ମୁମ୍ବାଇ: ଶିଳ୍ପା ଶେଟ୍ଟୀଙ୍କ ସ୍ୱାମୀ ଏବଂ ପ୍ରସିଦ୍ଧ ବ୍ୟବସାୟୀ ରାଜ କୁନ୍ଦ୍ରାଙ୍କ ସମସ୍ୟା ବଢ଼ିବାରେ ଲାଗିଛି । ୬୦ କୋଟି ଟଙ୍କାର ଠକେଇ ମାମଲା ଆହୁରି ଜଟିଳ ହେଉଛି। ଏବେ ରିପୋର୍ଟ ଆସିଛି ଯେ, ଏହି ଟଙ୍କାର କିଛି ଅଂଶ ଚଳଚ୍ଚିତ୍ର ପ୍ରଯୋଜକ ଏକତା କପୁର, ଅଭିନେତ୍ରୀ ବିପାଶା ବସୁ ଏବଂ ନେହା ଧୂପିଆଙ୍କ ଆକାଉଣ୍ଟକୁ ଯାଇଛି । ଏହି ମାମଲାରେ ମୁମ୍ବାଇ ପୁଲିସର ଅର୍ଥନୈତିକ ଅପରାଧ ଶାଖା ଖୁବଶୀଘ୍ର ଏକତା କପୁର, ବିପାଶା ବସୁ ଏବଂ ନେହା ଧୂପିଆଙ୍କୁ ନୋଟିସ୍ ଜାରି କରି ପଚରାଉଚରା ପାଇଁ ଡାକିବ । ନୋଟିସ୍ ଜାରି କରି ମୁମ୍ବାଇ ପୁଲିସ ଟଙ୍କା କାରବାର ସମ୍ପର୍କରେ ଜାଣିବାକୁ ଚାହିଁବ ।
ବ୍ୟବସାୟୀ ଦୀପକ କୋଠାରୀ ଅଭିଯୋଗ କରିଥିଲେ, ଶିଳ୍ପା ଶେଟ୍ଟୀ ଏବଂ ରାଜ କୁନ୍ଦ୍ରା ତାଙ୍କ ପାଖରୁ ୬୦ କୋଟି ଟଙ୍କା ଠକି ନେଇଛନ୍ତି । ଏହା ପରଠାରୁ ଶିଳ୍ପା ଏବଂ ରାଜ୍ଙ୍କ ଅଡ଼ୁଆ ବଢ଼ିବାରେ ଲାଗିଛି । ଏହି ମାମଲାରେ ଅର୍ଥନୈତିକ ଅପରାଧ ଶାଖା କୁନ୍ଦ୍ରାଙ୍କ କମ୍ପାନୀର ଆର୍ଥିକ କାରବାରର ତଦନ୍ତ କରୁଛି । ଅଭିଯୋଗକାରୀଙ୍କ ଅଭିଯୋଗ ଅନୁଯାୟୀ, ପାଣ୍ଠିର ଅପବ୍ୟବହାର ହୋଇଛି କି ନାହିଁ ତାହା ଜାଣିବାକୁ ତଦନ୍ତ ଜାରି ରହିଛି । ଚଳିତ ସପ୍ତାହରେ, ରାଜ କୁନ୍ଦ୍ରାଙ୍କୁ ଏହି ମାମଲାରେ ପ୍ରାୟ ପାଞ୍ଚ ଘଣ୍ଟା ଜେରା କରାଯାଇଥିଲା । ଏହି ସମୟରେ ସେ ଆର୍ଥିକ କାରବାର ସଂପର୍କରେ ସ୍ୱୀକାର କରିଥିଲେ । ଏହି ପଚରାଉଚରା ସମୟରେ, ନେହା, ଏକତା ଏବଂ ବିପାଶାଙ୍କ ନାଁ ସାମ୍ନାକୁ ଆସିଛି ।
ବେଷ୍ଟ ଡିଲ୍ ଟିଭି ଏକ ଇ-କମର୍ସ ପ୍ଲାଟଫର୍ମ ଥିଲା, ଯାହା ଟେଲିଭିଜନ ସେଲିବ୍ରିଟିଙ୍କ ଦ୍ୱାରା ବିଭିନ୍ନ ଉତ୍ପାଦ ବିକ୍ରି କରୁଥିଲା। ତଦନ୍ତରୁ ଜଣାପଡିଛି ଯେ, ଅନେକ ବଲିଉଡ୍ ଷ୍ଟାର ଚ୍ୟାନେଲରେ ସେମାନଙ୍କର ଉତ୍ପାଦର ପ୍ରଚାର କରୁଥିଲେ । କମ୍ପାନୀଠାରୁ ସେମାନଙ୍କୁ ଟଙ୍କା ମିଳୁଥିଲା । ଅର୍ଥନୈତିକ ଅପରାଧ ଶାଖା ଏବେ ଏହି ସେଲିବ୍ରିଟିଙ୍କଠାରୁ ଜାଣିବାକୁ ଚାହୁଁଛି ଯେ, ସେମାନଙ୍କୁ କେଉଁ କାମ ପାଇଁ କେତେ ଟଙ୍କା ଦିଆଯାଇଥିଲା । ଏହି ମାମଲାରେ, ମୁମ୍ବାଇ ପୁଲିସ ରାଜ କୁନ୍ଦ୍ରା ଏବଂ ଶିଳ୍ପା ଶେଟ୍ଟୀଙ୍କ ବିରୁଦ୍ଧରେ ଲୁକ୍ ଆଉଟ୍ ନୋଟିସ୍ ଜାରି କରିଛି । ଫଳରେ ସେମାନଙ୍କ ପାଇଁ ଦେଶ ବାହାରକୁ ଯାତ୍ରା କରିବା କଷ୍ଟକର ହୋଇପଡ଼ି ।
