ପାଟନା: ବିହାରରେ ମହାମେଣ୍ଟର ମୁଖ୍ୟମନ୍ତ୍ରୀ ଚେହେରାକୁ ନେଇ ସସପେନ୍ସ ଲାଗି ରହିଛି । ରାହୁଲ ଗାନ୍ଧୀ ମଧ୍ୟ ଏହି ପ୍ରସଙ୍ଗରେ ସ୍ପଷ୍ଟ ଭାବରେ କିଛି ସୂଚନା ଦେଇନାହାନ୍ତି । ଏହାର ମଧ୍ୟରେ ଆରାରେ 'ଭୋଟର ଅଧିକାର ଯାତ୍ରା' ମଞ୍ଚରୁ ତେଜସ୍ୱୀ ଯାଦବ ରାହୁଲ ଗାନ୍ଧୀଙ୍କ ସମ୍ମୁଖରେ ନିଜକୁ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବରେ ପ୍ରୋଜେକ୍ଟ କରିଛନ୍ତି । ଉତ୍ତର ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ତେଜସ୍ୱୀଙ୍କ କଥାକୁ ସମର୍ଥନ କରିଛନ୍ତି । ତେଜସ୍ୱୀ ଯାଦବ ମଞ୍ଚ ସମ୍ମୁଖରେ ଛିଡ଼ା ହୋଇଥିବା ଲୋକଙ୍କୁ ପଚାରିଛନ୍ତି ଯେ, ସେମାନେ ଡୁପ୍ଲିକେଟ ମୁଖ୍ୟମନ୍ତ୍ରୀ ଚାହାଁନ୍ତି ନା ଅରିଜିନାଲ୍ । ସେପଟେ ତେଜସ୍ୱୀଙ୍କ ଏହି ମନ୍ତବ୍ୟକୁ ବିଜେପି କଟାକ୍ଷ କରିଛି । ଏହାକୁ ମୁଙ୍ଗେରିଲାଲକେ ହସିନ ସପନେ ବୋଲି କହିଛି ବିଜେପି । ବିଜେପି କହିଛି ଯେ, ରାହୁଲ ଗାନ୍ଧୀ ତେଜସ୍ୱୀଙ୍କ ନାମକୁ ସମର୍ଥନ କରୁନାହାନ୍ତି। ମହାମେଣ୍ଟରେ ତେଜସ୍ୱୀଙ୍କ ନାମ ଉପରେ କୌଣସି ସହମତି ନାହିଁ ।
ଆରାରେ 'ଭୋଟର ଅଧିକାର ଯାତ୍ରା' ସମୟରେ ତେଜସ୍ୱୀ ଯାଦବ ଏନଡିଏ ସରକାରଙ୍କୁ ଟାର୍ଗେଟ କରିଛନ୍ତି । ସେ କହିଛନ୍ତି ଯେ, ଏହି ସରକାର ନକଲି । ତେଜସ୍ୱୀ ତାଙ୍କଠାରୁ ଆଗରେ ଅଛନ୍ତି ଏବଂ ସରକାର ତାଙ୍କ ପଛେ ପଛେ ଚାଲୁଛି । ଏହା ସହ ସେ ପଚାରିଛନ୍ତି ଯେ, ଜନତା ଡୁପ୍ଲିକେଟ ନା ଅରିଜିନାଲ୍ ମୁଖ୍ୟମନ୍ତ୍ରୀ ଚାହୁଁଛନ୍ତି ? ଆରାରେ ଭୋଟର ଅଧିକାର ଯାତ୍ରାର ୧୪ତମ ଦିନରେ ତେଜସ୍ୱୀ ଯାଦବ ନିଜକୁ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବରେ ଘୋଷଣା କରିଛନ୍ତି । ତେଜସ୍ୱୀଙ୍କ ବୟାନ ଉପରେ ବିହାର ବିଜେପି ମୁଖପାତ୍ର ପ୍ରେମ ରଞ୍ଜନ ପଟେଲ କହିଛନ୍ତି ଯେ, ତେଜସ୍ୱୀ ମୁଙ୍ଗେରିଲାଲଙ୍କ ପରି ସ୍ୱପ୍ନ ଦେଖୁଛନ୍ତି। ସେ ନିଜକୁ ମୁଖ୍ୟମନ୍ତ୍ରୀ ଭାବରେ ପ୍ରୋଜେକ୍ଟ କରୁଛନ୍ତି କିନ୍ତୁ ରାହୁଲ ଗାନ୍ଧୀ ତାଙ୍କ ନାମକୁ ସମର୍ଥନ କରୁନାହାନ୍ତି ।
ରୋହତାସ ଜିଲ୍ଲାର ସାସାରାମରୁ ଆରମ୍ଭ ହୋଇଥିବା ଭୋଟର ଅଧିକାର ଯାତ୍ରା ୧୪ ତମ ଦିନରେ ଆରାରେ ପହଞ୍ଚିଥିଲା। ତେଜସ୍ୱୀଙ୍କ ସହିତ ରାହୁଲ ଏବଂ ଅଖିଳେଶ ଯାଦବ ମଧ୍ୟ ଥିଲେ। ମହାମେଣ୍ଟର ନେତା ଆରାରେ ଏକ ସାଧାରଣ ସଭା କରିଥିଲେ । ଏହି ସଭାରେ ଲୋକଙ୍କ ପ୍ରବଳ ଭିଡ଼ ଲାଗିଥିଲା । ତେଜସ୍ୱୀ ଏନଡିଏ ସରକାର ବିହାର ଉପରେ ଖରାପ ନଜର ପକାଇଥିବା ଅଭିଯୋଗ କରିଛନ୍ତି । ସେ କହିଛନ୍ତି ଯେ, ସେମାନଙ୍କର କୌଣସି ରୋଡମ୍ୟାପ୍ ନାହିଁ ଏବଂ ସେମାନେ କେବଳ ମହାମେଣ୍ଟର ନକଲ କରୁଛନ୍ତି । ସେମାନଙ୍କର କୌଣସି ଦୃଷ୍ଟିକୋଣ ନାହିଁ। ଆରାରେ ପହଞ୍ଚି ରାହୁଲ ଗାନ୍ଧୀ କହିଛନ୍ତି, ‘ସେମାନେ (ବିଜେପି) ମହାରାଷ୍ଟ୍ର, ହରିୟାଣାରେ ନିର୍ବାଚନ ଚୋରି କରିଛନ୍ତି । ଲୋକସଭା ନିର୍ବାଚନରେ ଭୋଟ ଚୋରି କରିଛନ୍ତି । କିନ୍ତୁ ଆମେ ସେମାନଙ୍କୁ ବିହାର ନିର୍ବାଚନ ଚୋରି କରିବାକୁ ଦେବୁ ନାହିଁ।'
ଚଳିତ ବର୍ଷ ଅକ୍ଟୋବର-ନଭେମ୍ବରରେ ବିହାରରେ ବିଧାନସଭା ନିର୍ବାଚନ ହେବାକୁ ଯାଉଛି। ସମାଜବାଦୀ ପାର୍ଟି ସୁପ୍ରିମୋ ଏବଂ ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ 'ଭୋଟର ଅଧିକାର ଯାତ୍ରା'କୁ ସମ୍ବୋଧିତ କରିବା ସମୟରେ ନିର୍ବାଚନ କମିଶନ ଉପରେ ପ୍ରଶ୍ନ ଉଠାଇଛନ୍ତି । ସେ କହିଛନ୍ତି, ‘ଆମେ, ଆପଣ ଏବଂ ସମସ୍ତେ ଆଶା କରିଥିଲୁ ନିର୍ବାଚନ କମିଶନ ନିରପେକ୍ଷ ଭାବରେ କାମ କରିବ। ଏହା ଆମର ଭୋଟ ଦେବାର ଅଧିକାରକୁ ସୁରକ୍ଷା ଦେବ, ସମ୍ବିଧାନକୁ ସୁରକ୍ଷା ଦେବ । କିନ୍ତୁ କମିଶନ ଯେପରି ବିଜେପି ସହିତ ମିଶି କାମ କରୁଛି, ସେଥିରୁ ଜଣାପଡ଼ୁଛି ଏହା ନିର୍ବାଚନ କମିଶନ ନୁହେଁ ବରଂ ବିଜେପି ଏହାକୁ 'ଜୁଗାଡ଼ କମିଶନ' କରିଛି । ଅଖିଳେଶ କହିଛନ୍ତି ଯେ, ତେଜସ୍ୱୀ ଯାଦବ ଯୁବକମାନଙ୍କୁ ଚାକିରି ଏବଂ ନିଯୁକ୍ତି ଯୋଗାଇବା ପାଇଁ କାମ କରିଛନ୍ତି। ତେଜସ୍ୱୀ କ୍ଷମତାକୁ ଆସିଲେ ବେକାରୀଙ୍କ ପ୍ରବାସ ହେବ ନାହିଁ ବରଂ ବିଜେପିର ପ୍ରବାସ ହେବ।’
