ମାଲାଗା ୨୨/୧୧: ପୂର୍ବରୁ ନିଜ ନିଷ୍ପତ୍ତି ସଂପର୍କରେ ସମସ୍ତଙ୍କୁ ଜଣାଇ ସାରିଥିଲେ । ନିଜ ଘରୋଇ କୋର୍ଟରେ ଖେଳୁଥିଲେ ଡେଭିସ କପ୍ ଫାଇନାଲ୍ସର କ୍ୱାର୍ଟର ଫାଇନାଲ । ୧୧,୫୦୦ ଦର୍ଶକ, ସମସ୍ତେ ଥିଲେ ତାଙ୍କର ପ୍ରଶଂସକ ଓ ଶୁଭେଚ୍ଛୁ । କିନ୍ତୁ ତଥାପି ସେ ଥିଲେ ‘ନର୍ଭସ’ । ନେଦରଲାଣ୍ଡସର ଭନ ଡି ଜାଣ୍ଡସଚୁଲ୍ପଙ୍କ ଠାରୁ ଢେର ସାରା ଅଭିଜ୍ଞତାର ଅଧିକାରୀ ଥିଲେ ବି ସେ ଠିକ୍ରେ କୋର୍ଟରେ ରନ୍ କରିପାରୁ ନଥିଲେ । ହାତ ମୁଠାରେ ର୍ୟାକେଟ୍କୁ ଯେତେ ଶକ୍ତ କରି ଧରିଲେବି ତାହା ହୁଗୁଳା ହୋଇଯାଉଥିଲା । ଶେଷରେ ୪-୬, ୪-୬ରେ ପଛୁଆ ରହି ମ୍ୟାଚ୍ ପରାଜିତ ହେଲେ । ଏହି ପରାଜୟ ସହ ବିଶ୍ୱ ଟେନିସର ଅନ୍ୟତମ ଚଳନ୍ତି କିମ୍ବଦନ୍ତୀଙ୍କ କ୍ୟାରିୟରରେ ପଡ଼ିଥିଲା ପୂର୍ଣ୍ଣଚ୍ଛେଦ । ସେ ହେଉଛନ୍ତି ସ୍ପେନର ୩୮ ବର୍ଷୀୟ ୨୨ ଥର ଗ୍ରାଣ୍ଡ୍ସ୍ଲାମ ବିଜେତା ରାଫେଲ ନାଦାଲ ।
ଗତ ମଙ୍ଗଳବାର ରାତିରେ ସମସ୍ତେ ହୋଇ ପଡ଼ିଥିଲେ ଭାବବିହ୍ୱଳ । ମ୍ୟାଚ୍ ହାରିବା ପରେ ନାଦାଲଙ୍କ ଆଖିରେ ଲୁହ ଜକେଇ ଆସିଥିଲା । ହାତ ହଲାଇ ସେ ସମସ୍ତଙ୍କୁ ଧନ୍ୟବାଦ ଜଣାଇଥିଲେ । ପ୍ରଶଂସକ ଏବଂ ଶୁଭେଚ୍ଛୁମାନଙ୍କୁ ସମ୍ବୋଧନ କରି ସେ କହିଥିଲେ, ‘ଦୁଇ ଦଶନ୍ଧିର କ୍ୟାରିୟରରେ ମୋର ଭଲ ଓ ଖରାପ ସମୟରେ ଆପଣମାନେ ମୋ ସହ ରହିଛନ୍ତି । ମୋ ଶରୀର ଆଉ ମୋତେ ଖେଳିବାର ସୁଯୋଗ ଦେଉନି, ଯାହାକୁ ଆପଣମାନେ ଗ୍ରହଣ କରନ୍ତୁ । ମୁଁ ନିଜକୁ ଗୌରବାନ୍ୱିତ ମନେ କରୁଛି ଯେ ମୋର ରୁଚି ଓ ପେସାକୁ ନେଇ ଦୀର୍ଘ ବର୍ଷ ଚାଲିଲି ।’
ନାଦାଲ ନିଜର ବିଦାୟୀ ବକ୍ତବ୍ୟ ଦେଉଥାନ୍ତି । ପ୍ରଶଂସକ ରାଫା..ରାଫା..ରାଫା ଧ୍ୱନିରେ କମ୍ପାଉଥାନ୍ତି । ‘ଆଜି ମୋ ପାଇଁ ଭାବପ୍ରବଣତାର ଦିନ । ମ୍ୟାଚ୍ ଖେଳିବା ପୂର୍ବରୁ ‘ନର୍ଭସ’ ଅନୁଭବ କରୁଥିଲି । ମୁଁ ମୋର ଶ୍ରେଷ୍ଠ ଦେଇଛି । ମୋ ଖେଳକୁ ଉପଭୋଗ କରିଛି । ମୋର ଏହି ଯାତ୍ରାରେ ଆପଣମାନଙ୍କ ସହଯୋଗ ପାଇଁ ଧନ୍ୟବାଦ ଜଣାଉଛି ବୋଲି ନାଦାଲ କହିଥିଲେ । ଫ୍ରେଞ୍ଚ ଓପନରେ ସର୍ବାଧିକ ୧୪ ଥର ଚାମ୍ପିଅନ ହୋଇଥିଲେ ନାଦାଲ । ଏଥିସହ ଅଷ୍ଟ୍ରେଲିଆ ଓପନ ୨, ୱିମ୍ବଲଡନ ୨ ଏବଂ ୟୁଏସ୍ ଓପନରେ ୪ ଥର ଜିତିଥିଲେ । କ୍ୟାରିୟରରେ ସେ ମୋଟ୍ ୯୨ଟି ଟାଇଟଲ ଜିତିଥିଲେ ।
