ବ୍ରହ୍ମପୁର,୧୬/୧୦: ଆକ୍ସନ ମୋଡ଼ରେ ବ୍ରହ୍ମପୁର ପୋଲିସ । ବ୍ରହ୍ମପୁର ଥାନା ଅନ୍ତର୍ଗତ ଅନ୍ୟ ଥାନା ଗୁଡ଼ିକର ସହାୟତାରେ ବିଭିନ୍ନ ଅଞ୍ଚଳରେ ଚଢାଉ କରି ୧୭ ଟି ଜୁଆ ମାମଲା ରୁଜୁ କରିଛି ପୋଲିସ । ଏଥିରେ ୧୦୨ ଜଣ ବ୍ୟକ୍ତି ଗିରଫ ହୋଇଛନ୍ତି । ଏହା ସହ ୭୫ ଟି ମୋବାଇଲ ଫୋନ୍, ୨୩ ଟି ବାଇକ୍ ଏବଂ ୬,୦୭,୯୬୦ ଟଙ୍କା ମଧ୍ୟ ଜବତ କରାଯାଇଛି । ଗଞ୍ଜାମ ଜିଲ୍ଲା ବ୍ରହ୍ମପୁର ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ବ୍ରହ୍ମପୁର ଅଞ୍ଚଳରେ ବଢିବାରେ ଲାଗିଛି ଜୁଆ ଆଡ୍ଡା । ଜୁଆ ଖେଳାଳୀଙ୍କୁ ଦମନ କରିବା ପାଇଁ ବିଗତ ୧୦ ଦିନରେ ବ୍ରହ୍ମପୁର ପୋଲିସ ଏଭଳି ପଦକ୍ଷେପ ନେଇଥିଲା । ଅନ୍ୟ ଥାନା ଗୁଡ଼ିକର ସହାୟତାରେ ବ୍ରହ୍ମପୁର ପୋଲିସ ବିଭିନ୍ନ ସ୍ଥାନରେ ବାରମ୍ୱାର ଚଢାଉ କରିଥିଲା । ଏହି ଚଢାଉରେ ଗୋଳନ୍ଥରା ପୋଲିସ ୬ ଟି ମାମଲା, ଗୋପାଳପୁର ପୋଲିସ ୨ ଟି ଏବଂ ବିଏନପୁର ପୋଲିସ ୨ ଟି ମାମଲା ରୁଜୁ କରିବା ସହ ସଦର ପୋଲିସ ୨ଟି ଏବଂ ଗୋସାନିନୁଗାଁ ପୋଲିସ ୨ଟି ମାମଲା ରୁଜୁ କରିଥିଲା । ଏହା ସହ ନିମଖଣ୍ଡି ପୋଲିସ ଗୋଟିଏ, ଦିଗପହଣ୍ଡି ପୋଲିସ ଗୋଟିଏ ଏବଂ ବଡ଼ବଜାର ପୋଲିସ ଗୋଟିଏ ମାମଲା ରୁଜୁ କରିଥିଲା । ତେବେ ଏହି ଚଢାଉରେ ମୋଟ ୧୦୨ ଜଣ ବ୍ୟକ୍ତି ଗିରଫ ହୋଇଛନ୍ତି ।
