ ଯେ ଏହି ୧୦ ବର୍ଷରେ ଆମେ ଅନେକ ମାଇଲ ଖୁଣ୍ଟ ଅତିକ୍ରମ କରିଛୁ । ଏକ ଛୋଟ ସମୟ ମଧ୍ୟରେ ରାଜ୍ୟର ପ୍ରତିଟି ଲୋକଙ୍କ ମନରେ ନିଜର ଛାପ ରଖିବା କିଛି ଛୋଟିଆ କଥା ନୁହେଁ । ତେଣୁ ଏହି ଧାରାକୁ ବଜାୟ ରଖିବା ଲାଗି ଆମେ କେଉଁଠି ପହଞ୍ଚିଛେ ସେନେଇ ଆତ୍ମସମୀକ୍ଷା କରିବା ଉଚିତ । ନିଜକୁ ପ୍ରସ୍ତୁତ କରି ଆଗକୁ ବଢ଼ିବାର ଯୋଜନା କରିବା ବୋଲି ଶ୍ରୀ ମହାପାତ୍ର କହିଥିଲେ ।
ଗ୍ରୁପ ଡାଇରେକ୍ଟର (ସେଲ୍ସ ଆଣ୍ଡ ମାର୍କେଟିଂ) ହିମାଂଶୁ ହୋତା କହିଥିଲେ ଯେ ସମସ୍ତେ ଏକ ହୋଇ ନ୍ୟୁଜ୍-୭କୁ ଆଗକୁ ନେବା । ବିଶେଷ କରି ବିଭାଗୀୟ ସମନ୍ୱୟକୁ ଅଧିକ ସଶକ୍ତ କରିବା ଉପରେ ସେ ଗୁରୁତ୍ୱାରୋପ କରିଥିଲେ । ଏହି ଅବସରରେ ନ୍ୟୁଜ୍-୭ର କାର୍ଯ୍ୟନିର୍ବାହୀ ସମ୍ପାଦକ ଦେବନାରାୟଣ ସେଠୀ ୧୦ ବର୍ଷର ଅଭିଜ୍ଞତା ବଖାଣିଥିଲେ । କିଭଳି ନାନା ପ୍ରତିବନ୍ଧକକୁ ସାମ୍ନା କରି ଚ୍ୟାନେଲ୍ ଖବରରେ ନିରପେକ୍ଷତା ଏବଂ ସ୍ପଷ୍ଟତା ଜାରି ରଖିଛି ସେ ବର୍ଣ୍ଣନା କରିଥିଲେ ।
