ପ୍ରୟାଗରାଜ, ୧୬/୧୨ (ରାମଜୀବନ ଗୋଚ୍ଛାୟତ): ୧୨ ବର୍ଷ ପରେ ଚଳିତବର୍ଷ ପ୍ରୟାଗରାଜରେ ଆୟୋଜନ ହେଉଛି ମହାକୁମ୍ଭ । ମହାକୁମ୍ଭରେ ବୁଡ଼ ପକାଇବା କୋଟି ପୁଣ୍ୟ ସହ ସମାନ । ତେଣୁ ସାରା ଦେଶରୁ ୪୦ କୋଟି ଲୋକ ସମାଗମ ହେବାକୁ ଉତ୍ତରପ୍ରଦେଶ ସରକାର ପ୍ରସ୍ତୁତି କରୁଥିବା ବେଳେ ଓଡ଼ିଶାରୁ ମଧ୍ୟ ଲକ୍ଷ ଲକ୍ଷ ଶ୍ରଦ୍ଧାଳୁ ଯିବାକୁ ଆଗ୍ରହ ପ୍ରକାଶ କରିଛନ୍ତି । ରବିବାର ସୁଦ୍ଧା ଓଡ଼ିଶାରୁ ମହାକୁମ୍ଭ ଯିବାକୁ ଦେଢ଼ ଲକ୍ଷରୁ ଅଧିକ ରେଳଯାତ୍ରୀ ସଂରକ୍ଷଣ ଟିକଟ ବୁକିଂ ଆବେଦନ କରିଥିବା ସୂଚନା ମିଳିଛି । ଏହାକୁ ଦୃଷ୍ଟିରେ ରଖି ରେଳ ମନ୍ତ୍ରଣାଳୟ ପକ୍ଷରୁ ଲଗାତର ୨ ମାସ ଓଡ଼ିଶାରୁ ୫ ସ୍ୱତନ୍ତ୍ର କୁମ୍ଭ ସ୍ପେଶାଲ ସାପ୍ତାହିକ ଟ୍ରେନ୍ ଚଳାଇବାକୁ ସ୍ଥିର ହୋଇଛି । ପ୍ରତି ଟ୍ରେନ୍ରେ ୧୭୫୦ରୁ ୧୮୦୦ ଯାତ୍ରୀ ଯାଇପାରିବେ । ଏହା ବ୍ୟତୀତ ଆମ ରାଜ୍ୟରୁ ଉତ୍ତରପ୍ରଦେଶ ଅଭିମୁଖେ ଯାଉଥିବା ନିୟମିତ ଟ୍ରେନରେ ବି ବୁକିଂ ବଢ଼ିଛି । ଏତେ ସଂଖ୍ୟକ ଯାତ୍ରୀ ଆସୁଥିବାରୁ ପ୍ରୟାଗରାଜରେ ଓଡ଼ିଆଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି ।
ପ୍ରୟାଗରାଜ ଜଙ୍କସନ୍ରେ ଯାତ୍ରୀମାନଙ୍କ ପାଇଁ ଓଡ଼ିଆ ସମେତ ୧୫ଟି ଭାଷାରେ ଘୋଷଣା କରିବାକୁ ବ୍ୟବସ୍ଥା ହୋଇଛି । ଫଳରେ ମହାକୁମ୍ଭକୁ ଯାଉଥିବା ଓଡ଼ିଆ ଯାତ୍ରୀଙ୍କୁ ଷ୍ଟେସନରେ ବିଶେଷ ଅସୁବିଧା ହେବନାହିଁ । ଓଡ଼ିଆ ଯାତ୍ରୀଙ୍କ ପାଇଁ ସ୍ୱତନ୍ତ୍ର ବିଶ୍ରାମାଗାର ରହିବ । ସେଠାରେ ସ୍ୱତନ୍ତ୍ର ଓଡ଼ିଆ ଅଧିକାରୀ ଦାୟିତ୍ୱରେ ରହିବେ । ଉତ୍ତରପ୍ରଦେଶର ଯେଉଁ ଅଧିକାରୀମାନେ ଭଲ ଭାବେ ଓଡ଼ିଆ ଜାଣିଛନ୍ତି ଏବଂ ପୂର୍ବ ବର୍ଷମାନଙ୍କରେ କୁମ୍ଭମେଳାରେ ଓଡ଼ିଶା ଦାୟିତ୍ୱରେ ରହିଛନ୍ତି, ସେମାନଙ୍କୁ ଏହି ଦାୟିତ୍ୱ ଦିଆଯିବ ବୋଲି ଉତ୍ତର ମଧ୍ୟ ରେଳପଥ (ଏନ୍ସିଆର୍)ର ମୁଖ୍ୟ ଲୋକସମ୍ପର୍କ ଅଧିକାରୀ ଶଶୀକାନ୍ତ ତ୍ରିପାଠୀ ସୂଚନା ଦେଇଛନ୍ତି ।
ପ୍ରୟାଗରାଜ ଜଙ୍କସନରେ ଲାଗିଥିବା କିଓସ୍କଗୁଡ଼ିକରେ ମାତ୍ର ୩ଟି ଭାଷାରେ ସୂଚନା ମିଳୁଛି । ଖୁସିର ବିଷୟ ଯେ ଏହି ଭାଷା ଭିତରେ ଓଡ଼ିଆ ରହିଛି । ଏହି କିଓସ୍କଗୁଡ଼ିକରେ ଷ୍ଟେସନରେ ଯାତ୍ରୀମାନଙ୍କୁ ପ୍ରୟାଗରାଜର ନିକଟବର୍ତ୍ତୀ ଧାର୍ମିକ ସ୍ଥଳୀ, ପର୍ଯ୍ୟଟନ ସ୍ଥଳୀ ଓ ଐତିହ୍ୟ ସ୍ଥଳୀ ବାବଦରେ ସୂଚନା ମିଳିପାରିବ । ପର୍ଯ୍ୟଟକଙ୍କୁ ସାହାଯ୍ୟ କରିବାକୁ ବିଭିନ୍ନ ଗାଇଡମାନଙ୍କ ନମ୍ବର ମଧ୍ୟ ମିଳିପାରିବ ।
ବାରଣାସୀ, ପ୍ରୟାଗରାଜକୁ ଦୈନିକ ବିମାନସେବାରେ ଚାହିଦା ବଢ଼ିଛି
କେବଳ ଟ୍ରେନ୍ ନୁହେଁ, ବାରଣାସୀ ଓ ପ୍ରୟାଗରାଜକୁ ଦୈନିକ ବିମାନସେବାରେ ଚାହିଦା ବଢ଼ିଛି । ଏବେଠୁ ପ୍ରତିଦିନ ୬୦ରୁ ୭୦ ପ୍ରତିଶତ ସିଟ୍ ପୂରଣ ହେଉଛି । ମହାକୁମ୍ଭ ସମୟରେ ସବୁ ସିଟ୍ ପୂରଣ ରହିବ ବୋଲି ବିମାନବନ୍ଦର କର୍ତ୍ତୃପକ୍ଷ ଆକଳନ କରିଛନ୍ତି । ଏହା ବ୍ୟତୀତ ବହୁ ଯାତ୍ରୀ ଦିଲ୍ଲୀରୁ ବାରଣାସୀ କିମ୍ବା ଦିଲ୍ଲୀରୁ ପ୍ରୟାଗରାଜ, କୋଲକତାରୁ ବାରଣାସୀ, କୋଲକତାରୁ ପ୍ରୟାଗରାଜ ହୋଇ ପୁଣି ସଡ଼କ ପଥ କିମ୍ବା ଟ୍ରେନରେ ପ୍ରୟାଗରାଜ ଯାଉଥିବା ସୂଚନା ମିଳିଛି ।
ମହାକୁମ୍ଭ ସମୟରେ ଦେଶରେ ଚାଲିବ ୧୩ ହଜାର ଟ୍ରେନ
ଏବେ ପ୍ରୟାଗରାଜକୁ ଦେଶର ବିଭିନ୍ନ ରାଜ୍ୟରୁ ପ୍ରତିଦିନ ୧୦ ହଜାର ନିୟମିତ ଟ୍ରେନ ଚାଲୁଛି । ମହାକୁମ୍ଭ ସମୟରେ ଅଧିକ ଯାତ୍ରୀ ଭିଡ଼କୁ ଏଡ଼ାଇବା ପାଇଁ ରେଳ ମନ୍ତ୍ରଣାଳୟ ବିଶେଷ ପ୍ରସ୍ତୁତି କରିଛି । ସାରା ଦେଶରେ ଚାଲିବ ମହାକୁମ୍ଭ ସ୍ପେଶାଲ ୩ ହଜାର ଟ୍ରେନ୍ । ଫଳରେ ଉଭୟ ଟ୍ରେନ ସଂଖ୍ୟା ମିଶାଇଲେ ପାଖାପାଖି ୧୩ ହଜାର ଟ୍ରେନ ପ୍ରୟାଗରାଜକୁ ଚାଲିବ ।
ସୁରକ୍ଷା ନିୟନ୍ତ୍ରଣ ପାଇଁ ସ୍ୱତନ୍ତ୍ର କଣ୍ଟ୍ରୋଲ ଟାୱାର
କୁମ୍ଭମେଳା ସମୟରେ ସୁରକ୍ଷା ବ୍ୟବସ୍ଥାକୁ ଗୁରୁତ୍ୱ ଦେଇଛନ୍ତି ରେଳ ମନ୍ତ୍ରଣାଳୟ ଓ ସ୍ଥାନୀୟ ପ୍ରଶାସନ । ତେଣୁ ପ୍ରୟାଗରାଜ ଜଙ୍କସନ୍ରେ ପ୍ରସ୍ତୁତ ହୋଇଛି ସ୍ୱତନ୍ତ୍ର କଣ୍ଟ୍ରୋଲ ଟାୱାର । ଏଠି ଲାଗିଛି ୧୩୦୦ରୁ ଅଧିକ ସିସି କ୍ୟାମେରା । ସିଆର୍ପିଏଫ ଓ ଜିଆରପିର ୧୨ରୁ ଅଧିକାରୀ ୨୪ ଘଣ୍ଟା ଏହି କଣ୍ଟ୍ରୋଲ ରୁମକୁ ଜଗିବେ । ୯ଟି ଯାକ ଷ୍ଟେସନକୁ ଏଠାରୁ ନିୟନ୍ତ୍ରଣ କରାଯିବ । ଏଠାରେ ଶହେ ମୁହଁ ଚିହ୍ନଟ (ଲବମର କ୍ସରମକ୍ଟଶଦ୍ଭସଗ୍ଧସକ୍ଟଦ୍ଭ) କ୍ୟାମେରା ରହିବ ।
କଲର୍ କୋଡିଂ, ଓଭରବ୍ରିଜ୍ରେ ସ୍ୱତନ୍ତ୍ର ବ୍ୟବସ୍ଥା
ରାମ ମନ୍ଦିର ପ୍ରତିଷ୍ଠା ସମୟରେ ଅଯୋଧ୍ୟା ଷ୍ଟେସନରେ ଆରମ୍ଭ ହୋଇଥିବା ନୂଆ ବ୍ୟବସ୍ଥା କଲର କୋଡିଂ ପ୍ରୟାଗରାଜ ଜଙ୍କସନ୍ରେ ମଧ୍ୟ କରାଯିବ । ନିର୍ଦ୍ଦିଷ୍ଟ ରଙ୍ଗର ଟିକଟ ଥିବା ଯାତ୍ରୀ କେବଳ ସେହି ରଙ୍ଗର ବିଶ୍ରାମଗାରରେ ବିଶ୍ରାମ ନେଇ ପାରିବେ । ସେହି ରଙ୍ଗର ଫୁଟ୍ ଓଭରବ୍ରିଜ ଓ ଲାଇନରେ ଯିବେ । ପ୍ରୟାଗରାଜ ଜଙ୍କସନ୍ରେ ପ୍ରସ୍ତୁତ ହୋଇଛି ସ୍ୱତନ୍ତ୍ର ବିଶ୍ରାମ ସ୍ଥଳ । ଏକ ସାଙ୍ଗରେ ଦେଢ଼ ଲକ୍ଷ ଲୋକ ଅପେକ୍ଷା ପାଇଁ ହୋଇଛି ବ୍ୟବସ୍ଥା । ଏହା ସହିତ ମହାକୁମ୍ଭ ସମୟରେ ଜାରି ହୋଇଛି ମାଗଣା ହେଲ୍ପ ଲାଇନ୍ ନମ୍ୱର ୧୮୦୦୪୧୯୯୧୩୯ ।
