ଭୁବନେଶ୍ବର,୦୫/୦୩: ଆଜି ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ୧୦୯ ତମ ଜୟନ୍ତୀ। ଏହି ଅବସରରେ ଜୋର୍ ଧରିଲା ରାଜ୍ୟ ସରକାରଙ୍କ ପଞ୍ଚାୟତିରାଜ ଦିବସର ଛୁଟି ବାତିଲ ପ୍ରସଙ୍ଗ। ଯାହାକୁ ନେଇ ନିଜର ପ୍ରତିକ୍ରିୟା ଦେଇଛନ୍ତି ପୂର୍ବତନ ମନ୍ତ୍ରୀ ତଥା ବିଜୁ ଜନତା ଦଳର ବରିଷ୍ଠ ନେତା ବିଧାୟକ ରଣେନ୍ଦ୍ର ପ୍ରତାପ ସ୍ଵାଇଁ।
ସେ କହିଛନ୍ତି ଯେ, ଏହା ଏକ ହୀନ ରାଜନୀତି। ବିଜୁ ବାବୁଙ୍କୁ ଅସମ୍ମାନ କରିବା, ଓଡ଼ିଆ ଅସ୍ମିତାକୁ ଧକ୍କା ମାରିବା ସହିତ ସମାନ। ଓଡ଼ିଆ ଜାତି ଏହାକୁ ବରଦାସ୍ତ କରିବ ନାହିଁ। ଉଦ୍ଦେଶ୍ୟମୂଳକ ଭାବରେ ବିଜୁବାବୁଙ୍କୁ ତଳେ ପକାଇବାକୁ ଚେଷ୍ଟା କରିଛନ୍ତି ବିଜେପି ସରକାର। ତିନୋଟି ଦେଶର ଜାତୀୟ ପତାକା ବିଜୁ ବାବୁଙ୍କ ମରଶରୀର ଉପରେ ପଡ଼ିଥିଲା, ଏପରି ସୌଭାଗ୍ୟ କୌଣସି ରାଜନେତାଙ୍କୁ ମିଳି ନାହିଁ।
ଏହା ମଧ୍ୟ ପଢନ୍ତୁ- ମାହାଙ୍ଗା ଉମରରେ ବିଜୁ ବାବୁଙ୍କ ପ୍ରତିମୂର୍ତ୍ତି ଭଙ୍ଗା ହେବା ଘଟଣା, ପ୍ରତିବାଦ ପରେ ଯୋଡ଼ା ହେଲା ପ୍ରତିମୂର୍ତ୍ତି
ଦେଶର ସ୍ଵାଧୀନତା ସଂଗ୍ରାମରେ ବା ନୂତନ ଓଡ଼ିଶା ନିର୍ମାଣରେ ଯେଉଁ ମାନଙ୍କର କୌଣସି ଅବଦାନ ନାହିଁ, ସେହିଭଳି ବ୍ୟକ୍ତିମାନେ ବିଜୁବାବୁଙ୍କ ସ୍ମୃତିକୁ ହଜେଇ ଦେବାର ଅପଚେଷ୍ଟା କରୁଛନ୍ତି। ଯାହାକୁ ଆମେ ସଫଳ ହେବାକୁ ଦେବୁ ନାହିଁ। ଯାହାର ପରିଚୟ ସାରା ବିଶ୍ବରେ ଅଛି ତାଙ୍କୁ ଅସମ୍ମାନ କରୁଛନ୍ତି ବୋଲି କହିଛନ୍ତି ବିଧାୟକ ରଣେନ୍ଦ୍ର ପ୍ରତାପ ସ୍ଵାଇଁ। ପ୍ରକାଶ ଥାଉକି, ପଞ୍ଚାୟତିରାଜ ଦିବସ ପାଳନରେ ଜାତୀୟ ଓ ରାଜ୍ୟ ସ୍ତରରେ ଅସଂହତି ରହିଛି। ଏହାକୁ ଦୂର କରିବାକୁ ଓଡିଶାରେ ମାର୍ଚ୍ଚ ୫ ତାରିଖ ପରିବର୍ତ୍ତେ ଅପ୍ରେଲ ୨୪ ତାରିଖରେ ପଞ୍ଚାୟତିରାଜ ଦିବସ ପାଳନ କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି।
