ରାଉରକେଲା, ୨୩/୧୦ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆସନ୍ତା ନଭେମ୍ବର ୧୫ରେ ରାଉରକେଲା ଗସ୍ତରେ ଆସିବେ । ସ୍ଥାନୀୟ ବିର୍ସା ମୁଣ୍ଡା ଷ୍ଟାଡିୟମ୍ରେ ଆୟୋଜିତ ହେବାକୁ ଥିବା ଜନଜାତୀୟ ଗୌରବ ଦିବସ ପାଳନ କାର୍ଯ୍ୟକ୍ରମରେ ସେ ଯୋଗଦେବେ । ଏକାଧିକ ପ୍ରକଳ୍ପର ଶିଳାନ୍ୟାସ ଓ ଉଦ୍ଘାଟନ କରିବେ । ଏ ଗସ୍ତ ସମୟରେ ପ୍ରଧାନମନ୍ତ୍ରୀ ଓଡ଼ିଆ ଅସ୍ମିତା କେନ୍ଦ୍ରର ଶିଳାନ୍ୟାସ କରିବେ । ଏହାଛଡ଼ା ସ୍ୱାଧୀନତା ସଂଗ୍ରାମୀ ବିର୍ସା ମୁଣ୍ଡା ସ୍ମାରକୀର ଭିତ୍ତିପ୍ରସ୍ତର କରିବେ । ବିର୍ସାଙ୍କର ୧୫୦ ଫୁଟ୍ ଉଚ୍ଚତାର ପ୍ରତିମୂର୍ତ୍ତିର ଶିଳାନ୍ୟାସ ମଧ୍ୟ କରିବେ ମୋଦି । କେନ୍ଦ୍ରମନ୍ତ୍ରୀ ଜୁଏଲ ଓରାମ୍ ଏହି ସୂଚନା ଦେଇଛନ୍ତି ।
ନଭେମ୍ବର ୧୫ ତାରିଖ ପୂର୍ବାହ୍ନ ୧୧ଟାରେ ପ୍ରଧାନମନ୍ତ୍ରୀ ସ୍ୱତନ୍ତ୍ର ବିମାନ ଯୋଗେ ଝାରସୁଗୁଡ଼ା ବିମାନ ବନ୍ଦରରେ ପହଞ୍ଚିବେ । ସେଠାରୁ ୧୧ଟା ୧୦ରେ ହେଲିକପ୍ଟରରେ ରାଉରକେଲା ଅଭିମୁଖେ ଯାଇ ସାଢ଼େ ୧୧ଟାରେ ବିର୍ସା ମୁଣ୍ଡା ଷ୍ଟାଡିୟମ୍ରେ ପହଞ୍ଚିବେ । ପ୍ରଧାନମନ୍ତ୍ରୀ ଶିଳାନ୍ୟାସ ସହ ‘ସହିଦ ମାଧୋ ସିଂ ହାତ ଖର୍ଚ୍ଚ ବୃତ୍ତି’ର ଶୁଭାରମ୍ଭ କରିବେ । ଏଥିରେ ଅନ୍ତର୍ଭୁକ୍ତ ୧ ଲକ୍ଷ ଆଦିବାସୀ ଛାତ୍ରଛାତ୍ରୀଙ୍କୁ ବୃତ୍ତି ବାବଦ ଅର୍ଥ ପ୍ରଦାନ କରିବେ । ଜଙ୍ଗଲ ଅଧିକାର ଅଧିନିୟମ (ଏଫ୍ଆର୍ଏ) ପୋର୍ଟାଲ୍ର ଶୁଭାରମ୍ଭ କରିବେ । ୪୫୦ ପ୍ରାଥମିକ ବିଦ୍ୟାଳୟ ଛାତ୍ରାବାସ, ପ୍ରସ୍ତାବିତ, ଜନଜାତି ଐତିହ୍ୟ ଏବଂ ସ୍ୱାଭିମାନ ଭବନ, ଜନଜାତି ଭାଷା ଓ ସଂସ୍କୃତି ପ୍ରତିଷ୍ଠାନ, ରାଜ୍ୟ ଆଦିବାସୀ ସଂଗ୍ରହାଳୟର ସୋଭେନିୟର ସପ୍ର ଶିଳାନ୍ୟାସ କରିବେ । ଜାତୀୟ ସିକିଲ୍ସେଲ ନିରାକରଣ ମିଶନ ଆନୁକୂଲ୍ୟରେ କଟକ ଏସ୍ସିବି, ସମ୍ବଲପୁର ଭିମ୍ସାର ଓ ବାରିପଦାସ୍ଥିତ ପିଆର୍ଏମ୍ ମେଡିକାଲ କଲେଜରେ ଉତ୍କର୍ଷ କେନ୍ଦ୍ରକୁ ଜନସାଧାରଣଙ୍କ ଉଦ୍ଦେଶ୍ୟରେ ଉତ୍ସର୍ଗ କରିବେ ପ୍ରଧାନମନ୍ତ୍ରୀ ।
ବିର୍ସା ମୁଣ୍ଡା ସ୍ମାରକୀର କୋଠା ଡିଜାଇନ୍ ଏବଂ ବିର୍ସାଙ୍କ ଜୀବନୀ ସମ୍ବଳିତ ଏକ ପ୍ରାମାଣିକ ଚଳଚ୍ଚିତ୍ର ପ୍ରଦର୍ଶିତ ହେବ । ଏହି ଅବସରରେ ୫ଜଣ ପ୍ରତିଭାବାନ ଆଦିବାସୀଙ୍କୁ ମଧ୍ୟ ସମ୍ବର୍ଦ୍ଧିତ କରିବେ ମୋଦି । ଶେଷରେ ସାଧାରଣ ଜନତାଙ୍କୁ ପ୍ରଧାନମନ୍ତ୍ରୀ ସମ୍ବୋଧିତ କରିବେ । ଦିନ ୧୨ଟା ୩୩ ସୁଦ୍ଧା କାର୍ଯ୍ୟକ୍ରମ ସାରି ପ୍ରଧାନମନ୍ତ୍ରୀ ଦିଲ୍ଲୀ ଫେରିଯିବାର କାର୍ଯ୍ୟକ୍ରମ ସ୍ଥିର ହୋଇଛି । କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀଙ୍କ ସହ କେନ୍ଦ୍ରମନ୍ତ୍ରୀ ମଧ୍ୟ ସାମିଲ ହେବେ । ରାଜ୍ୟରେ ବିଜେପି କ୍ଷମତାକୁ ଆସିବା ପରେ ଏହା ହେବ ମୋଦିଙ୍କ ତୃତୀୟ ଓଡ଼ିଶା ଗସ୍ତ ।
