ଭୁବନେଶ୍ୱର,୨୦/୦୧: ବିଜେଡି ଆରମ୍ଭ କରିଛି ଘର ସଜଡ଼ା ଅଭିଯାନ । ଯେଉଁମାନେ ଦଳ ଛାଡ଼ି ଯାଇଥିଲେ କିମ୍ବା ସେମାନଙ୍କୁ ଦଳରୁ ବହିଷ୍କାର କରାଯାଇଥିଲା, ସେମାନଙ୍କ ସହ ପୁଣି ଯୋଗାଯୋଗ କରାଯାଉଛି । ସେମାନଙ୍କୁ ଦଳକୁ ଫେରାଇ ଆଣିବାକୁ ଉଦ୍ୟମ କରାଯାଉଛି । ସେହି କ୍ରମରେ ବାଲେଶ୍ୱର ଜିଲ୍ଲା ରେମୁଣାର ପୂର୍ବତନ ବିଧାୟକ ସୁଧାଂଶୁ ପରିଡ଼ାଙ୍କ ଉପରୁ ବହିଷ୍କାର ଆଦେଶ ପ୍ରତ୍ୟାହାର କରିଛନ୍ତି ବିଜେଡି ସଭାପତି ନବୀନ ପଟ୍ଟନାୟକ ।
୨୦୨୩ ସେପ୍ଟେମ୍ୱର ୨୧ରେ ତତ୍କାଳୀନ ଖଣ୍ଡପଡ଼ା ବିଧାୟକ ସୌମ୍ୟ ରଞ୍ଜନ ପଟ୍ଟନାୟକ ଓ ଶ୍ରୀ ପରିଡ଼ାଙ୍କୁ ଦଳରୁ ବହିଷ୍କାର କରିଥିଲେ ନବୀନ । ସେତେବେଳେ ଶ୍ରୀ ପରିଡ଼ାଙ୍କ ନାମରେ ଦୁର୍ନୀତି ଅଭିଯୋଗ ଆସିଥିଲା । ତେଣୁ ବିଜେଡି ସୁଧାଂଶୁଙ୍କୁ ଦଳରୁ ବହିଷ୍କାର କରିବା ସହ ୨୦୨୪ ସାଧାରଣ ନିର୍ବାଚନରେ ବିଦ୍ୟାସ୍ମିତା ମହାଳିକଙ୍କୁ ଟିକଟ ଦେଇଥିଲା । ସୁଧାଂଶୁ ସ୍ୱାଧୀନ ଭାବେ ନିର୍ବାଚନ ଲଢ଼ି ମାତ୍ର ୬୮୩ ଖଣ୍ଡ ଭୋଟ ପାଇଥିଲେ । ସେହିପରି ରେମୁଣାରୁ ବିଜେଡିର ପୂର୍ବତନ ବିଧାୟକ ସୁଦର୍ଶନ ଜେନା ଦଳ ଛାଡ଼ି କଂଗ୍ରେସରେ ଯୋଗ ଦେଇ ନିର୍ବାଚନ ଲଢ଼ିଥିଲେ । ସୁଦର୍ଶନ ୧୨ ହଜାରରୁ ଅଧିକ ଭୋଟ ପାଇଥିଲେ । ତେବେ ସୁଧାଂଶୁଙ୍କ ସହ ବାଲେଶ୍ୱରର ପୂର୍ବତନ ସାଂସଦଙ୍କ ସମେତ ବିଜେଡିର ଗୋଟିଏ ବଡ଼ ଗୋଷ୍ଠୀର ମତଭେଦ ଥିଲା ଯାହା ଗତ ନିର୍ବାଚନରେ ପ୍ରତିଫଳିତ ହୋଇଥିଲା । ଉଭୟ ରେମୁଣା ନିର୍ବାଚନମଣ୍ଡଳୀ ଓ ବାଲେଶ୍ୱର ସଂସଦୀୟ କ୍ଷେତ୍ରରେ ବିଜେଡି ହାରିଥିଲା । ମାତ୍ର ବିଳମ୍ବରେ ହେଉ ପଛେ ବିଜେଡି ତା’ର ବଳ ଗୋଟାଇବାକୁ ଆରମ୍ଭ କରିଛି । ତେଣୁ ଦଳରୁ ବହିଷ୍କାର ହୋଇଥିବା ନେତା ଓ କୋଣଠେସା ନେତାମାନଙ୍କୁ ପୁଣି ଦଳର ମୁଖ୍ୟସ୍ରୋତକୁ ଫେରାଇ ଆଣିବାକୁ ପ୍ରକ୍ରିୟା ଆରମ୍ଭ ହୋଇଥିବା ଦଳର ଜଣେ ବରିଷ୍ଠ ନେତା ସୂଚନା ଦେଇଛନ୍ତି ।
