ପୁରୀ,୧୩/୦୪: ସାହିଯାତ ଚାଲିଥିବାରୁ ବୀରବାଦ୍ୟରେ କମ୍ପୁଛି ଶ୍ରୀକ୍ଷେତ୍ର । ଶୁକ୍ରବାର ରାତିରେ କୁଣ୍ଢେଇବେଣ୍ଟ ସାହି ପକ୍ଷରୁ ଯାତ ବାହାରି ଦୋଳମଣ୍ଡପ ସାହି ପରିକ୍ରମା କରିଥିଲା । ଏହି ଉତ୍ସବରେ ସାମିଲ ହୋଇଥିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୂରଜ । ସାହିର ପ୍ରତ୍ୟକଟି ଜାଗାରେ ଧର୍ମେନ୍ଦ୍ର ପ୍ରଧାନଙ୍କୁ ମଲ୍ଲୀମାଳ ପକାଇ ସ୍ୱାଗତ କରାଯାଇଥିଲା । ସାହିରେ ଚାଲିଚାଲି କେନ୍ଦ୍ରମନ୍ତ୍ରୀ ବୁଲିବା ସହ ସାହି ମୁରବିଙ୍କ ସହ ବିଭିନ୍ନ ବିଷୟ ଆଲୋଚନା କରିଥିଲେ । ସାହି ମୁରବିଙ୍କ ଠାରୁ ଆରମ୍ଭ କରି ସାହି ଭେଣ୍ଡିଆମାନେ ମଧ୍ୟ କେନ୍ଦ୍ରମନ୍ତ୍ରୀଙ୍କୁ ପାଖରେ ପାଇ ବେଶ୍ ଖୁସି ବ୍ୟକ୍ତ କରିଥିଲେ । ପରେ ଶ୍ରୀମନ୍ଦିର ସିଂହଦ୍ୱାର ନିକଟକୁ ଯାଇ ଧର୍ମେନ୍ଦ୍ର ପ୍ରଧାନ ପତିତପାବନ ଓ ଅରୁଣସ୍ତମ୍ଭ ସମ୍ମୁଖରେ ପ୍ରଣାମ ଜଣାଇଥିଲେ । ବଡଛତା ମଠ ପାହାଚରେ କିଛି ସମୟ ବସି ମହାପ୍ରଭୁଙ୍କୁ ଧ୍ୟାନ କରିଥିଲେ ।
ସାହିଯାତ ବୁଲିବା ପରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଥିଲେ, କୁସ୍ତି, ମଲ୍ଲ ଯୁଦ୍ଧ, ଖଣ୍ଡା ଯୁଦ୍ଧ ହେଉଛି ଆମ ପରମ୍ପରାର ଅଂଶବିଶେଷ । ସାହିଯାତ ଏହାର ଏକ ଅଭିନ୍ନ ଅଙ୍ଗ । ଏହି ଉତ୍ସବରେ ସାମିଲ୍ ହେବା ଖୁବ୍ ଖୁସିର ବିଷୟ । ସେହିପରି ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୂରଜ କହିଛନ୍ତି, ଆବହମାନ କାଳରୁ ଏହି କଳାକୁ ବଞ୍ଚାଇ ରଖିବା ନିମନ୍ତେ ଠାକୁରଙ୍କ ଲୀଳାକୁ ଏଥିରେ ସାମିଲ କରାଯାଇଛି । ଏହି କାର୍ଯ୍ୟକ୍ରମରେ ଯୋଗଦେବା ସୌଭାଗ୍ୟର ବିଷୟ ।
ଶୁକ୍ରବାର କୁଣ୍ଢେଇବେଣ୍ଟ ସାହି ପକ୍ଷରୁ ସୀତା ଚୋରି ନୀତି ଅନୁଷ୍ଠିତ ହୋଇଥିଲା । ମାୟା ରାବଣ ସୀତାଙ୍କୁ ଚୋରି କରିଥିଲେ । ଅନ୍ୟପଟେ ଶ୍ରୀମନ୍ଦିର ପକ୍ଷରୁ ଅନୁଷ୍ଠିତ ହୋଇଥିଲା ମାୟାମୃଗ ଓ ସୀତା ଚୋରି ନୀତି । କୁଣ୍ଢେଇବେଣ୍ଟ ସାହି ପଥର ଆଖଡ଼ାରୁ ମାୟାରାବଣ ଓ ଅନ୍ୟାନ୍ୟ ପୌରାଣିକ ଚରିତ୍ର ବାହାରି ସାହି ପରିକ୍ରମା କରିବା ପରେ ଜଗନ୍ନାଥ ବଲ୍ଲଭ ମଠରେ ଠାକୁରଙ୍କ ରାମଲୀଳା ନୀତି ସମ୍ପନ୍ନ ହୋଇଥିଲା । ସୁନ୍ଦରା ଜାଗା ପକ୍ଷରୁ ନିଶାଣ ବାହାରିଥିବା ବେଳେ ରାବଣ ନୃତ୍ୟ ସମସ୍ତଙ୍କର ମୁଖ୍ୟ ଆକର୍ଷଣ ପାଲଟିଥିଲା । ସାହିର ପିଲା ମାନେ ଖଣ୍ଡା ଚାଳନା, ପଟ୍ଟା, ଲାଠି ଖେଳ, ହୁଳା ବନାଟି, ବାଙ୍କ, ଛଡ଼ି, ନିଝାମ୍, ପିରାମିଡ୍ ଆଦି ସମରକଳା ପ୍ରଦର୍ଶନ କରିଥିଲେ । ଏହି ପଟୁଆରରେ ସପ୍ତଶିରା, ନାଗା, ମେଢ଼, ଭୁଆସିକ ସହ ପ୍ରଜ୍ଞାପନ ମେଢ଼ ମଧ୍ୟ ପ୍ରଦର୍ଶିତ ହୋଇଥିଲା । ବୀରବାଦ୍ୟ ସାଙ୍ଗକୁ ପାରମ୍ପରିକ ନୃତ୍ୟ ବିଳମ୍ବିତ ରାତି ପର୍ଯ୍ୟନ୍ତ ସମସ୍ତେ ଦେଖିଥିଲେ । କେନ୍ଦ୍ର ମନ୍ତ୍ରୀ ଶ୍ରୀ ପ୍ରଧାନଙ୍କ ଯୋଗଦାନ କଳାକାରଙ୍କ ମନରେ ଉତ୍ସାହ ଭରି ଦେଇଥିଲା ।
