ଆମ ଦେଶର ପାଖାପାଖି ୪୫% ପଣ୍ୟ କାରବାର ହୁଏ ୟୁରୋପୀୟ ଦେଶସମୂହ ଆମେରିକା, ଅଷ୍ଟ୍ରେଲିଆ, ଜାପାନ, ବ୍ରିଟେନ, ସାଉଥ କୋରିଆ, ନ୍ୟୁଜିଲାଣ୍ଡ ଆଦି ଦେଶ ସହିତ, ଚୀନ ଓ ରୁଷିଆ ସହିତ ମାତ୍ର ୪.୫% ।
ଲାଗୁଛି ଆମେ ଭାରତ ଓ ରୁଷିଆକୁ ହଜାଇ ଦେଇଛୁ ଗଭୀରତମ, ଅନ୍ଧକାରମୟ ଚୀନ ଭିତରେ, ସେମାନେ ମିଶି ଏକ ସୁଦୀର୍ଘ ସମୃଦ୍ଧ ଭବିଷ୍ୟତ ନିର୍ମାଣ କରନ୍ତୁ । ଏହା ଥିଲା ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କର କ୍ରିପଟିକ୍ ପୋଷ୍ଟ ବା ରହସ୍ୟମୟ ବାକ୍ୟ । ଏଭଳି ବାକ୍ୟ ଉଚ୍ଚାରଣ କରି ସେ ଭାରତ, ରୁଷିଆ ଓ ଚୀନକୁ ପରସ୍ପର ସହଯୋଗୀ ରାଷ୍ଟ୍ର ଭାବେ କେବଳ ଉଲ୍ଲେଖ କରିନାହାଁନ୍ତି ବରଂ ନିଜକୁ ଚୀନର ନେତୃତ୍ୱ ପାଖରେ ସମର୍ପଣ କରିଦେଇଛନ୍ତି, ଯାହାକି ଆମେରିକାର ଭାବନା ଓ ନୀତିବିରୁଦ୍ଧ । ଏହା ସମଗ୍ର ବିଶ୍ୱକୁ ଏକ ସକ୍ୱେଭ ପ୍ରେରଣ ମାତ୍ର କରିନାହିଁ, ବରଂ ସେ ନିଜ ରାଷ୍ଟ୍ରର ଷ୍ଟ୍ରାଟେଜିକ କମ୍ୟୁନିଟି ବା କୂଟନୈତିକ ନୀତି ନିର୍ଦ୍ଧାରଣ କରୁଥିବା ଗୋଷ୍ଠୀଙ୍କୁ ସେଇ ସକ୍ୱେଭ ଭିତରକୁ ଟାଣି ନେଇଛନ୍ତି । ଏହି ୨୦ଟି ଶବ୍ଦରୁ କମ୍ ବାକ୍ୟ ପୋଷ୍ଟ କରି ସେ ନିଜର ମେକ୍ ଆମେରିକା ଗ୍ରେଟ୍ ଏଗେନ ବା ‘ମାଗା’ ଭିଜିଅନକୁ ଅସ୍ପଷ୍ଟ କରିଦେଇଛନ୍ତି, ଯାହା ତାଙ୍କ ରିପବ୍ଲିକାନ ଦଳର ବରିଷ୍ଠ କର୍ମୀମାନଙ୍କୁ ଆଶ୍ଚର୍ଯ୍ୟଚକିତ କରିଦେଇଛି । ଆମେରିକା ସର୍ବଦା ଭାବି ଆସୁଥିଲା ଯେ ଭାରତ, ରୁଷିଆ ଆମର ସମର୍ଥକ ଓ ସେମାନଙ୍କୁ ଆମେ ହଜେଇଦବାକୁ ଚାହୁଁନା, ବରଂ ଚୀନ ଆମର ଶତ୍ରୁ ସର୍ବଦା ବାଣିଜ୍ୟ ଯୁଦ୍ଧ ଓ ଏବେ ବିରଳ ମୃତ୍ତିକା ଚୁମ୍ବକକୁ ନିଜ ଯୁଦ୍ଧର ଆୟୁଧ ଭାବେ ବ୍ୟବହାର କରିବାକୁ ଧମକ ଦେଇଛି ।
ଟ୍ରମ୍ପ ବିଚଳିତ ହୋଇପଡ଼ିଥିଲେ, ଯେବେ ସେ ଭାବିଥିଲେ ପ୍ରଧାନମନ୍ତ୍ରୀ ମୋଦି କାନାଡ଼ାରୁ ଜି-୭ ସମ୍ମିଳନୀରେ ଅଂଶଗ୍ରହଣ କରି ଫେରିବା ବେଳେ ଆମେରିକାରେ ପହଞ୍ଚି ତାଙ୍କୁ ସୌଜନ୍ୟମୂଳକ ସାକ୍ଷାତ କରି ଭାରତକୁ ଫେରିବେ । ମାତ୍ର ମୋଦି ତାହା କଲେନାହିଁ । କାରଣ ପାକିସ୍ତାନର ଆର୍ମି ଚିଫ୍ ଅସୀମ ମୁନିରଙ୍କୁ ନିମନ୍ତ୍ରଣ କରି ତାଙ୍କ ସହିତ ଟ୍ରମ୍ପ ଡିନର କରିବା ପରେ ସେ ସେଠାକୁ ଯିବାକୁ ଉଚିତ ମଣିଲେ ନାହିଁ ।
ତା’ ସହିତ ‘ଅପରେସନ ସିନ୍ଦୂର’କୁ ବନ୍ଦ କରିବାର ବାହାବା ଯୋଗାଡ଼ କରିବାକୁ ଚାହୁଁଥିବା ଟ୍ରମ୍ପଙ୍କ ମଧ୍ୟସ୍ଥତାକୁ ମୋଦି ସମର୍ଥନ ନକରି ବିରୋଧ କରିବା ତାଙ୍କୁ ମଧ୍ୟ ବେକାଇଦାରେ ପକାଇ ଦେଇଛି । ଖାଲି ସେତିକି ନୁହେଁ, ଆମେରିକା ପାକିସ୍ତାନକୁ ପ୍ରଦାନ କରିଥିବା ଅସ୍ତ୍ର, ଜାହାଜ ସବୁ ଭାରତର ଆକ୍ରମଣ ପାଖରେ ହାର ମାନିବାକୁ ସେ ଅପସନ୍ଦ କରିଛନ୍ତି । ଆହୁରି କିଛି ଅଧିକ ହୁଏତ ଘଟିଛି ଯାହା ଏଯାବତ୍ ଜଣାନାହିଁ ଓ ତାହା ତାକୁ ନୈରାଶ୍ୟ ଭିତରକୁ ଠେଲିଦେଇ ଟାରିଫ ବୃଦ୍ଧି କରାଇ ଦେଇଛି । ଆମେରିକାକୁ ହଜାଇଦବାକୁ ମୋଦି ଚାହାଁନ୍ତି ନାହିଁ ଓ ଟାରିଫକୁ ନେଇ କଥାବାର୍ତ୍ତା ବନ୍ଦ ହୋଇଯାଇନାହିଁ ବୋଲି ବିଦେଶ ମନ୍ତ୍ରଣାଳୟର ମୁଖପାତ୍ର ସୂଚନା ଦେଇଛନ୍ତି । ଆମେରିକା ଆମର ଏକ ଗୁରୁତ୍ୱପୂର୍ଣ୍ଣ ସହଯୋଗୀ ରାଷ୍ଟ୍ର ଓ ଏହି ସହଯୋଗ ବଢ଼ିଚାଲିବ ନିଜ ନିଜର ମ୍ୟୁଚୁଆଲ ରେସପେକ୍ଟ ଓ ସେୟାର୍ଡ ଇଣ୍ଟେରେଷ୍ଟକୁ ନେଇ ବୋଲି ସୂଚନା ବି ସେ ଦେଇଛନ୍ତି । ଭାରତ ତୈଳ କିଣିଚାଲିଛି ରୁଷିଆ ପାଖରୁ ବୋଲି ବାହାବା ଦେଖାଇ ୫୦% ଟାରିଫ ବୃଦ୍ଧି କରିଛି ଆମେରିକା । ଲାଗୁଛି, ଏହା ମୁଖ୍ୟ କାରଣ ନୁହେଁ । ସେଥିପାଇଁ ସେପ୍ଟେମ୍ବର ୮ରେ ବ୍ରିକ୍ସ ରାଷ୍ଟ୍ରଗୁଡ଼ିକର ଭର୍ଚୁଆଲ ମିଟିଂରେ ପ୍ରଧାନମନ୍ତ୍ରୀ ମୋଦି ବଦଳରେ ବିଦେଶ ମନ୍ତ୍ରୀ ଜୟଶଙ୍କର ଯୋଗ ଦେଇଥିଲେ । ଟ୍ରମ୍ପଙ୍କ ପ୍ରଶାସନକୁ ମୋଦି ଅଧିକ କ୍ଷୁବ୍ଧ କରିବାକୁ ଚାହୁଁନଥିଲେ, କାରଣ ସେଥିରେ ଟାରିଫକୁ ବିରୋଧ କରି କଥାବାର୍ତ୍ତା ଓ ଆଲୋଚନା କରିବାର ଉଦ୍ଦେଶ୍ୟ ଥିଲା । ଆଉ ଏକ ଉଲ୍ଲେଖନୀୟ ତଥ୍ୟ ହେଲା, ଟ୍ରମ୍ପ ତାଙ୍କ ନିର୍ବାଚନ ଅଭିଭାଷଣରେ ନିର୍ବାଚିତ ହେଲେ ବାଣିଜ୍ୟରେ ଟାରିଫ୍ ବୃଦ୍ଧି କରିବାକୁ ଆୟୁଧ ଭାବେ ଗ୍ରହଣ କରିଥିଲେ ଓ ସେ ଗତ ନଭେମ୍ବରରେ ନିର୍ବାଚିତ ହେବାପରେ ୱାର୍ଲଡ ବ୍ୟାଙ୍କ, ଇଣ୍ଟର ନାସନାଲ ମନିଟାରି ଫଣ୍ଡ ବା ଆଇଏମଏଫ ଆମ ଦେଶପାଇଁ ଗ୍ରୋଥ ରେଟ୍କୁ କାଟି ହ୍ରାସ କରିଦେଲେ³ ଅର୍ଥାତ୍ ଜିଡିପି ୬ ତଳକୁ ଖସିଯିବ । ବିଶିଷ୍ଟ ଅର୍ଥନୀତିଜ୍ଞ ଅରବିନ୍ଦ ସୁବ୍ରମଣ୍ୟମ, ଶଙ୍କର ଆଚାର୍ଯ୍ୟ, ରଘୁରାମ ରାଜନ ଆଦି ହତାଶାବାଦୀ ଭଳି ଆମ ଦେଶର ଆର୍ଥିକ ଅଭିବୃଦ୍ଧିକୁ ସେଇ ସ୍ତରରେ ରହିବ ବୋଲି ଆକଳନ କରିଥିଲେ । ମାତ୍ର ସେମାନଙ୍କୁ ଆଶ୍ଚର୍ଯ୍ୟଚକିତ କରିଦେଇ ଆମ ଦେଶର ଅଭିବୃଦ୍ଧି ଜାନୁଆରୀରୁ ମାର୍ଚ୍ଚ, ତ୍ରୈମାସିକ ଭାବେ ୭.୪କୁ ବୃଦ୍ଧି ଓ ଏପ୍ରିଲରୁ ଜୁନ ମଧ୍ୟରେ ୭.୮କୁ ବୃଦ୍ଧି ଘଟିଛି । ୭ ପର୍ଯ୍ୟନ୍ତ ବୃଦ୍ଧି ଘଟିଲେ ତାକୁ ମିରାକ୍ଲ ଇକନମି କହନ୍ତି । ଅର୍ଥାତ୍ ଭାରତ ଏହି ମିରାକ୍ଲ ଇକନମି ସୀମା ଭିତରକୁ ଚାଲିଯାଇଛି ସେଇ ହତାଶାବାଦୀ ଅର୍ଥନୀତିଜ୍ଞଙ୍କ ମୁହଁ ବନ୍ଦ କରିଦେଇ ।
ପ୍ରଧାନମନ୍ତ୍ରୀ ସାଙ୍ଘାଇ କୋଅପରେସନ ଅର୍ଗାନାଇଜେସନ ବା ଏସ୍ସିଓ ସମ୍ମିଳନୀରେ ଯୋଗଦେବା ପାଇଁ ଚୀନର ତିଆନଜିନରେ ପହଞ୍ଚିଥିଲେ । ମୋଦିଙ୍କୁ ସାଙ୍ଗରେ ନେଇ ଗୋଟିଏ କାର୍ରେ ଯିବାପାଇଁ ରୁଷ ରାଷ୍ଟ୍ରପତି ୧୦ ମିନିଟ ଅପେକ୍ଷା କରିଥିଲେ ଓ କାର୍ ଭିତରେ ଦୀର୍ଘ ୪୫ ମିନିଟ୍ ଧରି ଦୁଇ ରାଷ୍ଟ୍ରମୁଖ୍ୟ କଥାବାର୍ତ୍ତା ହୋଇଥିଲେ । ଏସସିଓ ବିଜିନେସ୍ରେ ଯୋଗଦେବା କେବଳ ମାତ୍ର ଲକ୍ଷ୍ୟ ନଥିଲା ପ୍ରଧାନମନ୍ତ୍ରୀ ମୋଦିଙ୍କର । ଚୀନ ସହିତ ସଂପର୍କର ସ୍ଥିରତା ଆଣିବା ବି ଲକ୍ଷ୍ୟ ଥିଲା । ୨୦୨୦ ମସିହାରେ ଗଲୱାନ ମାରପିଟ୍ ପରେ ଚୀନ ଓ ଭାରତର ସଂପର୍କରେ ତିକ୍ତତା ବୃଦ୍ଧି ପାଇଥିଲା ଓ ଉଭୟ ଦେଶ ସୀମାକୁ ହଜାର ହଜାର ସୈନ୍ୟ ପ୍ରେରଣ କରିଚାଲିଥିଲେ । ଆଉ ଏକ କାରଣ ହେଲା, ଆମେରିକାକୁ ଜଣାଇଦବା ପାଇଁ ଯେ ଭାରତର ବିଦେଶ ନୀତି, ବାଣିଜ୍ୟ ନୀତି ଏକତରଫା ଭାବେ ୱାଶିଂଟନରେ ନିର୍ଦ୍ଧାରିତ ହେବା ଭାରତ ଚାହେଁନା । ସି ଜିନପିଙ୍ଗ, ପୁଟିନ ଓ ମୋଦିଙ୍କ ମଧ୍ୟରେ ହସ ଆନନ୍ଦରେ କଥାବାର୍ତ୍ତାକୁ ଆମେରିକା ମିଡିଆ ଚାନେଲଗୁଡ଼ିକ ବାରମ୍ବାର ଦେଖାଇ ଚାଲିଥିଲେ ଟ୍ରମ୍ପଙ୍କୁ ଜଣାଇଦବାକୁ ଯେ ଭାରତ ବିରୁଦ୍ଧରେ ଏତାଦୃଶ ୫୦ ପ୍ରତିଶତ ଟାରିଫ୍ ବୃଦ୍ଧି କାଉଣ୍ଟର ପ୍ରୋଡକ୍ଟିଭ ବା ଆମେରିକାର ଆକାଂକ୍ଷିତ ଉଦ୍ଦେଶ୍ୟର ବିପରୀତ ପଦକ୍ଷେପ । ଆଉ ଏକ ସଂକେତ ଆମ ଦେଶର ଲୋକଙ୍କ ପାଇଁ ଯେ, ଆମେରିକାର ଚାପ ଆଗରେ ଭାରତ ମୁଣ୍ଡ ନୁଆଁଇବ ନାହିଁ ବା ଆମ ଦେଶର ଷ୍ଟ୍ରାଟେଜିକ ଅଟୋନମି ବା ରଣନୈତିକ ସ୍ୱାୟତ୍ତତାକୁ ଆମେ କାହାଦ୍ୱାରା ପ୍ରଭାବିତ ହେବାକୁ ଦେବୁନି । ଏହା ଅର୍ଥ ଏହା ନୁହେଁ ଯେ, ଚୀନ ଆମ ଦେଶପାଇଁ ଆମେରିକାର ବିକଳ୍ପ । ଚୀନ ଆମର ପାରମ୍ପରିକ ପ୍ରତିଦ୍ୱନ୍ଦ୍ୱୀ ଓ ଶତ୍ରୁତା ଆଚରଣ କରିଆସିଛି ଆମ ଦେଶ ସହିତ ଓ ସୀମା ବିବାଦର ସ୍ଥାୟୀ ସମାଧାନ ଚାହେଁନି । ଆଉ ଅରୁଣାଚଳ ପ୍ରଦେଶକୁ ସାଉଥ ତିକ୍ରତ କହି ଅକ୍ତିଆର କରିବାକୁ ଚାହୁଁଛି । ପୁଣି ବ୍ରହ୍ମପୁତ୍ର ଉପରେ ବନ୍ଧ ନିର୍ମାଣ କରିଚାଲିଛି । ଆତଙ୍କବାଦୀଙ୍କୁ ଭିଟୋ ପ୍ରୟୋଗ କରି ପାକିସ୍ତାନରେ ସୁରକ୍ଷା ଯୋଗାଇଛି । ପାକିସ୍ତାନକୁ ଅସ୍ତ୍ରଶସ୍ତ୍ର ରପ୍ତାନି କରିଚାଲିଛି ଆମ ଦେଶ ବିରୁଦ୍ଧରେ ଲଢ଼ିବା ପାଇଁ । ଯଦିଓ ଚୀନରେ ଥିବା ଉଇଘର ମୁସଲିମମାନଙ୍କ ମୁଣ୍ଡରୁ ମହମ୍ମଦଙ୍କୁ ହଟାଇ କମ୍ୟୁନିଜିମ ଭର୍ତ୍ତି କରିବା ପାଇଁ ବିଶାଳ ଯୋଜନା ଚୀନ ପରିଚାଳନା କରୁଛି, ଯାହାକୁ ପାକିସ୍ତାନ ଆଖି ବୁଜିଦେଇଛି ।
ଏତିକି ହୋଇଛି ମୋଦିଙ୍କ ଭିଜିଟ୍ ପରେ ଯେ, ଟ୍ରମ୍ପ ତାଙ୍କ ସ୍ୱରକୁ ନରମ କରିଛନ୍ତି । କହିଛନ୍ତି- ମୁଁ ସବୁବେଳେ ମୋଦିଙ୍କର ବନ୍ଧୁ ହୋଇଆସିଛି । ଆମେରିକା ଓ ଭାରତ ମଧ୍ୟରେ ଏକ ସ୍ୱତନ୍ତ୍ର ସଂପର୍କ ରହିଛି । ତେଣୁ ଏତେ ବ୍ୟସ୍ତ ହେବାର କିଛି ନାହିଁ । ପ୍ରଧାନମନ୍ତ୍ରୀ ମୋଦି ତାଙ୍କ ଉତ୍ତରରେ କହିଛନ୍ତି- ଆମେରିକା ସହିତ ଆମ ପାର୍ଟନରସିପ୍ ଭେରି ପଜିଟିଭ ଆଣ୍ଡ ଫରୱାର୍ଡ ଲୁକିଂ । କିନ୍ତୁ ଏହି ଗ୍ଲୋବାଲ ଲିଡରମାନଙ୍କର ସମ୍ମିଳନୀରେ ଚୀନ ସମଗ୍ର ବିଶ୍ୱପାଇଁ ଗ୍ଲୋବାଲ ଗଭର୍ଣ୍ଣାନ୍ସ ଇନିସିଏଟିଭ ବା ଜିଜିଆଇ’କୁ ଉନ୍ମୋଚନ କରିଛି । ଅର୍ଥାତ୍ ଚୀନର ପ୍ଲାନ ହେଲା କିଭଳି ନୂଆ ରୂପରେ ଲେଖାଯିବ ଗ୍ଲୋବାଲ ରୁଲ୍ ବୁକ୍ । ଟ୍ରମ୍ପଙ୍କୁ ଏହା ରାସ୍ତାର କଣ୍ଟା ଭଳି ବାଧିଛି । ଆମ ଦେଶପାଇଁ ସ୍ୱର ନରମ କରିବା କେବଳ କଥାରେ ନୁହେଁ, କାର୍ଯ୍ୟରେ ରୂପାନ୍ତରିତ ହେବା ଆବଶ୍ୟକ । ଏଯାଏଁ ସେ ତାହା କରିନାହାଁନ୍ତି । ତେବେ ଆମେରିକାରେ ଟ୍ରମ୍ପିୟାନ ଅନପ୍ରେଡିକ୍ଟିବିଲିଟି ବା ଟ୍ରମ୍ପଙ୍କ ମନୋଭାବକୁ ଷ୍ଟଡି କରିବା ତାଙ୍କ ନିକଟ ମହଲରେ ବି କଠିନ ହୋଇପଡ଼ିଛି । ଏପରିସ୍ଥଳେ ଚୀନର ଜିଜିଆଇ ଆଡକୁ ଅତ୍ୟଧିକ ଢଳି ପଡ଼ିବା ଆମ ଦେଶପାଇଁ ଆଦୌ ଠିକ୍ ହେବନାହିଁ । କାରଣ ଆମେରିକାଠୁଁ ଟାରିଫ ରିଲିଫ ପାଇବା କଷ୍ଟକର ହୋଇପଡ଼ିବ ।
ସେହିପରି ୱାଶିଂଟନ ଆଡ଼କୁ ଅତ୍ୟଧିକ ପ୍ରଲୁବ୍ଧ ହୋଇ ଆକର୍ଷିତ ହେବା ବି ଆମ ଦେଶକୁ ବିଶ୍ୱମଞ୍ଚରେ ନିଜ ପତିଆରା ହରାଇବା ଭଳି ହୋଇପଡ଼ିବ । ଏହି ଦୁଇଟି ମଧ୍ୟରେ ସନ୍ତୁଳନ ରକ୍ଷାକରି କିପରି ଭାରତ ଆଗକୁ ବଢ଼ିବ ତାହାକୁ ଲକ୍ଷ୍ୟ ରଖିଛି ସମଗ୍ର ବିଶ୍ୱ । ଅବଶ୍ୟ ମୋଦିଙ୍କ ଭିଜିଟ୍ ପରେ ଜିନପିଙ୍ଗ ସୀମାରେ ସ୍ଥିରତା ପାଇଁ ଆଗ୍ରହ ପ୍ରକାଶ କରିଛନ୍ତି । ପାକିସ୍ତାନରେ ଚାଲିଥିବା ବେଲ୍ଟ ଅଣ୍ଡ ରୋଡ୍ ଇନିସିଏଟିଭ ବା ବିଆରଆଇ ପ୍ରୋଜେକ୍ଟର ମୁଖ୍ୟ ସ୍ୱରୂପ ୬୦ ବିଲିଅନ ଡଲାର ମୂଲ୍ୟର ହେବାକୁ ଥିବା ଚାଇନା- ପାକିସ୍ତାନ ଇକନମିକ କରିଡରର ମେନ୍ ଲାଇନ-୧ରୁ ଚୀନ ଓହରି ଯାଇଛି ଓ ଏହାକୁ ଏବେ ଅର୍ଥ ଯୋଗାଇବ ଏଡିବି ବା ଏସିଆନ ଡେଭେଲପମେଣ୍ଟ ବ୍ୟାଙ୍କ । ଚୀନ ଓହରି ଯିବାର କାରଣ ପାକିସ୍ତାନ ଉପରେ ୧.୩ ବିଲିଅନ ଡଲାର ଋଣ ସେ ଶୁଝିପାରୁନି, ପୁଣି କାହିଁକି ଋଣ? ତା’ପରେ ସେଠାରେ କାର୍ଯ୍ୟରତ ଚୀନର ଇଞ୍ଜିନିୟରଙ୍କ ମଧ୍ୟରୁ ୨୧ଜଣ ହତ୍ୟାର ଶିକାର ହୋଇସାରିଲେଣି । ପୁଣି ଏହି ବିଆରଆଇ ପାକିସ୍ତାନ ଅଧିକୃତ କାଶ୍ମୀର ବା ପିଓକେ ମଧ୍ୟ ଦେଇ ଚୀନ ନେଉଛି³ ଯାହାକୁ ଆମ ଦେଶ କହିଛି ଏହା ଆମରି ସାର୍ବଭୌମତ୍ୱ ଉପରେ ହସ୍ତକ୍ଷେପ ।
ପୁଣି ବାଣିଜ୍ୟକୁ ବିଚାର କଲେ ଚୀନ ଆମ ପାଇଁ ଗୁରୁତ୍ୱପୂର୍ଣ୍ଣ । କାରଣ ଶିଳ୍ପର ଅନେକ ମହତ୍ତ୍ୱପୂର୍ଣ୍ଣ ପାର୍ଟସ ଓ ଟେକନୋଲୋଜି ଚୀନଠାରୁ କ୍ରୟ କରେ ଆମ ଦେଶ । ରୁଷିଆ ଗୁରୁତ୍ୱପୂର୍ଣ୍ଣ, କାରଣ ତୈଳ ଶସ୍ତାରେ ଯୋଗାଉଥିଲା ଓ ତତ୍ସହିତ ଅନେକ ସାମରିକ ସରଞ୍ଜାମ ଓ ଡିଫେନ୍ସ ଟେକନୋଲୋଜି । କିନ୍ତୁ ସବୁକୁ ବିଚାର କଲେ ଶିକ୍ଷା, ଗବେଷଣା, ଟୁରିଜିମ, ସେଠାରେ ବସବାସ କରୁଥିବା ଭାରତୀୟ ଆଦି ପାଇଁ ୟୁରୋପ ଓ ଆମେରିକା ଗୁରୁତ୍ୱପୂର୍ଣ୍ଣ । ଆମ ଦେଶର ପାଖାପାଖି ୪୫% ପଣ୍ୟ କାରବାର ହୁଏ ୟୁରୋପୀୟ ଦେଶସମୂହ ଆମେରିକା, ଅଷ୍ଟ୍ରେଲିଆ, ଜାପାନ, ବ୍ରିଟେନ, ସାଉଥ କୋରିଆ, ନିଉଜିଲାଣ୍ଡ ଆଦି ଦେଶ ସହିତ, ଚୀନ ଓ ରୁଷିଆ ସହିତ ମାତ୍ର ୪.୫% । ଏସବୁକୁ ବିଚାରକୁ ନେଇ ଆମ ଦେଶକୁ ସତର୍କତାର ସହିତ ଅନ୍ୟ ଦେଶ ସହିତ ବିଶେଷ ଭାବରେ ଚୀନ, ରୁଷିଆ ଗୋଟିଏ ପକ୍ଷରେ ତ ଅନ୍ୟ ପକ୍ଷରେ ଆମେରିକା ସହିତ କାରବାର କରିବାକୁ ପଡ଼ିବ । ସାଙ୍ଘାଇ ସମ୍ମିଳନୀ ପରେ ଏହି ସମୟଟି ଆମ ପାଖରେ ଚାଲେଞ୍ଜିଂ । ସାମାନ୍ୟ ଅନୁଚିତ ପଦକ୍ଷେପ ଅସୁବିଧାରେ ପକାଇ ଦେଇପାରେ ଆମ ଦେଶକୁ ।
