ନୂଆଦିଲ୍ଲୀ: ୟେମେନର ହୁଥି ବିଦ୍ରୋହୀ ମାନେ ଇସ୍ରାଏଲ ଏବଂ ଏହାର ସମର୍ଥିତ ଜାହାଜ ଗୁଡିକୁ ନେଇ ପୁଣି ଥରେ ଏକ ଗମ୍ଭୀର ଚେତାବନୀ ଦେଇଛନ୍ତି। ହୁଥି ମାନେ ସ୍ପଷ୍ଟ ଭାବରେ କହିଛନ୍ତି ଯେ, ଏବେ ସେମାନେ ଇସ୍ରାଏଲ ସହିତ ଜଡିତ ପ୍ରତ୍ୟେକ ଜାହାଜକୁ ଟାର୍ଗେଟ କରିବେ, ତାହା ବିଶ୍ୱର ଯେକୌଣସି ସ୍ଥାନରେ ହେଉ ନା କାହିଁକି। ଏହି ବିବୃତ୍ତି ଏପରି ଏକ ସମୟରେ ଆସିଛି, ଯେତେବେଳେ କି ଲୋହିତ ସାଗର ଏବଂ ଆରବ ସାଗରରେ ହୁଥି ଆକ୍ରମଣ ଯୋଗୁଁ ସାମୁଦ୍ରିକ ପରିବହନ ବାଧାପ୍ରାପ୍ତ ହେଉଛି।
ହୁଥିଙ୍କ ମୁଖପାତ୍ର ୟାହୟା ସାରି ରବିବାର ଏକ ଭିଡିଓ ବିବୃତ୍ତିରେ କହିଛନ୍ତି ଯେ, ଇସ୍ରାଏଲ ସହିତ ଜଡିତ ସମସ୍ତ ବାଣିଜ୍ୟିକ,ତୈଳ କିମ୍ବା ଅସ୍ତ୍ରଶସ୍ତ୍ର ପରିବହନକାରୀ ଜାହାଜ ଏବେ ସେମାନଙ୍କ ରାଡାରରେ ଅଛି। ସେ କହିଛନ୍ତି ଯେ ଯେପର୍ଯ୍ୟନ୍ତ ଗାଜା ଉପରେ ଇସ୍ରାଏଲୀୟ ଆକ୍ରମଣ ବନ୍ଦ ନହୁଏ, ସେପର୍ଯ୍ୟନ୍ତ ସେମାନେ ସେମାନଙ୍କର 'ସୈନ୍ୟ ପ୍ରତିରୋଧ' ଜାରି ରଖିବେ । ପୂର୍ବରୁ ମଧ୍ୟ ସେମାନେ ଆମେରିକୀୟ ଏବଂ ବ୍ରିଟିଶ ଜାହାଜକୁ ଚେତାବନୀ ଦେଇଥିଲେ, କିନ୍ତୁ ଏବେ ସେମାନେ ସେମାନଙ୍କର ପରିସର ବିସ୍ତାର କରିଛନ୍ତି ।
ହୁଥି ମାନେ ଏହା ମଧ୍ୟ କହିଛନ୍ତି ଯେ ସେମାନେ ସେହି ସମସ୍ତ ଦେଶକୁ ମଧ୍ୟ ଟାର୍ଗେଟ କରିବେ, ଯେଉଁ ମାନେ ଯେକୌଣସି ଭାବରେ ଇସ୍ରାଏଲକୁ ସମର୍ଥନ କରୁଛନ୍ତି। ସେ କହିଛନ୍ତି ଯେ,ଇସ୍ରାଏଲୀୟ ସ୍ୱାର୍ଥକୁ ସୁରକ୍ଷା ଦେଉଥିବା ପ୍ରତ୍ୟେକ ଜାହାଜ କମ୍ପାନୀ କିମ୍ବା ଦେଶ ସେମାନଙ୍କର ଟାର୍ଗେଟ ହେବ। ଏହା ଆନ୍ତର୍ଜାତୀୟ ସାମୁଦ୍ରିକ ବାଣିଜ୍ୟ ଉପରେ ଅଧିକ ଗଭୀର ପ୍ରଭାବ ପକାଇପାରେ । ବିଶେଷକରି ଲୋହିତ ସାଗର ଏବଂ ଭାରତ ମହାସାଗରର ମାର୍ଗରେ।
