ଭୁବନେଶ୍ୱର,୦୫/୧୨: ଦେଶ ମଧ୍ୟରେ ଧାର୍ମିକ ପର୍ଯ୍ୟଟନ ଯୋଗୁ ଏବେ ଧାର୍ମିକ ସ୍ଥଳ ଗୁଡିକରେ ବାସଗୃହ ଚାହିଦାରେ ଦ୍ରୁତ ପରିବର୍ତ୍ତନ ହୋଇଛି । ରାଜ୍ୟର ପୁରୀରେ ଏହାର ପ୍ରତିଫଳନ ଦେଖାଯାଇଛି । ପୁରୀରେ ଏବେ ଲୋକମାନେ ଘର କିଣିବାକୁ ବିଶେଷ ଆଗ୍ରହ ଦେଖାଉଛନ୍ତି । ଫଳରେ ଏହା ରିୟଲ ଇଷ୍ଟେଟର ହଟ୍ସ୍ପଟ ପାଲଟିଛି । ଏଠାରେ ଘର ଚାହିଦା ସହ ପ୍ରପର୍ଟି ଦାମ ମଧ୍ୟ ବଢ଼ୁଥିବା ମ୍ୟାଜିକ ବ୍ରିକ୍ସର ଏକ ରିପୋର୍ଟରୁ ଜଣାପଡିଛି ।
ଏହି ରିପୋର୍ଟ ମୁତାବକ, ପୁରୀରେ ଘର ଚାହିଦା ଏବେ ୫୨% ବୃଦ୍ଧି ହୋଇଛି । ଏଠାରେ ବର୍ଗଫୁଟ ପିଛା ଦର ୬୧୧୪ ଟଙ୍କା । ବର୍ଷକ ମଧ୍ୟରେ ଏହି ଦରରେ ୩୦% ବୃଦ୍ଧି ପରିଲକ୍ଷିତ ହୋଇଛି । ଫଳରେ ବାସଗୃହ ଚାହିଦା ବୃଦ୍ଧିରେ ପୁରୀ ଦ୍ୱିତୀୟ ସ୍ଥାନରେ ରହିଛି । ଲୋକେ କେବଳ ରହିବା ଲାଗି ଘର କିଣୁ ନାହାନ୍ତି । ଦୀର୍ଘକାଳୀନ ନିବେଶ, ଭଡା, ହଲିଡେ ହୋମ, ସ୍ୱଳ୍ପକାଳୀନ ରହଣୀ ଗୃହ ଭାବେ ବ୍ୟବହାର କରିବାକୁ ଏଭଳି ଘର କିଣୁଛନ୍ତି ଲୋକେ । ବାସଗୃହ କ୍ଷେତ୍ରରେ ନିବେଶ ଏକ ଆକର୍ଷଣୀୟ ବିକଳ୍ପ ଭାବେ ଉଭା ହୋଇଛି ।
ଧାର୍ମିକ ପର୍ଯ୍ୟଟନ ଯୋଗୁ ରିୟଲ ଇଷ୍ଟେଟର ହଟସ୍ପଟ ପାଲଟିଥିବା ଅନ୍ୟ ସହର ଗୁଡିକ ମଧ୍ୟରେ ଉତ୍ତର ପ୍ରଦେଶର ପ୍ରୟାଗରାଜ, ବନାରସ ଏବଂ ମହାରାଷ୍ଟ୍ରର ସିରିଡି ରହିଛି । ପ୍ରୟାଗରାଜରେ ବାସଗୃହ ଚାହିଦା ୨୮% ବଢ଼ିଛି । ବର୍ଗଫୁଟ ପିଛା ପ୍ରପର୍ଟି ମୂଲ୍ୟ ୧୨୨% ବୃଦ୍ଧି ହୋଇ ୬୬୪୫ ଟଙ୍କା ରହିଛି । ସେହିଭଳି ବନାରସ ଏହା ୧୮% ବୃଦ୍ଧି ହୋଇ ୬୧୨୮ ଟଙ୍କା ଏବଂ ସିରିଡିରେ ୬୭% ବୃଦ୍ଧି ହୋଇ ୪୦୨୮ ଟଙ୍କା ରହିଥିବା ମ୍ୟାଜିକ ବ୍ରିକ୍ସ ରିପୋର୍ଟରୁ ଜଣାପଡିଛି ।
