ନୂଆଦିଲ୍ଲୀ: କେରଳର ଓ୍ଵାୟନାଡ ଲୋକସଭା ଆସନରେ ଉପନିର୍ବାଚନ ହେବାକୁ ଯାଉଛି । କଂଗ୍ରେସ ସାଂସଦ ରାହୁଲ ଗାନ୍ଧୀ ଏହି ଆସନ ଛାଡ଼ିବା ପରେ ଏଠାରେ ଉପନିର୍ବାଚନ ହେବ । ଏନେଇ ମୁଖ୍ୟ ନିର୍ବାଚନ କମିଶନର ତାରିଖ ଘୋଷଣା କରିସାରିଛନ୍ତି । ଏହା ପରେ କଂଗ୍ରେସ ଓ୍ଵାୟନାଡକୁ ନେଇ ବଡ଼ ରାଜନୈତିକ ଗୋଟି ଚଳାଇଛି । ସେଠାରେ ହେବାକୁ ଥିବା ଉପନିର୍ବାଚନରେ ଦଳ ସାଧାରଣ ସଂପାଦକ ପ୍ରିୟଙ୍କା ଗାନ୍ଧୀ ଭଦ୍ରାଙ୍କୁ ପ୍ରାର୍ଥୀ କରିଛି । ମଙ୍ଗଳବାର ସନ୍ଧ୍ୟାରେ ଏଆଇସିସି ପକ୍ଷରୁ ଏନେଇ ଘୋଷଣା କରାଯାଇଛି । ଏହା ସହ ପ୍ରିୟଙ୍କା ଗାନ୍ଧୀ ପ୍ରଥମ ଥର ନିର୍ବାଚନ ରାଜନୀତିକୁ ଓହ୍ଲାଇବା ସ୍ପଷ୍ଟ ହୋଇଯାଇଛି ।
ଏହା ପୂର୍ବରୁ ଏହି ଆସନରେ ପ୍ରିୟଙ୍କାଙ୍କ ଭାଇ ରାହୁଲ ଗାନ୍ଧୀ ସାଂସଦ ଥିଲେ। ଲୋକସଭା ନିର୍ବାଚନ ୨୦୨୪ରେ ରାହୁଲ ଓ୍ଵାୟନାଡ ଓ ରାୟବରେଲୀ ଦୁଇ ସଂସଦୀୟ କ୍ଷେତ୍ରରୁ ନିର୍ବାଚନ ଲଢିଥିଲେ । ଦୁଇ ଆସନରୁ ସେ ବିଜୟ ଲାଭ କରିଥିଲେ । କିନ୍ତୁ ନିୟମ ଅନୁସାରେ ତାଙ୍କୁ ଗୋଟିଏ ଆସନ ଛାଡ଼ିବାକୁ ପଡ଼ିଥିଲା । ତେଣୁ ସେ ଓ୍ଵାୟନାଡ ଆସନ ଛାଡ଼ି ମା’ ସୋନିଆ ଗାନ୍ଧୀଙ୍କ ପାରମ୍ପାରିକ ଆସନ ରାୟବରେଲୀକୁ ନିଜ ପାଖରେ ରଖିବାକୁ ନିଷ୍ପତ୍ତି ନେଇଥିଲେ। ରାହୁଲ ଏଥିପାଇଁ ରାୟବରେଲୀ ଆସନକୁ ଚୟନ କଲେ କାରଣ ଏହି ନିର୍ବାଚନ କ୍ଷେତ୍ରରେ କଂଗ୍ରେସର ମଜଭୁତ ଇତିହାସ ରହିଛି । ଦଳ ୧୯୭୭, ୧୯୯୬ ଓ ୧୯୯୮କୁ ଛାଡ଼ି ବାକି ସମସ୍ତ ଲୋକସଭା ନିର୍ବାଚନରେ ଏଠାରୁ ବିଜୟ ଲାଭ କରିଛି ।
ଓ୍ଵାୟନାଡ ଆସନରୁ ପ୍ରିୟଙ୍କା ଗାନ୍ଧୀ ଭଦ୍ରା ଉପନିର୍ବାଚନ ଲଢ଼ିବେ । ସେହିଭଳି ଦୁଇଟି ବିଧାନସଭା ଆସନରେ ହେବାକୁ ଥିବା ଉପନିର୍ବାଚନ ଲାଗି କଂଗ୍ରେସ ପ୍ରାର୍ଥୀଙ୍କ ନାମ ଘୋଷଣା କରିଛି । ପାଲକ୍କଡ ଆସନରୁ ରାହୁଲ ମାମକୁତାଥିଲ ଏବଂ ଚେଲ୍ଲାକାକରାରୁ ରାମ୍ୟା ହରିଦାସଙ୍କୁ ପ୍ରାର୍ଥୀ କରିଛି କଂଗ୍ରେସ । ତେବେ କେରଳର ୩ ବିଧାନସଭା ଏବଂ ଓ୍ଵାୟନାଡ ଲୋକସଭା ଆସନରେ ନଭେମ୍ବର ୧୩ରେ ଉପନିର୍ବାଚନ ଅନୁଷ୍ଠିତ ହେବ ।
