ଭୁବନେଶ୍ୱର,୨୪/୦୩: ସୋମବାର ଓଡ଼ିଶା ଆସୁଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ। ମହାମହିମଙ୍କ ଗସ୍ତ ପାଇଁ କମିଶନରେଟ ପୁଲିସ ପକ୍ଷରୁ ବିମାନବନ୍ଦରରୁ ରାଜଭବନ ପର୍ଯ୍ୟନ୍ତ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ରାଜଭବନ ସହ ଭୁବନେଶ୍ୱର ବିମାନବନ୍ଦରକୁ ହାଇଆଲର୍ଟ ଜାରି ହୋଇଛି । ରାଷ୍ଟ୍ରପତିଙ୍କ ଗସ୍ତ ପାଇଁ ମୋଟ ୧୨ ପ୍ଲାଟୁନ୍ ପୁଲିସ ଫୋର୍ସ ମୁତୟନ ହୋଇଛନ୍ତି ।
ଡିସିପି ଜଗମୋହନ ମୀନା କହିଛନ୍ତି, ସୋମବାର ରାଷ୍ଟ୍ରପତି ଛତିଶଗଡ଼ରୁ ବାହାରିବା ପରେ ଅପରାହ୍ନ ସାଢେ ୧ଟାରେ ଭୁବନେଶ୍ୱର ବିମାନବନ୍ଦରରେ ପହଞ୍ଚିବେ । ସେଠାରୁ ସ୍ୱତନ୍ତ୍ର ହେଲିକପ୍ଟର ଯୋଗେ ନୟାଗଡ଼ ଜିଲ୍ଲା କଣ୍ଟିଲୋ ନୀଳମାଧବ ମନ୍ଦିର ଗସ୍ତ କରିବେ । ସେଠାରେ ପୂଜାର୍ଚ୍ଚନା କରିବା ପରେ ଅନ୍ୟ କାର୍ଯ୍ୟକ୍ରମରେ ଯୋଗ ଦେବେ । ରାଷ୍ଟ୍ରପତି ଜଗନ୍ନାଥ ସଂସ୍କୃତିର ମୂଳପୀଠ ଭାପୁର ବ୍ଲକ ଅଧୀନ କାଳିଆପଲ୍ଲୀ ଗ୍ରାମ ମଧ୍ୟରେ ଶବର ରାଜା ବିଶ୍ୱାବସୁ ଓ ଲଲିତାଙ୍କ ଜନ୍ମମାଟି ପରିଦର୍ଶନ କରିବାର କାର୍ଯ୍ୟକ୍ରମ ରହିଛି । ସେ ସନ୍ଧ୍ୟା ୫ଟା ୪୫ ମିନିଟ୍ରେ ଭୁବନେଶ୍ୱରକୁ ଫେରିବେ । ଏଥିପାଇଁ ସନ୍ଧ୍ୟା ୫ଟା ୨୫ ମିନିଟ୍ରୁ ସନ୍ଧ୍ୟା ୬ଟା ୫ ମିନିଟ୍ ଯାଏଁ ବିମାନବନ୍ଦରରୁ ରାଜଭବନ ରାସ୍ତାକୁ ବନ୍ଦ ରଖାଯିବ । ରାଷ୍ଟ୍ରପତି ରାଜଭବନରେ ରାତ୍ରିଯାପନ କରିବେ ।
ଆସନ୍ତା ୨୫ ତାରିଖ ସକାଳେ ୯ଟା ୧୦ ମିନିଟ୍ରେ ସେ ରାଜଭବନରୁ ବିମାନବନ୍ଦର ଅଭିମୁଖେ ଯିବେ । ରାଷ୍ଟ୍ରପତିଙ୍କ ଗସ୍ତ ପାଇଁ ୩ ଜଣ ଡିସିପି, ୩ଜଣ ଅତିରିକ୍ତ ଡିସିପି, ୧୪ ଏସିପି, ୨୮ ଇନ୍ସପେକ୍ଟର, ୧୧୦ ଏସ୍ଆଇ/ଏଏସ୍ଆଇ ମୁତୟନ କରାଯାଇଛି । ବିମାନବନ୍ଦର ଓ ରାଜଭବନକୁ ନୋ ଫ୍ଲାଇଂ ଜୋନ୍ ଘୋଷଣା କରାଯାଇଛି । ରାଷ୍ଟ୍ରପତିଙ୍କ କାରକେଡ୍ ଯିବା ବେଳେ ଏୟାରପୋର୍ଟ ଟ୍ରାଫିକ୍, କ୍ୟାପିଟାଲ ହସ୍ପିଟାଲ ଛକ, ଏଜି ଛକ, ରାଜଭବନ ଗୋଲେଇ ରାସ୍ତାରେ ରୁଟ୍ ଲାଇନିଂକୁ ଗୁରୁତ୍ୱ ଦିଆଯାଉଛି ।
