ପୁରୀ,୨୦/୦୬: ରଥଖଳାରେ ଠାକୁରଙ୍କ ଚକା ସିଂହାସନ ତିଆରିଛନ୍ତି ବିଶ୍ୱକର୍ମା । ଚକା ବେଦିରେ ଠାକୁରେ ଅବସ୍ଥାନ କରିବେ । ବେଦି ପଛପଟେ ରହିବ ପ୍ରଭା । ବିଶ୍ୱକର୍ମାମାନେ ପ୍ରଭା କାମ ସାରିଛନ୍ତି । ରୁପକାରମାନେ ସେଥିରେ କିର୍ତ୍ତୀମୁଖ ଓ ଉଭୟପାଶ୍ୱର୍ରେ ମଗରମୁଣ୍ଡ କରିବେ । ଚିତ୍ରକର ରଙ୍ଗ ଦେଲେ ରଥରେ ଫିଟିଂ ହେବ ପ୍ରଭା । ଏବେ ରଥ ଉପରେ ଠାକୁରଙ୍କ ସିଂହାସନ କାମ ଜାରି ରହିଛି । ଏଥିସହ ଗୁରୁବାର ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ରଥ ନିର୍ମାଣ କାର୍ଯ୍ୟ ଅନୁଧ୍ୟାନ କରିଛନ୍ତି ।
ରଥରେ ସିଂହାସନ କାର୍ଯ୍ୟ ଅବସରରେ ଧମକ ଉପରେ ଜଗତପୃଷ୍ଠ ଶେଣୀ ରଖାଯିବ । ବିଶ୍ୱକର୍ମାମାନେ ପଟା ବାଡ଼େଇ ସିଂହାସନ ବୁଜିବେ । ଆଗକୁ ଗାଈପଲ ଚିତ୍ର ହେବ । ସିଂହାସନ ଉପରେ କନକମୁଣ୍ଡି କାମ ଚାଲିଛି । କନକମୁଣ୍ଡିରେ ପିତଳ ଚାଦର ବୁଲିବ । ଯେପରି ରଥରେ ଅବସ୍ଥାନ ସମୟରେ ଶ୍ରୀବିଗ୍ରହଙ୍କ ଶ୍ରୀଅଙ୍ଗ ଓଦା ହେବ ନାହିଁ । ବିଶ୍ୱକର୍ମାମାନେ ଦୁଆରଘଡ଼ା କାର୍ଯ୍ୟ ଶେଷ କରୁଛନ୍ତି । ରଥର ଚତୁଃପାର୍ଶ୍ୱରେ ଲାଗେ ୪ ଦୁଆର ଘଡ଼ା । ୩ ରଥ ପାଇଁ ନିର୍ମାଣ ହୁଏ ୧୨ ଦୁଆରଘଡ଼ା । ଦର୍ଜୀ ସେବକମାନେ ଚନ୍ଦ୍ରଶାଳି ପାଇଁ କନା ସାଜ ତିଆରିଛନ୍ତି । ଦୁଆର ଘଡ଼ାର ଉପର ଅଂଶ ହେଉଛି ‘ଚନ୍ଦ୍ରଶାଳି’ । ଏହାର ନିର୍ମାଣ ପାଇଁ ପ୍ରତି ରଥକୁ ୪ଟି ଲେଖାଁଏ ମୋଟ ୧୨ଟି (୫ରେ ୫ଇଞ୍ଚ) କାଠ ଆବଶ୍ୟକ ହୋଇଥାଏ ।
ବିଶ୍ୱକର୍ମା ଚନ୍ଦ୍ରଶାଳି ପ୍ରସ୍ତୁତି ସାରି ଚିତ୍ରକରଙ୍କୁ ଦେଇଥାନ୍ତି । ସେମାନେ ଚନ୍ଦ୍ରଶାଳିରେ ରାହୁଋପ ଚିତ୍ର କରିଥାନ୍ତି । ରାହୁଋପ ଚିତ୍ରିତ ଚନ୍ଦ୍ରଶାଳିକୁ ରଥରେ ସ୍ଥାପନ କରାଯାଏ । ରଥ ଚାଳନାକୁ ନିୟନ୍ତ୍ରଣ କରିବାକୁ ବ୍ରେକ୍ ରୁପକାରମାନେ ନାଟ ଗୋଡ଼ରେ ଖୋଦେଇ କାର୍ଯ୍ୟ ଶେଷ କରୁଛନ୍ତି। ଚିତ୍ରକର ରଥର ବିଭିନ୍ନ ଅଂଶକୁ ଚିତ୍ର କରିବାରେ ନିମଗ୍ନ ।
