ନୂଆଦଲ୍ଲୀ: ଆପତ୍ତିଜନକ ମନ୍ତବ୍ୟ  ମାମଲାରେ ଫସିଥିବା YouTuber ରଣବୀର ଆହ୍ଲାବାଦିଆଙ୍କୁ ସୁପ୍ରିମକୋର୍ଟରୁ ବଡ଼ ଆଶ୍ୱସ୍ତି ମିଳିଛି । ଦେଶର ସର୍ବୋଚ୍ଚ ଅଦାଲତ ରଣବୀର ଆହ୍ଲାବାଦିଆଙ୍କ ଜବତ ପାସପୋର୍ଟ ଫେରାଇବାକୁ ନିର୍ଦ୍ଦେଶ ଦେଇଛନ୍ତି । ମହାରାଷ୍ଟ୍ର କ୍ରାଇମବ୍ରାଞ୍ଚ ଆହ୍ଲାବାଦିଆଙ୍କ ପାସପୋର୍ଟ ଜବତ କରିଥିଲା । ସୋମବାର ମାମଲାର ଶୁଣାଣି ସମୟରେ ରାଜ୍ୟ ସରକାରଙ୍କ ପକ୍ଷରୁ ହାଜର ହୋଇଥିବା ସଲିସିଟର ଜେନେରାଲ ତୁଷାର ମେହେଟା କୋର୍ଟକୁ କହିଥିଲେ ଯେ, ମହାରାଷ୍ଟ୍ର ଏବଂ ଆସାମରେ ପଞ୍ଜିକୃତ ମାମଲାର ତଦନ୍ତ ସମାପ୍ତ ହୋଇଛି । 

କିଛି ଦିନ ପୂର୍ବରୁ ରଣବୀର ଆହ୍ଲାବାଦିଆ ସୁପ୍ରିମକୋର୍ଟରେ ଏକ ଆବେଦନ ଦାଖଲ କରି ତାଙ୍କ ପାସପୋର୍ଟ ଫେରାଇବା ପାଇଁ ଆବେଦନ କରିଥିଲେ। କୋର୍ଟ କହିଥିଲେ ଯେ, ସେ ଗୋଟିଏ ସପ୍ତାହ ପରେ ପାସପୋର୍ଟ ଆବେଦନର ଶୁଣାଣି କରିବେ ।  ଗତ ଶୁଣାଣି ସମୟରେ କୋର୍ଟ ରଣବୀରଙ୍କୁ ଏକ ପରାମର୍ଶ ମଧ୍ୟ ଦେଇଥିଲେ । କୋର୍ଟ କହିଥିଲେ ଯେ, ରଣବୀର ଆହ୍ଲାବାଦିଆ ଏକ ରିଟ୍ ପିଟିସନ୍ ଦାଖଲ କରିବା ଉଚିତ। ଆପଣ ଯେଉଁ ସହାୟତା ଚାହୁଁଛନ୍ତି ତାହା ଏକ ରିଟ୍ ପିଟିସନ୍‌ ଦ୍ବାରା ହୋଇପାରିବ । 

ରଣବୀର ଆହ୍ଲାବାଦିଆ YouTuber ଏବଂ ହାସ୍ୟ ଅଭିନେତା ସମୟ ରୈନାଙ୍କ ଶୋ' ‘ଇଣ୍ଡିଆଜ୍ ଗଟ୍ ଲାଟେଣ୍ଟ୍’ରେ ଅତିଥି ଭାବରେ ଉପସ୍ଥିତ ହୋଇଥିଲେ। ସେହି ସମୟରେ ସେ ପିତାମାତାଙ୍କ ମଧ୍ୟରେ ସମ୍ପର୍କ ଉପରେ ଏକ ବିବାଦୀୟ ବୟାନ ଦେଇଥିଲେ। ଏହି ବୟାନ ଭାଇରାଲ ହେବା ମାତ୍ରେ ସାରା ଦେଶରେ ହଇଚଇ ସୃଷ୍ଟି ହୋଇଥିଲା ଏବଂ ରଣବୀରଙ୍କ ବିରୋଧରେ ଅସନ୍ତୋଷ ବୃଦ୍ଧି ପାଇଥିଲା । ଅନେକ ସ୍ଥାନରେ ତାଙ୍କ ବିରୋଧରେ ଥାନାରେ ଅଭିଯୋଗ ମଧ୍ୟ କରାଯାଇଥିଲା । 

ଏହା ବ୍ୟତୀତ ମହାରାଷ୍ଟ୍ର ଏବଂ ଆସାମରେ ମଧ୍ୟ ଏଫଆଇଆର ପଞ୍ଜିକୃତ ହୋଇଥିଲା । ମାମଲା ବଢ଼ିବା ଦେଖି ରଣବୀର ଆହ୍ଲାବାଦିଆ କ୍ଷମା ମାଗିଥିଲେ। ସେ ଏକ ଭିଡିଓ ଜାରି କରି କହିଥିଲେ ଯେ, ସେ ଯାହା କହିଛନ୍ତି ତାହା କହିବା ଉଚିତ୍ ନଥିଲା । ଏପରି ଭୁଲ ଆଉ କେବେ ହେବ ନାହିଁ ବୋଲି ଆହ୍ଲାବାଦିଆ ପ୍ରତିଶ୍ରୁତି ମଧ୍ୟ ଦେଇଥିଲେ । ଏହି ମାମଲାରେ ରଣବୀର ଆହ୍ଲାବାଦିଆଙ୍କୁ ମଧ୍ୟ ପଚରାଉଚରା କରାଯାଇଥିଲା । କିନ୍ତୁ ଏବେ ମାମଲା ଥଣ୍ଡା ପଡ଼ିଥିବା ବେଳେ ସେ ପୁଣି ଥରେ ପଡକାଷ୍ଟ ଆରମ୍ଭ କରିଛନ୍ତି।