ଭୁବନେଶ୍ୱର,୨୦/୦୨ ରାସନ କାର୍ଡ ହିତାଧିକାରୀଙ୍କୁ ମିଳିବ ଗହମ । ପୂର୍ବଭଳି ସାଧାରଣ ବଣ୍ଟନ କେନ୍ଦ୍ରରୁ ନିଜ ପସନ୍ଦରେ ଖାଉଟି ଚାଉଳ ସହ ଗହମ ବି ଉଠାଣ କରିପାରିବେ । ନୂଆ ସରକାର ଆସିବା ପରେ ବିଭାଗୀୟ ମନ୍ତ୍ରୀ ଏମିତି ଆଶା ଦେଖାଇଥିଲେ । ନିଜ କଥାକୁ ବାରମ୍ବାର ଦୋହରାଇଲେ । ଲାଗୁଥିଲା, ନୂଆବର୍ଷରୁ ନିଶ୍ଚିତ ଗହମ ମିଳିବ । ମାତ୍ର ଏଯାଏ ଗହମ ମିଳିଲାନି କିମ୍ବା ମିଳିବାର ନାଁ ଗନ୍ଧ ଉଠୁନି।
ଯୋଗାଣ ବିଭାଗର ତାଜା ସୂଚନା କହୁଛି, ନିକଟରେ ଖାଉଟିଙ୍କୁ ଗହମ ମିଳିବାର ସମ୍ଭାବନା ନାହିଁ । କେନ୍ଦ୍ର ସରକାର ମାର୍ଚ୍ଚ ମାସରୁ ଖାଉଟିଙ୍କୁ କେବଳ ଚାଉଳ ଯୋଗାଣ ପାଇଁ ଆବଣ୍ଟନପତ୍ର ଜାରି କରିଛନ୍ତି । ରାଜ୍ୟ ସରକାର ଭାରତୀୟ ଖାଦ୍ୟ ନିଗମ (ଏଫସିଆଇ) ଠାରୁ ଗହମ ଉଠାଣ ପାଇଁ ପରିବହନ ବ୍ୟବସ୍ଥା ସ୍ଥିର କରିନାହାନ୍ତି । ଏମିତିରେ ଖାଉଟି ଗହମ ପାଇବା ଆଶା ନାହିଁ ।
୨୦୨୦-୨୧ରୁ ରାଜ୍ୟରେ ସାଧାରଣ ବଣ୍ଟନ ବ୍ୟବସ୍ଥାରେ ଗହମ ଯୋଗାଣ ବନ୍ଦ ରହିଛି । ହିତାଧିକାରୀଙ୍କୁ କେବଳ ଚାଉଳ ମିଳୁଛି । ନୂଆ ସରକାର ପୁଣି ଥରେ ଗହମ ବଣ୍ଟନ ଆରମ୍ଭ କରିବାକୁ ନିଷ୍ପତ୍ତି ନେଇଥିଲେ । ଖୋଦ୍ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ବିଧାନସଭାରେ ଏ ନେଇ ପ୍ରଥମେ ସ୍ପଷ୍ଟ କରିଥିଲେ । ପରେ ଗଣମାଧ୍ୟମ ସମ୍ମୁଖରେ ବି ପୁଣି ଗହମ ମିଳିବ ବୋଲି ଘୋଷଣା କରିଥିଲେ । ଏ ନେଇ କେନ୍ଦ୍ରକୁ ଚିଠି କରିବା ସହ କେନ୍ଦ୍ରମନ୍ତ୍ରୀଙ୍କ ସହ ମନ୍ତ୍ରୀ ନିଜେ ଆଲୋଚନା କରିଥିବା କହିଥିଲେ । ନୂଆ ବ୍ୟବସ୍ଥାରେ ଓଡ଼ିଶାକୁ ୩ ଲକ୍ଷ ୩୩ ହଜାର ୪୯୧ ମେଟ୍ରିକ ଟନ ଚାଉଳ ଓ ୩୯ ହଜାର ୮୧୨ ମେଟ୍ରିକ ଟନ ଗହମ ମିଳିବ ବୋଲି ଯୋଗାଣ ବିଭାଗ ପକ୍ଷରୁ ସୂଚନା ମିଳିଥିଲା । ମନ୍ତ୍ରୀ ଘୋଷଣା କଲେ, ଅକ୍ଟୋବରରୁ ଚାଉଳ ସହ ଗହମ ବି ପାଇବେ ରାସନ କାର୍ଡ ହିତାଧିକାରୀ । ମଧୁମେହ ରୋଗୀ ଓ ରୁଟି ପ୍ରିୟ ଖାଉଟିଙ୍କ ମନ ଖୁସି ଥିଲା ଏ ଘୋଷଣାରେ । ହେଲେ ଅକ୍ଟୋବର ଯାଇ ଫେବ୍ରୁଆରୀ ସରିବାକୁ ବସିଲାଣି, ତଥାପି ମିଳିଲାନି ଗହମ ।
ବିଧାନସଭାରେ ମନ୍ତ୍ରୀ ରଖିଥିବା ସୂଚନା ଅନୁସାରେ, ଗହମ ଉଠାଣ ପାଇଁ ସମସ୍ତ ଜିଲ୍ଲାରେ ଆବଶ୍ୟକ ପରିବହନ ବ୍ୟବସ୍ଥା ସ୍ଥିରୀକୃତ ହେବା ପରେ ରାଜ୍ୟ ସରକାର କେନ୍ଦ୍ରକୁ ଅବଗତ କରାଇବେ । ତା’ପରେ କେନ୍ଦ୍ର ସରକରଙ୍କଠାରୁ ପରିବର୍ତ୍ତିତ ଆବଣ୍ଟନପତ୍ର ପ୍ରକାରେ ହିତାଧିକାରୀଙ୍କୁ ଖାଦ୍ୟଶସ୍ୟ ବଣ୍ଟନ କରାଯିବ । ଅର୍ଥାତ୍ ଗହମ ମିଳିବା ନେଇ ଏବେ କିଛି କହି ହେବନି । ଏଫ୍ସିଆଇରୁ ଯୋଗାଣ ବିଭାଗ ଗୋଦାମକୁ ଗହମ ପରିବହନ ପାଇଁ ଟେଣ୍ଡର ଚୂଡ଼ାନ୍ତ ହୋଇପାରିନି ।
ପୂର୍ବରୁ ମନ୍ତ୍ରୀ କହିଥିଲେ, ଗହମ ଆସି ଗଚ୍ଛିତ ରହିଛି । ମାତ୍ର କେଉଁ ଜିଲ୍ଲା ପାଇଁ କେତେ ଗହମ ଆବଶ୍ୟକ, ତା’ର ହିସାବ ହୋଇପାରିନି । ଏଥିପାଇଁ ଆଉ କିଛି ସମୟ ଲାଗିବ । ଜିଲ୍ଲାସ୍ତରରୁ ଚାହିଦା ରିପୋର୍ଟ ଆସିବା ପରେ ଗହମ ବଣ୍ଟନ ପ୍ରକ୍ରିୟା ଆଗେଇ ପାରିବ । ଏବେ ପ୍ରଶ୍ନ ଉଠୁଛି, ଗଚ୍ଛିତ ଗହମ ଖାଉଟିଙ୍କୁ ମିଳିବ ନା ନାହିଁ? ଗହମ ପାଇବାକୁ ରାଜ୍ୟର ଖାଉଟିଙ୍କୁ ଆଉ କେତେ ମାସ ଅପେକ୍ଷା କରିବାକୁ ପଡ଼ିବ ତାହା ଯୋଗାଣ ବିଭାଗ ବି ସ୍ପଷ୍ଟ କରୁନି ।
