ପୁରୀ,୨୩/୦୮: ବଳିଆପଣ୍ଡାରେ ବାସେଳିସାହି ଲୋକନାଥ ରୋଡ ଥାନପତି ଲେନ୍ର ରାଜେଶ ଓଝା ହତ୍ୟା ମାମଲା । ହତ୍ୟାକାଣ୍ଡରେ ୨ ଜଣଙ୍କ ସମ୍ପୃକ୍ତ ଥିବା ବଳିଆପଣ୍ଡା ଥାନା ତଦନ୍ତ ବେଳେ ଜାଣିବାକୁ ପାଇଛି । ଦୁଇ ଜଣଙ୍କ ମଧ୍ୟରୁ ଜଣଙ୍କୁ ପୁଲିସ ଅଟକ ରଖି ପଚରାଉଚରା କରୁଥିବା ବେଳେ ଅନ୍ୟ ଜଣଙ୍କୁ ଧରିବା ଲାଗି ପୁଲିସ ବିଭିନ୍ନ ସ୍ଥାନରେ ଚଢ଼ଉ ଜାରି। ଏନେଇ ବଳିଆପଣ୍ଡା ଥାନା ଆଇଆଇସି ସଙ୍ଗୀତା ଦାଶ କହିଛନ୍ତି ।
ଆଇଆଇସିଙ୍କ ସୂଚନା ଅନୁଯାୟୀ, ହତ୍ୟାକାଣ୍ଡର କାରଣ ଜଣାଡ଼ିଥିବା ବେଳେ ଅଧିକ ତଥ୍ୟ ସଂଗ୍ରହ ଲାଗି ତଦନ୍ତ ଜାରି ରଖିଛି । ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଫେରାର୍ ଥିବା ବେଳେ ତା’ର ସହଯୋଗୀକୁ ପୁଲିସ ଥାନାରେ ଅଟକ ରଖିଛି । ମୃତ ରାଜେଶଙ୍କ ବଡ଼ଭାଇ ରତ୍ନକର ଓଝାଙ୍କ ଅଭିଯୋଗକ୍ରମେ ପୁଲିସ ଏକ ହତ୍ୟା ମାମଲା ରୁଜୁ କରି ଶୁକ୍ରବାର ଜିଲ୍ଲାମୁଖ୍ୟ ଚିକିତ୍ସାଳୟରେ ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହନ୍ତାନ୍ତର କରିଛି । ଅନ୍ୟପକ୍ଷରେ ହତ୍ୟାକାଣ୍ଡକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜାରି ରହିଛି ।
ରତ୍ନାକରଙ୍କ ଅଭିଯୋଗ ଅନୁସାରେ, ଗୁରୁବାର ଅପରାହ୍ନ ୫ଟାରେ ମୁଖ୍ୟ ଅଭିଯୁକ୍ତ ବିଶ୍ୱନାଥ ମହାରଣା ଓ ଅନ୍ୟ ଜଣେ ରାଜେଶଙ୍କୁ ବେଳାଭୂମି ଯିବା ଲାଗି ଡାକି ନେଇଥିଲେ । ରାତ୍ର ୯ଟା ପର୍ଯ୍ୟନ୍ତ ରାଜେଶ ଘରକୁ ନ ଫେରିବାରୁ ମନରେ ସନ୍ଦେହଜାତ ହୋଇଥିଲା । ଏନେଇ ସେ ଥାନାରେ ଅଭିଯୋଗ କରିଥିଲେ । ଏକ ଛୁରିରେ ରାଜେଶଙ୍କ ବେକକୁ ଏକାଧିକବାର ଭୁସି ହତ୍ୟା କରାଯାଇଛି ବୋଲି ପଞ୍ଚନାମା ବେଳେ ଜଣାପଡ଼ିଛି ।
