କଣ୍ଟାବାଞ୍ଜି, ୧୪।୧୧: ବଲାଙ୍ଗିର ଜିଲ୍ଲା ତୁରେକେଲାର ବ୍ଲକ୍ ଅନ୍ତର୍ଗତ କୁଇବାହାଲ ପଲି ବିକାଶ ପଞ୍ଚାୟତ ହାଇସ୍କୁଲରେ ଧୁମଧାମ ପାଳନ ହୋଇଥିଲା ଶିଶୁ ଦିବସ । ଠିକ୍ ଏତିକି ବେଳେ ସ୍କୁଲ୍ ପରିସରରେ ଘଟିଥିଲା ଅଘଟଣ । ପ୍ରଧାନଶିକ୍ଷକ ପର୍ଶୁରାମ ଦାସ ଶିଶୁ ଦିବସରେ ଅଭିଭାଷଣ ଦେବା ସମୟରେ ହଠାତ୍ ଟଳି ପଡ଼ିଥିଲେ । ପରେ ସହଯୋଗୀ ଶିକ୍ଷକମାନେ ଚିକିତ୍ସା ପାଇଁ ତାଙ୍କୁ କଣ୍ଟାବାଞ୍ଜି ଡାକ୍ତରଖାନା ଆଣିଥିଲେ । ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ ।
ପର୍ଶୁରାମଙ୍କ ଘର କଟକ ଜିଲ୍ଲା ଛତିଆ ଅଞ୍ଚଳରେ ହୋଇଥିବାବେଳେ କଣ୍ଟାବାଞ୍ଜି ସହରରେ ଭଡ଼ା ଘରେ ରହି କୁଇବାହାଲ ହାଇସ୍କୁଲରେ ପ୍ରଧାନଶିକ୍ଷକ ଭାବେ କାର୍ଯ୍ୟରତ ଥିଲେ । କଣ୍ଟାବାଞ୍ଜି ଡାକ୍ତରଖାନାରେ ଶବ ବ୍ୟବଚ୍ଛେଦ ପରେ ପରିବାର ବର୍ଗଙ୍କୁ ମୃତ ଶରୀର ହସ୍ତାନ୍ତର କରାଯିବ । ପ୍ରଧାନଶିକ୍ଷକଙ୍କ ମୃତ୍ୟୁ ପରେ ବିଦ୍ୟାଳୟ ପରିସରରେ ଶୋକାକୁଳ ପରିବେଶ ସୃଷ୍ଟି ହୋଇଛି ।
