ନୂଆଦିଲ୍ଲୀ: ପଞ୍ଜାବର ଖଦୁର ସାହିବର ସାଂସଦ ଅମୃତପାଲ ସିଂହ ସଂସଦ ଅଧିବେଶନରେ ଯୋଗ ଦେବା ପାଇଁ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଏଥିପାଇଁ ସେ ପଞ୍ଜାବ ଏବଂ ହରିୟାଣା ହାଇକୋର୍ଟରେ ଏକ ଆବେଦନ ଦାଖଲ କରିଛନ୍ତି। ଖଲିସ୍ତାନ ସମର୍ଥକ ଅମୃତପାଲ ବର୍ତ୍ତମାନ ରାଷ୍ଟ୍ରୀୟ ସୁରକ୍ଷା ଅଧିନିୟମ (NSA) ଅଧୀନରେ ଆସାମର ଦିବ୍ରୁଗଡ଼ ଜେଲରେ ବନ୍ଦୀ ଅଛନ୍ତି।

ଲୋକସଭା ସଦସ୍ୟ ସଂସଦ ଅଧିବେଶନରେ ଯୋଗଦେବା ଏବଂ ଜାନୁଆରୀ ୨୬ ତାରିଖରେ ଗଣତନ୍ତ୍ର ଦିବସ ଉତ୍ସବରେ ଅଂଶଗ୍ରହଣ କରିବା ପାଇଁ କୋର୍ଟରୁ ଅନୁମତି ମାଗିଛନ୍ତି। ଅମୃତପାଲ ସିଂହ ତାଙ୍କ ଆବେଦନରେ ଯୁକ୍ତି ଦର୍ଶାଇଛନ୍ତି ଯେ ସେ ଦୀର୍ଘ ସମୟ ଧରି ସଂସଦ ଅଧିବେଶନରେ ଯୋଗ ଦେଇପାରୁନାହାଁନ୍ତି, ଯାହା ଫଳରେ ସେ ସଂସଦରେ ୧୯ ଲକ୍ଷ ଭୋଟରଙ୍କ ସ୍ୱର ଉଠାଇ ପାରୁନାହାଁନ୍ତି। କେବଳ ଏତିକି ନୁହେଁ, ସେ ଦାବି କରିଛନ୍ତି ଯେ, ତାଙ୍କ ଅଟକ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ଏବଂ ଏହାର ଲକ୍ଷ୍ୟ ହେଉଛି ତାଙ୍କର ବୃଦ୍ଧି ପାଉଥିବା ଲୋକପ୍ରିୟତାକୁ ଅଟକାଇବା । 

୨୦୨୩ ମାର୍ଚ୍ଚରେ ଅମୃତସରର ଡେପୁଟି ମାଜିଷ୍ଟ୍ରେଟଙ୍କ ଦ୍ୱାରା ଜାରି କରାଯାଇଥିବା ଅଟକ ଆଦେଶକୁ ଅନେକ ଥର ବୃଦ୍ଧି କରାଯାଇଛି। ଅମୃତପାଲଙ୍କ ସୋସିଆଲ ମିଡିଆ ପୋଷ୍ଟ ଏବଂ ଜେଲରେ ତାଙ୍କ ସହିତ ମିଳିଥିବା ଅନଧିକୃତ ଜିନିଷ ଯୋଗୁଁ ମାର୍ଚ୍ଚ ୨୦୨୪ରେ ତାଙ୍କ ବିରୋଧରେ ଏକ ନୂତନ ଅଟକ ଆଦେଶ ଜାରି କରାଯାଇଥିଲା। ସେହି ସମୟରେ, ଅମୃତପାଲ ସିଂହ ଏହି ଅଭିଯୋଗ ଗୁଡ଼ିକୁ ଦୁର୍ବଳ ଏବଂ ଅସାମ୍ବିଧାନିକ ବୋଲି କହିଥିଲେ।

ଖାଦୁର ସାହିବ ସାଂସଦ ଆହୁରି ଯୁକ୍ତି ଦେଇଥିଲେ ଯେ ତାଙ୍କର ଅଟକ କେବଳ ତାଙ୍କର ସାମ୍ବିଧାନିକ ଅଧିକାରର ଉଲ୍ଲଂଘନ ନୁହେଁ ବରଂ ତାଙ୍କ ନିର୍ବାଚନ ମଣ୍ଡଳୀର ଭୋଟରଙ୍କ ଅଧିକାରର ମଧ୍ୟ ଉଲ୍ଲଂଘନ। ତାଙ୍କ ଆବେଦନରେ, ସେ କୋର୍ଟରୁ ମଧ୍ୟବର୍ତ୍ତୀକାଳୀନ ମୁକ୍ତି ଏବଂ ବିଚାରାଧୀନ ମାମଲାର ଶୀଘ୍ର ନିଷ୍ପତ୍ତି ନେବାକୁ ଦାବି କରିଛନ୍ତି।