ଚଣ୍ଡିଗଡ଼, ୦୫/୦୯: ପଞ୍ଜାବରେ ପାଣି ପ୍ରଳୟ । ପ୍ରକୃତି କୋପ ଦେଖାଇଛି । ୧୪ ବର୍ଷର ରେକର୍ଡ ଭାଙ୍ଗିଛି ବର୍ଷା । ଗୋଟିଏ ସପ୍ତାହରେ ମୌସୁମୀର ୩୫ ପ୍ରତିଶତ ବର୍ଷା ହୋଇଛି । ଫଳରେ ୨୩ ଜିଲ୍ଲାର ୧୯୦୨ ଗାଁରେ ଘେରରେ ବନ୍ଦୀ ହୋଇ ରହିଛି । ଲଗାଣ ବର୍ଷା ଏବଂ ଭୀଷଣ ବନ୍ୟା ପାଇଁ ବର୍ତ୍ତମାନ ସୁଦ୍ଧା ୪୩ଜଣଙ୍କ ମୃତ୍ୟୁ ହୋଇଥିବା ବେଳେ ଆନେକ ଲୋକ ନିଖୋଜ ରହିଛନ୍ତି । ସେହିପରି ବନ୍ୟା ଯୋଗୁ ୩ ଲକ୍ଷ ୮୪ ହଜାର ଲୋକ ପ୍ରଭାବିତ ହୋଇଛନ୍ତି । ସରକାରୀ ଆକଳନ ଅନୁଯାୟୀ, ୧.୭୧ ଲକ୍ଷ ହେକ୍ଟର ଜମିର ଫସଲ ବର୍ବାଦ ହୋଇଛି ।
ପଞ୍ଜାବ ରାଜସ୍ବ ବିଭାଗର ତଥ୍ୟ ଅନୁଯାୟୀ, ପୁନର୍ବାସ ଏବଂ ପ୍ରାକୃତିକ ବିପର୍ଯ୍ୟୟ ମନ୍ତ୍ରୀ ହରଦୀପ ସିଂହ ମୁଣ୍ଡୟନ କହିଛନ୍ତି, ଭୟଙ୍କର ବନ୍ୟା ପାଇଁ ୨୩ ଜିଲ୍ଲାର ପ୍ରାୟ ୧୯୦୨ଟି ଗାଁ ପାଣି ଘେରରେ ରହିଛି । ଯେଉଁଥିରେ ପ୍ରାୟ ୩.୮୩ ଲକ୍ଷ ଲୋକ ପ୍ରଭାବିତ ହୋଇଛନ୍ତି । ଏଥିରୁ ୨୦,୯୭୨ଜଣଙ୍କୁ ବନ୍ୟା ବିପନ୍ନଙ୍କୁ ସୁରକ୍ଷିତ ଉଦ୍ଧାର କରି ଅନ୍ୟତ୍ର ସ୍ଥାନାନ୍ତର କରାଯାଇଛି । ଗତ ୨୪ଘଣ୍ଟାରେ ଆଉ ୬ଜଣଙ୍କ ମୃତ୍ୟୁ ହୋଇଛି । ଏହାକୁ ମିଶାଇ ୧୪ ଜିଲ୍ଲାରେ ମୋଟ୍ ୪୩ ଜଣ ପ୍ରାଣ ହରାଇଛନ୍ତି । ବନ୍ୟା ଯୋଗୁ ପ୍ରାୟ ୧.୭୧ ଲକ୍ଷ ହେକ୍ଟର ଚାଷଜମିରେ ଫସଲ ବନ୍ୟା ପାଣିରେ ବୁଡ଼ିକରି ରହିଛି ।
ସେପଟେ ଉତ୍ତର ଭାରତରେ ବର୍ଷା ଓ ବନ୍ୟା ବିପର୍ଯ୍ୟୟ ଜାରି ରହିଛି । ରାଜଧାନୀ ଦିଲ୍ଲୀରେ ଯମୁନା ନଦୀ ପାଣି ସହର ଭିତରେ ଧସେଇ ପଶିଛି । ଗତକାଲି ସହରର ଅନେକ ଅଞ୍ଚଳରେ ୩-୪ ଫୁଟ୍ ପର୍ଯ୍ୟନ୍ତ ପାଣି ଭରିଯାଇଥିଲା । ରାସ୍ତାରେ ଲହଡ଼ି ଭାଙ୍ଗୁଥିବା ନଦୀ ପାଣି । ମୟୂର ବିହାର ଫେଜ-୧ରେ ବନ୍ୟା ପ୍ରଭାବିତ ଲୋକଙ୍କ ପାଇଁ ନିର୍ମିତ ରିଲିଫ୍ ଶିବିରଗୁଡ଼ିକ ମଧ୍ୟ ଯମୁନାର ବନ୍ୟା ଜଳରେ ବୁଡ଼ିଯାଇଥିଲା । ଅଲ୍ଲୀପୁରରେ ଜାତୀୟ ରାଜପଥ-୪୪ରେ ଫ୍ଲାଇଓଭରର ଏକ ଅଂଶ ଧସିଛି । ମଧ୍ୟପ୍ରଦେଶର ଉଜ୍ଜୈନିରେ କ୍ଷିପ୍ରାର ଜଳସ୍ତର ବଢ଼ିବା ଯୋଗୁ ନଦୀ କୂଳରେ ଥିବା ମନ୍ଦିର ବୁଡ଼ିଯାଇଛି । ମନ୍ଦିରର ଗମ୍ବୁଜ ପର୍ଯ୍ୟନ୍ତ ପାଣି ଭରିଯାଇଛି । ରତଲାମରେ ରେଳ ଷ୍ଟେସନରେ ୪ ନମ୍ବର ପ୍ଲାଟଫର୍ମ ବୁଡ଼ିଯାଇଛି । ରାଜସ୍ଥାନର ଦୌସା ଜିଲ୍ଲାର ଅନେକ ଅଞ୍ଚଳରେ ଗୁରୁବାର ପ୍ରବଳ ବର୍ଷା ହୋଇଛି । ସିକରାୟ ସମେତ ଅନେକ ଅଞ୍ଚଳର ବଜାରରେ ପାଣି ଭରିଯାଇଛି । ଆଜମେରରେ ଜେଏଲ୍ଏନ୍ ହସ୍ପିଟାଲ ଏବଂ ମେଡିକାଲ କଲେଜ ବନ୍ୟା ପାଣିରେ ଅଧା ବୁଡ଼ିଯାଇଛି ।
