ନୂଆଦିଲ୍ଲୀ,୨୭।୬: ଆମେରିକା ରାଷ୍ଟ୍ରପତି ଡୋନାଲ୍ଡୋ ଟ୍ରମ୍ପଙ୍କୁ ନେଇ ଦୁନିଆର ବହୁ ଦେଶର ଲୋକଙ୍କ ଭରସା ପୂର୍ବ ତୁଳନାରେ କମ୍ ହୋଇଯାଇଛି। ଏକଥା ପ୍ୟୁ ରିସର୍ଚ୍ଚ ସେଣ୍ଟରର ନୂଆ ସର୍ଭେରେ ସାମନାକୁ ଆସିଛି। ନୂତନ ସର୍ଭେ ଅନୁଯାୟୀ, ବିଶ୍ୱର ଅନେକ ଦେଶର ଲୋକମାନେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଉପରେ ବିଶ୍ୱାସ ହରାଇ ସାରିଛନ୍ତି। ସର୍ଭେ ଅନୁଯାୟୀ, ୩୬ଟି ଦେଶର ୭୬% ଲୋକ କହିଛନ୍ତି ଯେ ସେମାନଙ୍କର ଟ୍ରମ୍ପଙ୍କ ବିଶ୍ୱ ନେତୃତ୍ୱ ଉପରେ ବିଶ୍ୱାସର ଅଭାବ ଅଛି। କେବଳ ୨୩% କହିଛନ୍ତି ଯେ ସେମାନେ ଅନ୍ତର୍ଜାତୀୟ ବ୍ୟାପାରରେ ଟ୍ରମ୍ପଙ୍କ ନିଷ୍ପତ୍ତି ଉପରେ ବିଶ୍ୱାସ କରନ୍ତି। ଏହି ସର୍ଭେରେ ଭାରତ ସହ ଜଡିତ ଏକ ଆକର୍ଷଣୀୟ ତଥ୍ୟ ମଧ୍ୟ ପ୍ରକାଶ ପାଇଛି। ବିଶ୍ୱର ଶ୍ରେଷ୍ଠ ନେତାମାନଙ୍କ ମଧ୍ୟରେ, ଭାରତର ଲୋକମାନେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଉପରେ ସବୁଠାରୁ ଅଧିକ ବିଶ୍ୱାସ ପ୍ରକାଶ କରିଥିଲେ।
୫୧% ଭାରତୀୟ କହିଛନ୍ତି ଯେ ସେମାନେ ପୁଟିନଙ୍କୁ ବିଶ୍ୱାସ କରନ୍ତି। ଏହା ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଉପରେ ୩୯%, ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ଉପରେ ୩୪%, ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନଙ୍କ ଉପରେ ୩୩%, ୟୁକ୍ରେନୀୟ ରାଷ୍ଟ୍ରପତି ଭୋଲ୍ଡିମିର ଜେଲେନ୍ସକିଙ୍କ ଉପରେ ୨୯% ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ଉପରେ ୨୫% ଲୋକ ବିଶ୍ୱାସ କରନ୍ତି। ଏହି ସର୍ଭେ ୨୦୨୬ ଫେବୃଆରୀ ୮ ରୁ ମେ ୧୩ ମଧ୍ୟରେ କରାଯାଇଥିଲା। ୩୬ ଟି ଦେଶର ୪୨,୧୫୧ ଜଣଙ୍କ ମତାମତ ସଂଗ୍ରହ କରାଯାଇଥିଲା।
ସର୍ଭେ ଅନୁସାରେ, ଭାରତରେ ଟ୍ରମ୍ପଙ୍କ ଲୋକପ୍ରିୟତା ଗତ ବର୍ଷ ତୁଳନାରେ କମ୍ ହୋଇଛି। ୨୦୨୫ ସର୍ଭେରେ ୫୧% ଭାରତୀୟ ଟ୍ରମ୍ପଙ୍କ ଉପରେ ଭରସା ପ୍ରକାଶ କରିଥିଲେ। କିନ୍ତୁ ଚଳିତ ବର୍ଷ ଏହି ସଂଖ୍ୟା ହ୍ରାସ ପାଇଁ ୩୯% ହୋଇଯାଇଛି। ଏହାର ଅର୍ଥ ହେଉଛି ମାତ୍ର ଗୋଟିଏ ବର୍ଷ ମଧ୍ୟରେ ଟ୍ରମ୍ପଙ୍କ ଉପରେ ବିଶ୍ୱାସ ୧୨ ପ୍ରତିଶତ ହ୍ରାସ ପାଇଛି। ରିପୋର୍ଟ ଅନୁଯାୟୀ, ଭାରତୀୟମାନେ ଟ୍ରମ୍ପଙ୍କ ଅନେକ ନୀତିକୁ ନାପସନ୍ଦ କରିଥିଲେ। ଏଥିରେ ଅନ୍ୟ ଦେଶ ଉପରେ ଲାଗୁ ହୋଇଥିବା ଶୁଳ୍କ, ଇରାନ ଏବଂ ଭେନେଜୁଏଲା ପ୍ରତି ଆମେରିକାର ନୀତି, କଠୋର ପ୍ରବାସ ନିୟମ, ଅନ୍ତର୍ଜାତୀୟ ସହାୟତା ସଂସ୍ଥାଗୁଡ଼ିକୁ ବନ୍ଦ କରିବାର ନିଷ୍ପତ୍ତି ଏବଂ ଗାଜା ଯୁଦ୍ଧ ଏବଂ ରୁଷ-ୟୁକ୍ରେନ ଯୁଦ୍ଧ ଉପରେ ତାଙ୍କର ମତ ଅନ୍ତର୍ଭୁକ୍ତ।
ଭାରତରେ କେବଳ ୩୨% ଲୋକ ଟ୍ରମ୍ପଙ୍କ ଇମିଗ୍ରେସନ୍ ନୀତିକୁ ସମର୍ଥନ କରିଥିଲେ। କେବଳ ୨୮% ତାଙ୍କ ଇରାନ ନୀତିକୁ ସମର୍ଥନ କରିଥିଲେ। ସେଭଳି ମାତ୍ର ୧୭% ତାଙ୍କ ଭେନେଜୁଏଲା ନୀତିକୁ ସମର୍ଥନ କରିଥିଲେ। ରିପୋର୍ଟରେ ଏହା ମଧ୍ୟ କୁହାଯାଇଛି ଯେ ଭାରତୀୟମାନେ ଆମେରିକାର ଅନ୍ତର୍ଜାତୀୟ ସହାୟତା ସଂସ୍ଥା USAID ଭଳି ପ୍ରତିଷ୍ଠାନକୁ ବନ୍ଦ କରିବା ନିଷ୍ପତ୍ତିକୁ ବହୁତ ସମର୍ଥନ କରୁ ନଥିଲେ। ଗାଜା ଯୁଦ୍ଧ ଏବଂ ରୁଷ-ୟୁକ୍ରେନ ଯୁଦ୍ଧ ସମ୍ପର୍କରେ ଟ୍ରମ୍ପଙ୍କ ନୀତିକୁ ମଧ୍ୟ ଭାରତରେ ସୀମିତ ସମର୍ଥନ ମିଳିଥିଲା।
ସର୍ଭେ ଅନୁଯାୟୀ, ଭାରତରେ ଆମେରିକା ପ୍ରତି ଲୋକଙ୍କ ଧାରଣା ଆଉ ପୂର୍ବ ଭଳି ନାହିଁ। ରିପୋର୍ଟରେ କୁହାଯାଇଛି ଯେ ପ୍ରାୟ ୨୦ ବର୍ଷ ମଧ୍ୟରେ ଏହା ପ୍ରଥମ ଥର ଯେ ଭାରତୀୟଙ୍କ ଆମେରିକା ପ୍ରତି ସକାରାତ୍ମକ ମତାମତରେ ଏତେ ଗୁରୁତ୍ୱପୂର୍ଣ୍ଣ ହ୍ରାସ ରେକର୍ଡ କରାଯାଇଛି। ୨୦୦୫ ରେ, ଯେତେବେଳେ ଆମେରିକା- ଇରାକ ଯୁଦ୍ଧ ଆରମ୍ଭ କରିଥିଲା ଏବଂ ବିଶ୍ୱବ୍ୟାପୀ ସମାଲୋଚନାର ସମ୍ମୁଖୀନ ହେଉଥିଲା, ସେତେବେଳେ ମଧ୍ୟ ଆମେରିକାର ଭାରତରେ ୭୧% ସକାରାତ୍ମକ ମୂଲ୍ୟାଙ୍କନ ଥିଲା। ବର୍ତ୍ତମାନ, ଏହି ଚିତ୍ର ପରିବର୍ତ୍ତନ ହେଉଥିବା ପରି ମନେ ହେଉଛି।
ସର୍ଭେରେ ଇସ୍ରାଏଲ ହେଉଛି ଆମେରିକା ଏବଂ ଟ୍ରମ୍ପ ଉଭୟଙ୍କ ପାଇଁ ସର୍ବାଧିକ ସମର୍ଥନ ପାଇଥିବା ଦେଶ। ସେଠାରେ ୮୧% ଲୋକ ଆମେରିକା ପ୍ରତି ସକାରାତ୍ମକ ମତ ରଖିଥିଲେ, ୬୬% କହିଛନ୍ତି ସେମାନେ ଟ୍ରମ୍ପଙ୍କ ଆନ୍ତର୍ଜାତୀୟ ନିଷ୍ପତ୍ତି ଉପରେ ବିଶ୍ୱାସ କରନ୍ତି। ତଥାପି, ଟ୍ରମ୍ପଙ୍କ ଟାରିଫ୍ ନୀତିକୁ ବିଶ୍ୱର ଅଧିକାଂଶ ଦେଶ ଭଲ ଭାବରେ ଗ୍ରହଣ କରିନଥିଲେ। କେବଳ ୧୮% ଏହି ନୀତିକୁ ସମର୍ଥନ କରିଥିଲେ। ୩୨% ଲୋକ ତାଙ୍କ ପ୍ରବାସ ନୀତିକୁ ଠିକ୍ ବୋଲି କହିଥିଲେ।
ସର୍ଭେରେ ୩୬ ଦେଶର ଲୋକଙ୍କୁ ଏହା ମଧ୍ୟ ପଚରାଯାଇଥିଲା ଯେ ଆମେରିକା ବୈଦେଶିକ ନୀତି ପ୍ରସ୍ତୁତ କରିବା ସମୟରେ ଅନ୍ୟ ଦେଶର ସ୍ୱାର୍ଥକୁ ବିଚାର କରେ କି? ଏହି ପ୍ରଶ୍ନର ଉତ୍ତର ମଧ୍ୟ କମ୍ ଉତ୍ସାହଜନକ ଥିଲା। ହାରାହାରି କେବଳ ୩୨% ଲୋକ କହିଛନ୍ତି ଯେ ଆମେରିକା ଅନ୍ୟ ଦେଶର ସ୍ୱାର୍ଥକୁ ବିଚାର କରେ। ଏହାର ଅର୍ଥ ହେଉଛି ଅଧିକାଂଶ ଲୋକ ବିଶ୍ୱାସ କରନ୍ତି ଯେ ବୈଦେଶିକ ନୀତି ପ୍ରସ୍ତୁତ କରିବା ସମୟରେ ଆମେରିକା ନିଜ ସ୍ୱାର୍ଥକୁ ପ୍ରାଥମିକତା ଦିଏ। ସେଭଳି ୟୁରୋପର ବହୁ ଦେଶରେ ଟ୍ରମ୍ପଙ୍କୁ ସବୁଠାରୁ କମ୍ ସମର୍ଥନ ମିଳିଛି। ଫ୍ରାନ୍ସ, ଜର୍ମାନୀ ଓ ଗ୍ରୀସ୍ ଭଳି ଦେଶରେ ଲୋକଙ୍କ ଭରସା କମ୍। ସେଭଳି ଜେରୁଜେଲମ୍ ଓ ପାଲେଷ୍ଟାଇନ ଭଳି ମୁସଲମାନ ଦେଶରେ ଟ୍ରମ୍ପଙ୍କ ପ୍ରତି ୪% ଲୋକ ଭରସା ପ୍ରକାଶ କରିଛନ୍ତି। ନେତନ୍ୟାହୁଙ୍କ ଉପରେ ୨% ଭରସା ଦେଖାଇଛନ୍ତି। ଏହା ତୁଳନାରେ ସେଠାର ପ୍ରତି ୧୦ ଜଣରୁ ୪ ଜଣ ଲୋକ ପୁଟିନ୍ ଓ ଚୀନ୍ ରାଷ୍ଟ୍ରପତି ଜିନ୍ପିଙ୍ଗ ଉପରେ ଭରସା ପ୍ରକାଶ କରିଛନ୍ତି।
