ନୂଆଦିଲ୍ଲୀ,୦୭/୦୯: ଇନ୍ଦୋର ବ୍ୟବସାୟୀ ରାଜା ରଘୁବଂଶୀ ହତ୍ୟା ଘଟଣାର ୯୭ ଦିନ ପରେ ମେଘାଳୟ ପୁଲିସ ୭୯୦ ପୃଷ୍ଠାର ଚାର୍ଜସିଟ୍ ଦାଖଲ କରିଛି । ପୁଲିସ ଏସ୍ଆଇଟି ପକ୍ଷରୁ ସିଲଂର ସୋହରା ସବ୍ଡିଭିଜନାଲ ମାଜିଷ୍ଟ୍ରେଟଙ୍କ କୋର୍ଟରେ ଦାଖଲ କରାଯାଇଥିବା ଏହି ଚାର୍ଜସିଟ୍ରେ ରାଜାଙ୍କ ପତ୍ନୀ ସୋନମ ଓ ଅନ୍ୟ ୭ ଜଣଙ୍କ ନାମ ସ୍ଥାନ ପାଇଛି । ମେଘାଳୟ ପୁଲିସ ଶୁକ୍ରବାର ରାତିରେ ଏହି ସୂଚନା ଦେଇଛି ।
ଚାର୍ଜସିଟ୍ରେ ସୋନମ ଓ ତାଙ୍କ ପ୍ରେମିକ ରାଜ କୁଶୱାହଙ୍କ ସମେତ ୫ ଜଣଙ୍କ ନାମରେ ହତ୍ୟା, ଅପରାଧ ଷଡଯନ୍ତ୍ର ଓ ପ୍ରମାଣ ନଷ୍ଟ ଆଦି ମାମଲା ରହିଛି । ସେମାନେ ଏବେ ଜେଲ୍ରେ ଅଛନ୍ତି । ଅନ୍ୟ ୩ ଅଭିଯୁକ୍ତ ହେଲେ ଆକାଶ ରାଜପୁତ, ବିଶାଳ ଚୌହାନ ଓ ଆନନ୍ଦ କୁର୍ମୀ । ଏହି ୩ ଜଣ ହେଉଛନ୍ତି କଣ୍ଟ୍ରାକ୍ଟର କିଲର । ସୋନମ ଓ ରାଜ୍ଙ୍କ ପରାମର୍ଶରେ ସେମାନେ ରାଜା ରଘୁବଂଶୀଙ୍କ ପିଛା କରି ମେଘାଳୟ ଯାଇଥିଲେ ଏବଂ ସେଠାରେ ହତ୍ୟା କରିଥିଲେ । ସେହିଭଳି ଅନ୍ୟ ୩ ଜଣ ଯଥା ପ୍ରପର୍ଟି ଡିଲର ସିଲୋମ ଜେମ୍ସ, ଲୋକେନ୍ଦ୍ର ତୋମାର ଓ ସିକ୍ୟୁରିଟି ଗାର୍ଡ ବଲବୀରଙ୍କ ନାମରେ ପ୍ରମାଣ ନଷ୍ଟ ଓ ତାକୁ ଲୁଚାଇବା ଅଭିଯୋଗ ରହିଛି । ଏହି ୩ ଜଣଙ୍କୁ ଜାମିନ ମିଳିସାରିଛି।
ରାଜା ରଘୁବଂଶୀଙ୍କ ବିବାହ ମେ ୧୧ ତାରିଖରେ ସୋନମଙ୍କ ସହ ହୋଇଥିଲା । ମେ ୨୦ରେ ରାଜା ଓ ସୋନମ ହନିମୁନ ପାଇଁ ମେଘାଳୟ ଯାଇଥିଲେ । ୨୨ ତାରିଖରେ ସେମାନେ ସିଲଂରେ ପହଞ୍ଚିବା ପରେ ସେଠାରୁ ଏକ ସ୍କୁଟର ଭଡାରେ ନେଇ ସୋହରା ଅଭିମୁଖେ ଯାତ୍ରା କରିଥିଲେ । ମେ ୨୪ରେ ରାଜା ଓ ସୋନମଙ୍କ ସହିତ ପରିବାର ଲୋକଙ୍କ ସମ୍ପର୍କ ସମ୍ଭବ ହୋଇନଥିଲା । ମେ ୨୭ରେ ଉଭୟଙ୍କ ତଲାସୀ ଅଭିଯାନ ଆରମ୍ଭ ହୋଇଥିଲା । ଜୁନ ୨ ତାରିଖରେ ଏକ ଗଭୀର ଖାତରୁ ରାଜାଙ୍କ ମୃତଦେହ ମିଳିଥିଲା । କିନ୍ତୁ ସୋନମଙ୍କର କୌଣସି ପତ୍ତା ମିଳି ନଥିଲା । ଜୁନ ୩ରେ ରାଜାଙ୍କ ଶବ ବ୍ୟବଚ୍ଛେଦ ରିପୋର୍ଟ ମିଳିଥିଲା । ଯେଉଁଥିରେ ତାଙ୍କୁ କୁରାଢ଼ିରେ ହାଣି ହତ୍ୟା କରାଯାଇଥିବା ସ୍ପଷ୍ଟ ହୋଇଥିଲା । ଜୁନ ୯ରେ ସୋନମ ୟୁପିର ଗାଜିପୁରସ୍ଥିତ ଏକ ଢ଼ାବାରୁ ମିଳିଥିଲେ । ତାଙ୍କୁ ପଚରାଉଚୁରା କରାଯିବା ପରେ ହତ୍ୟାକାଣ୍ଡର ପର୍ଦ୍ଦାଫାସ ହୋଇଥିଲା ଏବଂ ପୁଲିସ ଜଣଙ୍କ ପରେ ଜଣେ ସବୁ ଅଭିଯୁକ୍ତଙ୍କୁ ଗିରଫ କରିଥିଲା ।
