ଚଣ୍ଡିଖୋଲ,୦୯/୧୧: ଜାବେରା ବ୍ରାହ୍ମଣୀ ସେତୁ ନିକଟରୁ ଏକ ବିରଳ ପକ୍ଷୀ ଛୁଆଟି ଉଦ୍ଧାର ହୋଇଛି । ବନ ବିଭାଗର କର୍ମଚାରୀ ପକ୍ଷୀଟିର ସ୍ୱାସ୍ଥ୍ୟାବସ୍ଥା ପରୀକ୍ଷା କରି ଚିକିତ୍ସା କରିଛନ୍ତି । ଏହି ପକ୍ଷୀ ଛୁଆଟି ଗରୁଡ଼ ପକ୍ଷୀ ବୋଲି ବନ ବିଭାଗ ପକ୍ଷରୁ ସୂଚନା ମିଳିଛି । ଯାଜପୁର ଜିଲ୍ଲା ଚଣ୍ଡିଖୋଲସ୍ଥିତ ଜାବେରା ବ୍ରାହ୍ମଣୀ ବ୍ରିଜ୍ ନିକଟରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଜାବେରା ବ୍ରାହ୍ମଣୀ ବ୍ରିଜ୍ ନିକଟରେ ଏକ ବିରଳ ପକ୍ଷୀ ଛୁଆ ଦେଖିବାକୁ ପାଇଥିଲେ ସ୍ଥାନୀୟଲୋକେ । ଏ ନେଇ ସ୍ଥାନୀୟ ଲୋକେ ଗଡ଼ମଧୁପୁର ବନ ବିଭାଗକୁ ଖବର ଦେଇଥିଲେ । ଖବର ପାଇ ବନ ବିଭାଗର କର୍ମଚାରୀ ଉକ୍ତ ସ୍ଥାନରେ ପହଞ୍ଚି ପକ୍ଷୀଟିକୁ ଉଦ୍ଧାର କରିଥିଲେ । ଏହି ବିରଳ ପ୍ରଜାତିର ପକ୍ଷୀଟି ଗରୁଡ଼ ପକ୍ଷୀ ବୋଲି ବନ ବିଭାଗ ପକ୍ଷରୁ ସୂଚନା ଦିଆଯାଇଛି । ପକ୍ଷୀଟିର ସ୍ୱାସ୍ଥ୍ୟାବସ୍ଥା ପରୀକ୍ଷା କରାଯାଇ ଚିକିତ୍ସା କରାଯାଇଛି । ଏ ନେଇ ଉପସ୍ଥିତ ଅଧିକାରୀଙ୍କୁ ଅବଗତ କରାଯାଇ ଥିବା ଫରେଷ୍ଟର କହିଛନ୍ତି । ପକ୍ଷୀ ଛୁଆଟି ଏଠାକୁ କେଉଁଭଳି ଆସିଲା, ସେ ନେଇ ବନ ବିଭାଗ ପକ୍ଷରୁ ତଦନ୍ତ ଜାରି ରହିଛି ।
