ଭୁବନେଶ୍ୱର ୧୦/୦୬: ‘ବନସ୍ତେ ଡାକିଲା ଗଜ, ବରଷକେ ଥରେ ଆସିଛି ରଜ’ ଗୀତରେ ପ୍ରକମ୍ପିତ ହେବ ରାଜଧାନୀର ଉପକଣ୍ଠଠୁ ସହରାଞ୍ଚଳ । କିଏ ଏହି ଗୀତର ତାଳେ ତାଳେ ଦୋଳିରେ ଝୁଲିବେ ତ କିଏ ରିଲ୍ସ କରିବେ । କାରଣ ଆଉ ସପ୍ତାହେ ପରେ ଓଡ଼ିଶାର ଗଣପର୍ବ ‘ରଜ’ । ସେଥିପାଇଁ ଆରମ୍ଭ ହୋଇଗଲାଣି ଜୋରଦାର୍ ପ୍ରସ୍ତୁତି । କିଏ ନୂଆ ପୋଷାକ କିଣିବାରେ ବ୍ୟସ୍ତ ତ କିଏ ପ୍ରସାଧନ ସାମଗ୍ରୀ । ବିଭିନ୍ନ ଅନୁଷ୍ଠାନ ପକ୍ଷରୁ ଆୟୋଜିତ ହେଉଥିବା ରଜ ମହୋତ୍ସର ପ୍ରସ୍ତୁତି ମଧ୍ୟ ଶେଷ ସ୍ପର୍ଶ ଛୁଇଁଲାଣି ।
ଜାଗମରା ରଜ ମହୋତ୍ସବ
ଜାଗମରା ସ୍ଥିତ କେସିଏ କ୍ରିକେଟ୍ ଗ୍ରାଉଣ୍ଡ୍ରେ ଧୁମ୍ଧାମ୍ରେ ପାଳନ ହେବ ରଜ ମହୋତ୍ସବ । ସେଥିପାଇଁ ସପ୍ତାହେ ପୂର୍ବରୁ ଆରମ୍ଭ ହୋଇଗଲାଣି ପ୍ରସ୍ତୁତି । ‘ଜୟଦେବ ଯୁବକ ସଂଘ’ ଓ ‘ବିଶ୍ୱ’ ମିଳିତ ଆନୁକୂଲ୍ୟରେ ହେଉଥିବା ଏହି ରଜ ମହୋତ୍ସବ ୫ ବର୍ଷରେ ପହଁଚିଛି । ୧୪ ରୁ ୧୬ ଜୁନ୍ ପର୍ଯ୍ୟନ୍ତ ଉତ୍ସବ ଚାଲିବ । ଏଠାରେ ବିଶେଷ ଆକର୍ଷଣ ରହିବ ସନ୍ଧ୍ୟାରେ ଆୟୋଜିତ ହେବାକୁ ଥିବା ସାଂସ୍କୃତିକ କାର୍ଯ୍ୟକ୍ରମ । ୧୪ ତାରିଖରେ କଣ୍ଠଶିଳ୍ପୀ ସ୍ୱୟଂ ପାଢୀ ଓ ସାଥୀ, ୧୫ରେ କଣ୍ଠଶିଳ୍ପୀ ସୁଜ୍ଞାନୀ ମହାପାତ୍ର ଓ ୧୬ରେ ଅସୀମା ପଣ୍ଡା ସଙ୍ଗୀତ ପରିବେଷଣ କରିବାର କାର୍ଯ୍ୟକ୍ରମ ରହିଛି । ଏଠାରେ ୩୦ଟି ଦୋଳି ସହ ରାମଦୋଳି, ମୀନାବଜାର, ପାନ, ପିଠା ଷ୍ଟଲ ଲାଗିବ । ତରୁଣୀମାନଙ୍କ ମଧ୍ୟରେ ପୂଚି, ଝୋଟି, ମେହେନ୍ଦି, ମ୍ୟୁଜିକ୍ ଚେୟାର, ତାସ ଭଳି ପ୍ରତିଯୋଗିତା ହେବ । ଏହି ଅବସରରେ ଖଣ୍ଡଗିରି ହାଇସ୍କୁଲ ଓ ସରସ୍ୱତୀ ଶିଶୁ ମନ୍ଦିରରେ ଏ-୧ ଗ୍ରେଡ୍ ପାଇଥିବା ୫ ମାଟ୍ରିକ୍ ପରୀକ୍ଷାର୍ଥୀଙ୍କୁ ସମ୍ବର୍ଦ୍ଧନା ଦେବା ସହ ୧୦ ହଜାର ଟଙ୍କା ଆର୍ଥିକ ସହାୟତା ପ୍ରଦାନ କରାଯିବ ବୋଲି ଅନୁଷ୍ଠାନର ମୁଖ୍ୟ ହିମାଂଶୁ ଶେଖର ଛୋଟରାୟ କହିଛନ୍ତି ।
ପାତ୍ରପଡ଼ାରେ ଲାଗିବ ୧୨୫ ଦୋଳି
ମହାରାଜା କ୍ରିକେଟ୍ ଆସୋସିଏସନ୍ ଓ ପାତ୍ରପଡ଼ା ଭଗବାନପୁର ଯୁବ ବାହିନୀ ମିଳିତ ଆନୁକୂଲ୍ୟରେ ପାଳିତ ହେବ ୧୬ତମ ପାତ୍ରପଡ଼ା ରଜ ମହୋତ୍ସବ । ଏଥିରେ ମୁଖ୍ୟ ଆକର୍ଷଣ ରହିବ ୧୨୫ଟି ଦୋଳି । ଏହି ଉତ୍ସବ ୧୪ରୁ ୧୭ ଜୁନ୍ ପର୍ଯ୍ୟନ୍ତ ପାଳିତ ହେବ । ଏଥିରେ ରାଧାକୃଷ୍ଣଙ୍କ ସ୍ୱତନ୍ତ୍ର ଦୋଳି ମଧ୍ୟ ରହିବ । ନିମନ୍ତ୍ରିତ ଅତିଥିମାନେ ପ୍ରଥମେ ରାଧାକୃଷ୍ଣଙ୍କୁ ଦୋଳି ଖେଳାଇବେ । ଏଥିସହ ତରୁଣୀମାନଙ୍କ ମଧ୍ୟରେ ପୋଡ଼ପିଠା, ପୂଚି, ହୁଳହୁଳି, ଦଉଡ଼ି ଡିଆଁ, ମୁରୁଜ ପ୍ରତିଯୋଗିତା ଆୟୋଜିତ ହେବ । ପୁଅମାନଙ୍କ ମଧ୍ୟରେ ତାସ୍, ଚେସ୍ ଓ ଭଲିବଲ୍ ପ୍ରତିଯୋଗିତା ହେବ । ପ୍ରତି ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହେବ । ମୀନାବଜାର ପଡ଼ିବ । ଯେଉଁଠାରେ ବିଭିନ୍ନ ପ୍ରକାର ଷ୍ଟଲ ଶୋଭାପାଇବ ବୋଲି ଆସୋସିଏସନ୍ର ସମ୍ପାଦକ ରବିନ୍ଦ୍ର ନାଥ ସାହୁ କହିଛନ୍ତି ।
ଅଧିକ ପଢ଼ନ୍ତୁ :- Kalahandi NH-26 Accident : ଟ୍ରକ ଧକ୍କାରେ ୨ ଡ୍ରାଇଭର ମୃତ, ରାସ୍ତାକଡ଼ରେ ଠିଆ ହୋଇଥିବା ବେଳେ ଚଢିଗଲା ୧୬ ଚକିଆ
