ନୂଆଦିଲ୍ଲୀ: ଛତିଶଗଡ଼ର ବିଜାପୁରରେ ମାଓ ବିରୋଧୀ ଅପରେସନ୍‌ ଜାରି ରହିଛି । ଜାତୀୟ ଉଦ୍ୟାନ ଅଞ୍ଚଳରେ ଚାଲିଥିବା ମାଓ ବିରୋଧୀ ଅଭିଯାନ ସମୟରେ ଏପର୍ଯ୍ୟନ୍ତ ୭ ଜଣ ମାଓବାଦୀଙ୍କ ମୃତଦେହ ଉଦ୍ଧାର କରାଯାଇଛି। ସେମାନଙ୍କ ମଧ୍ୟରୁ ୨ ଜଣଙ୍କୁ ଚିହ୍ନଟ କରାଯାଇଛି ଏବଂ ଅନ୍ୟମାନଙ୍କୁ ଚିହ୍ନଟ କରିବା ପାଇଁ ପ୍ରୟାସ କରାଯାଉଛି। ବସ୍ତର ଆଇଜି ପି ସୁନ୍ଦରରାଜ କହିଛନ୍ତି, ‘ବିଜାପୁର ଜିଲ୍ଲାର ଜାତୀୟ ଉଦ୍ୟାନ ଅଞ୍ଚଳରେ ଚାଲିଥିବା ନକ୍ସଲ ବିରୋଧୀ ଅଭିଯାନ ସମୟରେ ସୁରକ୍ଷା ବାହିନୀ ଏପର୍ଯ୍ୟନ୍ତ ମୋଟ ୭ ଜଣ ମାଓବାଦୀଙ୍କ ମୃତଦେହ ଉଦ୍ଧାର କରିଛି। ଏଥିରେ କେନ୍ଦ୍ରୀୟ କମିଟି ସଦସ୍ୟ ଗୌତମ ଓରଫ ସୁଧାକର ଏବଂ ତେଲେଙ୍ଗାନା ରାଜ୍ୟ କମିଟି ସଦସ୍ୟ ଭାସ୍କରର ମୃତଦେହ ସାମିଲ ।’

ସେ କହିଛନ୍ତି, ବିଜାପୁର ଜିଲ୍ଲାର ଜାତୀୟ ଉଦ୍ୟାନ ଅଞ୍ଚଳରେ ଚାଲିଥିବା ନକ୍ସଲ ବିରୋଧୀ ଅଭିଯାନରେ ୫,୬ ଏବଂ ୭ ଜୁନ୍ ୨୦୨୫ ରେ ହୋଇଥିବା ଏନକାଉଣ୍ଟରରେ ଏବେ ସୁଦ୍ଧା ମୋଟ ୭ ଜଣ ମାଓବାଦୀଙ୍କ ମୃତଦେହ ଉଦ୍ଧାର କରାଯାଇଛି। ସୁରକ୍ଷା ବାହିନୀ ଦ୍ୱାରା ଉଦ୍ଧାର କରାଯାଇଥିବା ୫ ଜଣ ଅଜ୍ଞାତ ମାଓବାଦୀଙ୍କ ମୃତଦେହର ପରିଚୟ ଜାଣିବାକୁ ଚେ‌ଷ୍ଟା କରାଯାଉଛି । ମୃତଦେହ ସହ ୨ଟି AK-47 ରାଇଫଲ ଏବଂ ବିପୁଳ ପରିମାଣର ଅସ୍ତ୍ରଶସ୍ତ୍ର, ଗୁଳି ଜବତ କରାଯାଇଛି। ଆଖପାଖ ଜଙ୍ଗଲ ଅଞ୍ଚଳରେ ସର୍ଚ୍ଚ ଅପରେସନ୍ ଏବେ ବି ଜାରି ରହିଛି । 

ସେପଟେ ସାପ କାମୁଡ଼ା, ମହୁମାଛି, ଡିହାଇଡ୍ରେସନ୍ ଏବଂ ଅନ୍ୟାନ୍ୟ ଆଘାତ ଯୋଗୁଁ କିଛି ସୁରକ୍ଷା କର୍ମୀ ଆହତ ହୋଇଛନ୍ତି। ସେମାନଙ୍କୁ ବର୍ତ୍ତମାନ ଉପଯୁକ୍ତ ଚିକିତ୍ସା ଯୋଗାଇ ଦିଆଯାଉଛି। ସେମାନଙ୍କ ଅବସ୍ଥା ସ୍ୱାଭାବିକ ଅଛି ବୋଲି ବସ୍ତର ଆଇଜି କହିଛନ୍ତି ।  ଛତିଶଗଡ଼ ବିଧାନସଭା ବାଚସ୍ପତି ଡକ୍ଟର ରମଣ ସିଂହ କହିଛନ୍ତି, ‘କେନ୍ଦ୍ର ଗୃହମନ୍ତ୍ରୀ ଅମିତ ଶାହ ମଧ୍ୟ ଏକ ସମୟସୀମା ଧାର୍ଯ୍ୟ କରିଛନ୍ତି । ୨୦୨୬ ସୁଦ୍ଧା ଭାରତରୁ ନକ୍ସଲବାଦ ସମ୍ପୂର୍ଣ୍ଣ ଭାବରେ ସମାପ୍ତ କରାଯିବ। ପୋଲିସ ମଧ୍ୟ ପୂର୍ଣ୍ଣ ବଳରେ କାମ କରୁଛି ଏବଂ ଆମେ ୧୦୦ ପ୍ରତିଶତ ସଫଳତା ପାଇବୁ।’

ସୂଚନାଯୋଗ୍ୟ ଯେ, ଛତିଶଗଡ଼ରେ ମାଓବାଦୀଙ୍କ ବିରୁଦ୍ଧରେ ନିରନ୍ତର ଅଭିଯାନ ଚାଲିଛି। ଏହି ଅଭିଯାନ ଯୋଗୁଁ ଅନେକ ମାଓବାଦୀଙ୍କୁ ନିପାତ କରାଯାଇଛି ଏବଂ ଅନେକ ଆତ୍ମସମର୍ପଣ କରିଛନ୍ତି।