ନୂଆଦିଲ୍ଲୀ: ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ସୋମବାର ଆମେରିକାର ଜାତୀୟ ଗୁଇନ୍ଦା ନିର୍ଦ୍ଦେଶକ ତୁଳସୀ ଗାବାର୍ଡଙ୍କ ସହ ସାକ୍ଷାତ ଆଲୋଚନା କରିଛନ୍ତି । ଏହି ସମୟରେ ପ୍ରତିବନ୍ଧିତ ଖଲିସ୍ତାନୀ ସଂଗଠନ ଶିଖ ଫର୍ ଜଷ୍ଟିସ୍ (SFJ) ଦ୍ୱାରା ଆମେରିକୀୟ ମାଟିରେ କରାଯାଉଥିବା ଭାରତ ବିରୋଧୀ କାର୍ଯ୍ୟକଳାପ ପ୍ରସଙ୍ଗ ଉଠାଇଛନ୍ତି । ଦିଲ୍ଲୀରେ ଗାବାର୍ଡଙ୍କ ସହ ସାକ୍ଷାତ ସମୟରେ, ରାଜନାଥ ସିଂହ ଗୁରୁପତୱନ୍ତ ସିଂହ ପନ୍ନୁ ନେତୃତ୍ୱାଧୀନ SFJକୁ ନେଇ ଚିନ୍ତା ପ୍ରକାଶ କରିଛନ୍ତି । ଆମେରିକାକୁ ଏହି ବେଆଇନ ସଂଗଠନ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ତୁଳସୀ ଗାବାର୍ଡଙ୍କୁ କହିଛନ୍ତି ରାଜନାଥ ସିଂହ । 

ବୈଠକରେ ଭାରତ-ଆମେରିକା ପ୍ରତିରକ୍ଷା ଏବଂ ସୁରକ୍ଷା ସହଯୋଗକୁ ମଜଭୁତ କରିବା ଉପରେ ମଧ୍ୟ ଆଲୋଚନା ହୋଇଛି । ରାଜନାଥ ସିଂହ କହିଛନ୍ତି, 'ନୂଆଦିଲ୍ଲୀରେ ଆମେରିକୀୟ ଗୁଇନ୍ଦା ମୁଖ୍ୟ ତୁଳସୀ ଗାବାର୍ଡଙ୍କୁ ଭେଟି ଖୁସି ଲାଗିଲା। ଭାରତ-ଆମେରିକା ସମ୍ପର୍କକୁ ଆହୁରି ନିବିଡ଼ କରିବା ପାଇଁ ଆମେ ପ୍ରତିରକ୍ଷା ଏବଂ ସୂଚନା ସହଭାଗୀତା ସମେତ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା କରିଛୁ।’

ଶିଖ୍‌ ଫର୍ ଜଷ୍ଟିସ୍ (SFJ) କ'ଣ ?

ଶିଖ୍‌ ଫର୍ ଜଷ୍ଟିସ୍ (SFJ) ଏକ ଆମେରିକୀୟ ସଂଗଠନ ଯାହା ଭାରତରୁ ପୃଥକ ଭାବରେ 'ଖାଲିସ୍ତାନ' ନାମକ ଏକ ସ୍ୱାଧୀନ ଶିଖ୍ ରାଷ୍ଟ୍ର ଦାବି କରୁଛି । ଏହି ସଂଗଠନ ୨୦୦୭ରେ ଗୁରୁପତୱନ୍ତ ସିଂହ ପନ୍ନୁ ଦ୍ୱାରା ପ୍ରତିଷ୍ଠା ହୋଇଥିଲା । SFJ ମୁଖ୍ୟତଃ ଆଇନଗତ କାର୍ଯ୍ୟକଳାପ ଏବଂ ଜନମତ ସଂଗ୍ରହ ଆୟୋଜନ ମାଧ୍ୟମରେ ଏହାର ବିଚ୍ଛିନ୍ନତାବାଦୀ ଏଜେଣ୍ଡାକୁ ପ୍ରୋତ୍ସାହିତ କରେ ।

 ଭାରତରେ ନିଷିଦ୍ଧ
ଭାରତ ସରକାର ୨୦୧୯ ମସିହାରେ ବେଆଇନ କାର୍ଯ୍ୟକଳାପ (ନିବାରଣ) ଆଇନ (UAPA) ଅଧୀନରେ SFJକୁ ନିଷିଦ୍ଧ କରିଥିଲେ। ଭାରତ ଏହି ସଂଗଠନକୁ ଆତଙ୍କବାଦ ଏବଂ ବିଚ୍ଛିନ୍ନତାବାଦୀ କାର୍ଯ୍ୟକଳାପକୁ ପ୍ରୋତ୍ସାହିତ କରୁଥିବା ଏକ ସଂଗଠନ ବୋଲି କହିଆସିଛି ।