କଟକ/ଭୁବନେଶ୍ୱର,୦୭/୧୧: ରାସନ କାର୍ଡ ହିତାଧିକାରୀଙ୍କୁ ଏବେ ମିଳିବନି ଗହମ । ନୂଆବର୍ଷ ପୂର୍ବରୁ ରାଜ୍ୟରେ ରାସନ କାର୍ଡଧାରୀଙ୍କୁ ଗହମ ମିଳିବାର ସମ୍ଭାବନା ନାହିଁ । ଆସନ୍ତା ଡିସେମ୍ବର ପର୍ଯ୍ୟନ୍ତ ହିତାଧିକାରୀଙ୍କୁ କେବଳ ଚାଉଳ ଦେବାକୁ ସରକାର ଘୋଷଣା କରିଛନ୍ତି । ଅର୍ଥାତ୍ ଗହମ ପାଇଁ ଆହୁରି କିଛି ମାସ ଅପେକ୍ଷା କରିବାକୁ ପଡ଼ିବ । ହିସାବ ଛିଣ୍ଡି ନଥିବାରୁ ଗଚ୍ଛିତ ଗହମକୁ ଏବେ ନ ବାଣ୍ଟିବା ପାଇଁ ଯୋଗାଣ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି ।
୨୦୨୦-୨୧ରୁ ରାଜ୍ୟରେ ସାଧାରଣ ବଣ୍ଟନ ବ୍ୟବସ୍ଥାରେ ଗହମ ଯୋଗାଣ ବନ୍ଦ ରହିଛି । ହିତାଧିକାରୀଙ୍କୁ କେବଳ ଚାଉଳ ମିଳୁଛି । ରାଜ୍ୟରେ ସରକାର ବଦଳିବା ପରେ ନୂଆ ସରକାର ପୁଣି ଥରେ ଗହମ ବଣ୍ଟନ ଆରମ୍ଭ କରିବାକୁ ନିଷ୍ପତ୍ତି ନେଇଥିଲେ । ଖୋଦ୍ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ବିଧାନସଭାରେ ଏ ନେଇ ପ୍ରଥମେ ସ୍ପଷ୍ଟ କରିଥିଲେ । ପରେ ଗଣମାଧ୍ୟମ ସମ୍ମୁଖରେ ବି ପୁଣ ଗହମ ମିଳିବ ବୋଲି ଘୋଷଣା କରିଥିଲେ । ଏ ନେଇ କେନ୍ଦ୍ରକୁ ଚିଠି କରିବା ସହ କେନ୍ଦ୍ରମନ୍ତ୍ରୀଙ୍କ ସହ ରାଜ୍ୟ ଯୋଗାଣ ମନ୍ତ୍ରୀ ଆଲୋଚନା କରିଥିବା କହିଥିଲେ ।
କେନ୍ଦ୍ର ବି ସକରାତ୍ମକ ଆଭିମୁଖ୍ୟ ଦେଖାଇ ରାସନ କାର୍ଡଧାରୀଙ୍କୁ ଦିଆଯାଉଥିବା ଖାଦ୍ୟ ସାମଗ୍ରୀ ପରିମାଣରେ ସଂଶୋଧନ ଆଣିଲେ । ନୂଆ ବ୍ୟବସ୍ଥାରେ ଓଡ଼ିଶାକୁ ୩ ଲକ୍ଷ ୩୩ ହଜାର ୪୯୧ ମେଟ୍ରିକ ଟନ ଚାଉଳ ଓ ୩୯ ହଜାର ୮୧୨ ମେଟ୍ରିକ ଟନ ଗହମ ମିଳିବ ବୋଲି କୁହାଗଲା । ମନ୍ତ୍ରୀ ଘୋଷଣା କଲେ, ଅକ୍ଟୋବରରୁ ଚାଉଳ ସହ ଗହମ ବି ପାଇବେ ରାସନ କାର୍ଡ ହିତାଧିକାରୀ । ମଧୁମେହ ରୋଗୀ ଓ ରୁଟି ପ୍ରିୟ ଖାଉଟିଙ୍କ ମନ ଖୁସି ଥିଲା ଏ ଘୋଷଣାରେ । ହେଲେ ଏବେ ମିଳିବନି ଗହମ ।
ଏ ଦିଗରେ ଆଗେଇ ପାରିନି ଯୋଗାଣ ବିଭାଗ । ବର୍ତ୍ତମାନ ୫ କିଲୋ ହିସାବରେ ଅକ୍ଟୋବର, ନଭେମ୍ବର ଓ ଡିସେମ୍ବର ମାସ ପାଇଁ ହିତାଧିକାରୀଙ୍କୁ ଏକକାଳୀନ ୧୫ କିଲୋ ଲେଖାଏଁ ଚାଉଳ ଦେବାକୁ ନିର୍ଦ୍ଦେଶ ଦିଆଯାଇଛି । ଏହା ପରେ ବର୍ତ୍ତମାନ ଗହମ ମିଳିବା ନେଇ ଦ୍ୱନ୍ଦ୍ୱ ସୃଷ୍ଟି ହୋଇଛି । ଭିତିରି ସୂତ୍ର ଅନୁସାରେ ବର୍ତ୍ତମାନ ଗହମ ବଣ୍ଟନକୁ ନେଇ ସରକାର କିଛି ନିଷ୍ପତ୍ତି ନେଇନାହାନ୍ତି । ଅନେକ ପ୍ରକ୍ରିୟା ବାକି ରହିଛି ।
ଏ ନେଇ ମନ୍ତ୍ରୀ ଶ୍ରୀ ପାତ୍ର କହିଛନ୍ତି, ଗହମ ଆସି ଗଚ୍ଛିତ ରହିଛି । ମାତ୍ର କେଉଁ ଜିଲ୍ଲା ପାଇଁ କେତେ ଗହମ ଆବଶ୍ୟକ, ତା’ର ହିସାବ ହୋଇପାରିନି । ଏଥିପାଇଁ ଆଉ କିଛି ସମୟ ଲାଗିବ । ଜିଲ୍ଲାସ୍ତରରୁ ଚାହିଦା ରିପୋର୍ଟ ଆସିବା ପରେ ଗହମ ବଣ୍ଟନ ପ୍ରକ୍ରିୟା ଆଗେଇ ପାରିବ । କେଉଁ ହିତାଧିକାରୀ କେତେ ଗହମ ଚାହୁଁଛନ୍ତି, ତାହାର ତଥ୍ୟ ସଂଗ୍ରହ କରି ମୋଟ ଚାହିଦା ମୁତାବକ ରିପୋର୍ଟ ପ୍ରସ୍ତୁତ ହେବ । ତେଣୁ ୩ ମାସ ପାଇଁ ହିତାଧିକାରୀଙ୍କୁ ପୂର୍ବଭଳି ଚାଉଳ ଦେବା ପାଇଁ ନିଷ୍ପତ୍ତି ହୋଇଛି । ଏହି ସମୟ ଭିତରେ ଚାହିଦା ତଥ୍ୟ ସଂଗ୍ରହ କରାଯିବ । ଖାଲି ସେତିକି ନୁହେଁ, ଗହମ ପରିବହନ ପାଇଁ ନୂଆ ଟେଣ୍ଡର ବି ହେବ । ଏସବୁ ପ୍ରକ୍ରିୟା ପରେ ନୂଆବର୍ଷରୁ ଗହମ ମିଳିବା ନେଇ ସେ ଆଶାବ୍ୟକ୍ତ କରିଛନ୍ତି ।
ସୂଚନାଯୋଗ୍ୟ, ଏଫସିଆଇରୁ ଯୋଗାଣ ବିଭାଗ ଗୋଦାମକୁ ଗହମ ପରିବହନ ପାଇଁ ଟେଣ୍ଡର ଚୂଡ଼ାନ୍ତ ହୋଇପାରିନି । ଯେଉଁ ଟେଣ୍ଡର ପ୍ରକାଶ ପାଇଥିଲା, ତାହାର ଅବଧି ୬ ମାସ (ମାର୍ଚ୍ଚ ପର୍ଯ୍ୟନ୍ତ) ଥିବାରୁ ପ୍ରାୟତଃ କେହି ଆଗ୍ରହ ଦେଖାଇଲେ ନାହିଁ । କେଉଁଠି କେତେ ଗହମ ଦିଆଯିବ, ତାହା ସ୍ଥିର ହୋଇନାହିଁ । ତେଣୁ ଗହମ ବଣ୍ଟନ ଏବେ ବନ୍ଦ ରଖିବାକୁ ସ୍ଥିର ହୋଇଛି ।
କଟକ ରିଟେଲ ଡିଲର୍ସ ଆସାସିଏସନ୍ର କାର୍ଯ୍ୟକାରୀ ସଭାପତି ସୈୟଦ୍ ଏକ୍ରାମ ହୁସେନ କହିଛନ୍ତି, ଆଗରୁ ଗହମ ମିଳିବ ବୋଲି କୁହାଯାଇଥିଲା । ହେଲେ ପଡିକାର୍ଡରେ କେବଳ ଚାଉଳ ଯୋଗାଣ ଘୋଷଣା ହିତାଧିକାରୀଙ୍କ ମଧ୍ୟରେ ହତାଶା ଭାବ ସୃଷ୍ଟି କରିଛି । ରାଜ୍ୟ ସରକାର ତୁରନ୍ତ ଏ ଦିଗରେ ପଦକ୍ଷେପ ନିଅନ୍ତୁ । ପଡିକାର୍ଡ ଧାରୀଙ୍କୁ ଖୁଚୁରା ବିକ୍ରୟ କେନ୍ଦ୍ରରୁ ସାମଗ୍ରୀ ଉଠାଣ ସମୟରେ ବାରମ୍ବାର ଲିଙ୍କ୍ ଫେଲ୍ ସମସ୍ୟାର ସମ୍ମୁଖୀନ ହେବାକୁ ପଡ଼ୁଛି । ବାରମ୍ବାର କେନ୍ଦ୍ରକୁ ଯିବାକୁ ପଡ଼ିବା ସହ ଭିଡ଼ ବି ଜମୁଛି । ସର୍ଭର ଉନ୍ନତିକରଣ ନେଇ ମନ୍ତ୍ରୀ ଘୋଷଣା କରିଥିବାବେଳେ ଏ ଦିଗରେ ତୁରନ୍ତ ପଦକ୍ଷେପ ନିଆଯିବା ଆବଶ୍ୟକ ବୋଲି ସେ ଦାବି କରିଛନ୍ତି।
