ଭବାନୀପାଟଣା/ଗୋଲାମୁଣ୍ଡା/ଜୁନାଗଡ,୨୦।୫: କଳାହାଣ୍ଡି ଜିଲ୍ଲାରେ ରବିଋତୁ ଧାନ କିଣା ଆରମ୍ଭ । ଆଜି ଗୋଲାମୁଣ୍ଡା ବ୍ଲକ୍ ଫରଙ୍ଗ, ଜୁନାଗଡ଼ ବ୍ଲକ୍ ଦାସୀ ଗାଁ ଓ ଭବାନୀପାଟଣା ବ୍ଲକ୍ କର୍ଲାପଡ଼ା ଠାରେ ଜିଲ୍ଲା ପ୍ରଶାସନ ପକ୍ଷରୁ ପୂର୍ବ ନିର୍ଦ୍ଧାରିତ ଅନୁଯାୟୀ, ରବି ଋତୁ ମଣ୍ଡି ଆରମ୍ଭ ହୋଇଛି । ଧର୍ମଗଡ଼ ଉପଜିଲ୍ଲାପାଳ ଧିମନ୍ ଚକମା ଓ ଭବାନୀପାଟଣା ଉପଜିଲ୍ଲାପାଳ ପ୍ରଭାତ ପରିଡ଼ା ମଣ୍ଡିଗୁଡ଼ିକର ଉଦଘାଟନ କରିଛନ୍ତି । ମଣ୍ଡିରେ କିପରି ଶୃଙ୍ଖଳା ସହିତ ଧାନ କିଣା ଯିବ ଏବଂ ଚାଷୀମାନେ ଯେପରି ହଇରାଣ ନ ହେବେ ସେ ବାବଦରେ ବିଭାଗୀୟ ଅଧିକାରୀମାନଙ୍କୁ ପରାମର୍ଶ ଦିଆଯାଇଛି ।
ତେବେ ଚଳିତ ଜିଲ୍ଲାର ୧୪୫ଟି ଧାନ ମଣ୍ଡିରେ ରବି ଧାନ ସଂଗ୍ରହ କରାଯିବ । ଧାନ ବିକ୍ରୟ ପାଇଁ ୪୮,୮୧୮ ଜଣ ଚାଷୀ ଅନଲାଇନ ମାଧ୍ୟମରେ ନିଜ ନାମ ପଞ୍ଜୀକରଣ କରିଛନ୍ତି । ୬୪ଟି ପାକ୍ସ ଓ ୨୫ଟି ସ୍ୱୟଂ ସହାୟକ ଗୋଷ୍ଠୀ ଧାନ ସଂଗ୍ରହ କରିବେ । ଜିଲ୍ଲାର ୮୮ଜଣ ମିଲର୍ସ ଟ୍ୟାଗ ହୋଇଥିବା ନେଇ ଜିଲ୍ଲାପାଳ ପାୱାର ସଚିନ୍ ପ୍ରକାଶ ସୂଚନା ଦେଇଛନ୍ତି। ଚଳିତ ରବି ଋତୁରେ ଏମଏସପି ସାଧାରଣ ଏଫଏକ୍ୟୁ ଧାନ କ୍ଵିଣ୍ଟାଲ ପିଛା ୨,୩୦୦ଟଙ୍କା ଏବଂ ଗ୍ରେଡ୍-ଏ ଏଫଏକ୍ୟୁ ଧାନ କ୍ଵିଣ୍ଟାଲ ପିଛା ୨,୩୨୦ ଟଙ୍କା ସହିତ ରାଜ୍ୟସରକାରଙ୍କ ବୋନସ୍ ୮୦୦ ଟଙ୍କା ମିଳିବ । ତେବେ ସର୍ବମୋଟ କ୍ଵିଣ୍ଟାଲ ପିଛା ଚାଷୀ ୩,୧୦୦ରୁ ୩,୧୨୦ ଟଙ୍କା ପାଇବେ ବୋଲି ସୂଚନା ଦିଆଯାଇଛି ।
ସେହିପରି ୮୮ ମିଲର୍ସଙ୍କ ମଧ୍ୟରୁ ଉଷୁନା ଚାଉଳ ପାଇଁ ୭୦ ଥିବାବେଳେ ଅରୁଆ ଚାଉଳ ପାଇଁ ୧୮ଟି ରହିଛି । ମିଲର୍ସ ଚାଷୀଙ୍କୁ ଆବଶ୍ୟକ ଗନିବ୍ୟାଗ ଯୋଗାଇ ଦେବେ । ଗ୍ରୀଷ୍ମ ପ୍ରବାହ ଲାଗି ରହିଥିବାରୁ ଚାଷୀଙ୍କ ସୁରକ୍ଷା ଦୃଷ୍ଟିରୁ ସମସ୍ତ ମଣ୍ଡିରେ ଆବଶ୍ୟକ ପାନୀୟ ଜଳ, ଓଆରଏସ ପ୍ୟାକେଟ, ଜରୁରୀକାଳୀନ ସେବାର ବ୍ୟବସ୍ଥା କରିବାକୁ ସମ୍ପୃକ୍ତ ବିଭାଗୀୟ ଅଧିକାରୀମାନକୁ ଜିଲ୍ଲାପାଳ ନିର୍ଦେଶ ଦେଇଛନ୍ତି ।
