ରାଜସ୍ଥାନ, ୧୩।୮: ଅତ୍ୟନ୍ତ ଦୁଃଖର ସହ ସୂଚିତ କରୁଛୁ ଯେ, ଭେରୁଲାଲ ଜୋଶୀଙ୍କ ସୁପୁତ୍ରୀ ଶ୍ରୀମତୀ ପୂଜା ବାଇର ବିବାହ ସଞ୍ଜୟ ତିୱାଡ଼ୀଙ୍କ ସୁପୁତ୍ର ଭମ୍ୱର ତିୱାଡ଼ୀଙ୍କ ସହ ୨୫.୪.୨୦୨୫ ତାରିଖରେ ବିବାହ ହୋଇଥିଲା । ବିବାହ ପରେ ଦିନାଙ୍କ ୨୯.୭.୨୦୨୫ରେ ପୂଜା ଶାଶୁଘରୁ ପଳାଇଥିଲା । ଯାହା ପରଠୁ ଆମ ପୂରା ପରିବାର ପାଇଁ ସେ ସ୍ୱର୍ଗବାସୀ ହୋଇଯାଇଛି । ଦିନାଙ୍କ ୧୦.୮.୨୦୨୫ ରବିବାର ଦିନ ତା’ର ଦ୍ୱାଦଶ ଶୁଦ୍ଧିକ୍ରିୟା ଆୟୋଜିତ କରାଯାଇଛି ।
ଛପା ସରିଛି ଅନ୍ତ୍ୟେଷ୍ଟି ନିମନ୍ତ୍ରଣ ପତ୍ର । ଫଟୋରେ ଦିଆସରିଛି ଫୁଲମାଳ । ଏ ହେଉଛି ଜଣେ ଝିଅର ସୁଦ୍ଧିକ୍ରିୟା କାର୍ଡ । ଯାହାକୁ ଛପାଇଛନ୍ତି ଝିଅର ବାପା । ସେ ପୁଣି ଝିଅ ବଞ୍ଚି ଥାଉ ଥାଉ । ଆଉ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଶୁଦ୍ଧିକ୍ରିୟାର ଆୟୋଜନ କରିଛନ୍ତି ନିଜେ ବାପା । କାର୍ଡ ଦେଇ ଗାଁ ଲୋକଙ୍କୁ ନିମନ୍ତ୍ରଣ କଲେ । ଝିଅର ୧୧ ଦିନିଆ ଭୋଜି ଦେଲେ । ରାଜସ୍ଥାନ ଭିଲୱାଡ଼ା ଜିଲ୍ଲାର ଆସିନ୍ଦ ଉପଖଣ୍ଡର ସରେରି ଗାଁରେ ଏପରି ହୃଦୟ ବିଦାରକ ଘଟଣା ସାମ୍ନାକୁ ଆସିଛି । ଯେଉଁଠାରେ ଜଣେ ବାପା ତାଙ୍କ ଜୀବିତ ଝିଅର ମଲା କାର୍ଡ ଛାପି ଏକ ଶୋକସଭାର ଆୟୋଜନ କରିଥିଲେ । ବଞ୍ଚି ଥାଉ ଥାଉ ନିଜ ଝିଅକୁ କାହିଁକି ସୁଦ୍ଧି ହେଲେ ବାପା ? ଏ ଘଟଣା ପଛରେ କାରଣ ଜାଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ ।
ବରେଲି ଗାଁ ବାସିନ୍ଦା ଭୈରୁଲାଲ ଜୋଶୀ । ସମାଜକୁ କଳଙ୍କିତ କରିବାରୁ ନିଜ ଝିଅ ପୂଜାକୁ ଏଭଳି ଦଣ୍ଡ ଦେଇଛନ୍ତି ଭୈରୁଲାଲ । ଝିଅ ବଞ୍ଚି ଥାଉ ଥାଉ ତାକୁ ମୃତ ବୋଲି ଘୋଷଣା କରିଛନ୍ତି । ସମାଜକୁ ବାର୍ତ୍ତା ଦେବା ଉଦ୍ଦେଶ୍ୟରେ ସେ ଏଭଳି ପଦକ୍ଷେପ ନେଇଛନ୍ତି । ଭେରୁଲାଲ ବିବାହରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ସେହି ଗାଁର ବାସିନ୍ଦା ସଞ୍ଜୟ ତିୱାରୀଙ୍କ ସହ ଖୁବ୍ ଧୁମଧାମରେ ପୂଜାର ବିବାହ କରାଇଥିଲେ । ବିବାହର କିଛି ଦିନ ପରେ ସ୍ୱାମୀ ସଞ୍ଜୟ ତିୱାରୀଙ୍କ ସମ୍ପର୍କୀୟ ସୂରଜ ତିୱାରୀଙ୍କ ସହ ପୂଜାଙ୍କର ଗଢ଼ିଉଠିଥିଲା ପ୍ରେମ ସମ୍ପର୍କ । ପରେ ନିଜ ବୈବାହିକ ଜୀବନ ଶେଷ କରି ସୂରଜଙ୍କ ସହ ଘରୁ ପଳାଇ ତାଙ୍କୁ ପ୍ରେମ ବିବାହ କଲେ । ପୋଲିସ ଯେତେବେଳେ ପୂଜାଙ୍କୁ ଥାନାକୁ ଆଣିଲା, ସେ ତାଙ୍କ ବାପାଙ୍କ ବିରୁଦ୍ଧରେ ଏକ ବୟାନ ଦେଲେ । ତାଙ୍କର ଏହି ବୟାନରେ ଆଘାତ ପାଇ ପିତା ଭୈରୁଲାଲ ଯୋଶୀ କହିଥିଲେ, ଆଜିଠାରୁ ପୂଜା ମୋ ପାଇଁ ମରିଗଲା ।
ଝିଅ ଦେଇଥିବା ଯନ୍ତ୍ରଣାରେ ଆଘାତ ପାଇଥିବା ବାପା ତାଙ୍କ ଜୀବିତ ଝିଅକୁ ସାରା ଗାଁରେ ମୃତ ବୋଲି ଘୋଷଣା କଲେ ଏବଂ ଝିଅ ନାଁରେ ଏକ ସୁଦ୍ଧିକ୍ରିୟା କାର୍ଡ ଛାପିଲେ । ଏଥିସହ ତାଙ୍କ ସୁଦ୍ଧିକ୍ରିୟା ଲାଗି ୧୨ ଦିନ ପାଇଁ ଘର ବାହାରେ ଏକ ଶୋକସଭାର ଆୟୋଜନ କରାଯାଇଥିଲା । ଭୈରୁଲାଲ ଜୋଶୀଙ୍କ ଝିଅ ପୂଜା ବାଈ ୨୦୨୫ ମସିହା ଏପ୍ରିଲ ମାସ ୨୫ ତାରିଖରେ ସଞ୍ଜୟ ତିୱାରୀଙ୍କୁ ବିବାହ କରିଥିଲେ । ବିବାହ ପରେ ୨୯ ଜୁଲାଇରେ ତାଙ୍କ ଝିଅ ପୂଜାର ଦେହାନ୍ତ ହୋଇଛି ବୋଲି ବାପା ଅନ୍ତ୍ୟେଷ୍ଟି ନିମନ୍ତ୍ରଣ ପତ୍ରରେ ଛପାଇଥିଲେ । ୧୦ ଅଗଷ୍ଟ ରବିବାର ତାଙ୍କ ସୁଦ୍ଧିକ୍ରିୟା କାର୍ଯ୍ୟକ୍ରମର ଆୟୋଜନ କରାଯାଇଥିଲା । ତାଙ୍କ ଝିଅ ପୂଜା ସମାଜ ପାଇଁ ଲଜ୍ଜା ଜନକ କାମ କରିଛି ବୋଲି କହିଲେ ଭୈରୁଲାଲ । ତେଣୁ ବଞ୍ଚିଥିବା ଅବସ୍ଥାରେ ସେ ତାଙ୍କ ଝିଅକୁ ମୃତ ଘୋଷଣା କରି ସମାଜକୁ ଏକ ବାର୍ତ୍ତା ଦେଇଛନ୍ତି ।
