ନୂଆଦିଲ୍ଲୀ: ରାଜସ୍ଥାନ ରୟାଲ୍ସ ଚଳିତ ଆଇପିଏଲ ସିଜିନର ପ୍ଲେଅଫ୍ ଦୌଡ଼ରୁ ବାଦ ପଡ଼ିଛି। ଦଳ ମୁମ୍ବାଇ ଇଣ୍ଡିଆନ୍ସଠାରୁ ୧୦୦ ରନର ବିଶାଳ ବ୍ୟବଧାନରେ ପରାସ୍ତ ହୋଇଛି। ତେବେ ଏହା ମୁମ୍ବାଇର ଲଗାତାର ଷଷ୍ଠ ବିଜୟ। ଏହି ବିଜୟ ସହିତ ମୁମ୍ବାଇ ଦଳ ପଏଣ୍ଟ ଟେବୁଲର ଶୀର୍ଷରେ ପହଞ୍ଚିଛି।
ଜୟପୁରର ସୱାଇ ମାନସିଂହ ଷ୍ଟାଡିୟମରେ ହେଉଥିବା ଏହି ମ୍ୟାଚରେ ରାଜସ୍ଥାନ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ମୁମ୍ବାଇ ୨୦ ଓଭରରେ ୨ ୱିକେଟ୍ ହରାଇ ୨୧୭ ରନ୍ ସଂଗ୍ରହ କରିଥିଲା। ୨୧୮ ରନର ଟାର୍ଗେଟକୁ ପିଛା କରୁଥିବା ରାଜସ୍ଥାନ ମାତ୍ର ୧୬.୧ ଓଭର ସୁଦ୍ଧା ୧୧୭ ରନରେ ଅଲଆଉଟ୍ ହୋଇଯାଇଥିଲା। ଟ୍ରେଣ୍ଟ ବୋଲ୍ଟ ଏବଂ କର୍ଣ୍ଣ ଶର୍ମା ୩ଟି ଲେଖାଏଁ ୱିକେଟ୍ ନେଇଥିଲେ। ଜସପ୍ରିତ ବୁମରାହ ୨ ୱିକେଟ୍ ପାଇଥିଲେ। ସେହିଭଳି ରାଜସ୍ଥାନର କୌଣସି ବ୍ୟାଟସମ୍ୟାନ୍ ୩୦ ରନ ଅତିକ୍ରମ କରିପାରି ନଥିଲେ।
ମୁମ୍ବାଇ ପକ୍ଷରୁ ସୂର୍ଯ୍ୟ କୁମାର ଯାଦବ ଏବଂ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ୪୮-୪୮ ରନ କରି ଅପରାଜିତ ରହିଥିଲେ। ଦୁହେଁ ୯୪ ରନର ଅପରାଜିତ ଭାଗୀଦାରି ଖେଳିଥିଲେ। ଓପନର ରିଆନ ରିକେଲଟନ ୬୧ ରନ ଏବଂ ରୋହିତ ଶର୍ମା ୫୩ ରନ ସଂଗ୍ରହ କରିଥିଲେ। ରିୟାନ୍ ପାରାଗ ଏବଂ ମହେଶ ତୀକ୍ଷଣାଙ୍କୁ ଗୋଟିଏ ଲେଖାଏଁ ୱିକେଟ୍ ମିଳିଥିଲା।
