ନୂଆଦିଲ୍ଲୀ,୧୩/୦୧: ଟିମ୍ ଇଣ୍ଡିଆର ତାରକା ବ୍ୟାଟର ଶ୍ରେୟାସ ଆୟର ପଞ୍ଜାବ କିଙ୍ଗ୍ସର ନୂଆ ଅଧିନାୟକ ନିଯୁକ୍ତ ହୋଇଛନ୍ତି । ଲୋକପ୍ରିୟ ଟିଭି ସୋ’ ବିଗ୍ ବସ୍-୧୮ର ଏକ ସ୍ୱତନ୍ତ୍ର ଏପିସୋଡ୍ରେ ହୋଷ୍ଟ ତଥା ବଲିଉଡ୍ ଅଭିନେତା ସଲମାନ୍ ଖାନ୍ ଏବିଷୟରେ ଆନୁଷ୍ଠାନିକ ଭାବେ ଘୋଷଣା କରିଛନ୍ତି । ରବିବାର ଅନୁଷ୍ଠିତ ଏହି ଏପିସୋଡ୍ରେ ଆୟରଙ୍କ ସମେତ ପଞ୍ଜାବ କିଙ୍ଗ୍ସ ଦଳ ସଦସ୍ୟ ଥିବା ୟୁଝବେନ୍ଦ୍ର ଚହଲ ଓ ଶଶାଙ୍କ ସିଂହ ଯୋଗ ଦେଇଥିଲେ ।
ଆଇପିଏଲ୍ ମେଗା ନିଲାମରେ ପଞ୍ଜାବ କିଙ୍ଗ୍ସ ୨୬.୭୫ କୋଟି ଟଙ୍କାରେ ଆୟରଙ୍କୁ କିଣିଥିଲା । ସେ ଆଇପିଏଲ ଇତିହାସର ସବୁଠୁ ଦାମୀ ଖେଳାଳି ସାବ୍ୟସ୍ତ ହୋଇଥିଲେ । ମାତ୍ର କିଛି ସମୟ ପରେ ଲକ୍ଷେ୍ନø ସୁପରଜାଏଣ୍ଟ୍ସ ୨୭କୋଟି ଟଙ୍କାରେ ରିଷଭ ପନ୍ତଙ୍କୁ କିଣିଥିଲା । ପନ୍ତ ଆଇପିଏଲ୍ର ସବୁଠୁ ମହଙ୍ଗା ଖେଳାଳି ଭାବେ ରେକର୍ଡ଼ ସ୍ଥାପନ କରିଥିଲେ । ନିଲାମରେ ପଞ୍ଜାବ କିଙ୍ଗ୍ସ ଆୟରଙ୍କୁ କିଣିବା ପରେ ସେ ଦଳର ନେତୃତ୍ୱ ନେବା ଏକପ୍ରକାର ସ୍ପଷ୍ଟ ହୋଇଯାଇଥିଲା । କେବଳ ଆନୁଷ୍ଠାନିକ ଭାବେ ଘୋଷଣା ବାକି ରହିଥିଲା । ଆୟର ଗତବର୍ଷ କୋଲକାତା ନାଇଟ୍ ରାଇଡର୍ସକୁ ଆଇପିଏଲ୍ ଚାମ୍ପିଅନ୍ କରାଇଥିଲେ । ମାତ୍ର ନିଲାମ ପୂର୍ବରୁ କୋଲକାତା ତାଙ୍କୁ ମୁକ୍ତ କରି ଦେଇଥିଲା ।
ଆୟର ନିଲାମରେ ସାମିଲ ହେବାକୁ ଚାହୁଁଥିବାରୁ ଦଳ ଏହି ନିଷ୍ପତ୍ତି ନେଇଥିଲା । ପୂର୍ବରୁ ଆୟରଙ୍କ ନେତୃତ୍ୱରେ ଦିଲ୍ଲୀ କ୍ୟାପିଟାଲ୍ସ ୨୦୨୦ ସିଜନରେ ଫାଇନାଲ୍ ଖେଳି ରନର୍ସ ଅପ୍ ହୋଇଥିଲା । ଆୟର ୨୦୧୫ରେ ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ଆଇପିଏଲ୍ ପଦାର୍ପଣ କରିଥିଲେ । ୨୦୧୮ରେ ସେ କ୍ୟାପିଟାଲ୍ସ ଦଳର ଅଧିନାୟକ ନିଯୁକ୍ତ ହୋଇଥିଲେ । ସେ ୩ଟି ସଂସ୍କରଣରେ ଦଳକୁ ପ୍ଲେ-ଅଫ୍ରେ ପହଞ୍ଚାଇବାରେ ସଫଳ ହୋଇଥିଲେ । ସୂଚନାଯୋଗ୍ୟ, ଚଳିତ ଘରୋଇ କ୍ରିକେଟ୍ ସିଜନରେ ଆୟରଙ୍କ ନେତୃତ୍ୱରେ ମୁମ୍ବାଇ ସୟଦ ମୁସ୍ତାକ ଅଲି ଟ୍ରଫି ଚାମ୍ପିଅନ୍ ହୋଇଥିଲା । ସେ ଗୋଟିଏ ଶତକ ସହ ମୋଟ ୩୪୫ରନ୍ ସଂଗ୍ରହ କରିଥିଲେ ।
