ନୂଆଦିଲ୍ଲୀ: ଇଣ୍ଡୋନେସିଆର ପଶ୍ଚିମ ସୁମାତ୍ରା ପ୍ରଦେଶରେ ମଙ୍ଗଳବାର ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ୩୪ ଜଣ ଯାତ୍ରୀଙ୍କୁ ନେଇ ଯାଉଥିବା ଏକ ବସ୍ ପାହାଡ଼ ତଳକୁ ଓଲଟି ପଡ଼ିଛି । ଏହି ଦୁର୍ଘଟଣାରେ ପ୍ରାୟ ୧୨ ଜଣ ଯାତ୍ରୀଙ୍କ ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଛନ୍ତି। ପୋଲିସ ଏହି ଦୁର୍ଘଟଣା ସମ୍ପର୍କରେ ସୂଚନା ଦେଇଛି ।
ପଶ୍ଚିମ ସୁମାତ୍ରାର ଟ୍ରାଫିକ୍ ପୋଲିସ ନିର୍ଦ୍ଦେଶକ ରେଜା ଚୈରୁଲ ଆକବର ସିଦ୍ଦିକ କହିଛନ୍ତି ଯେ, ବସଟି ଉତ୍ତର ସୁମାତ୍ରା ପ୍ରଦେଶର ମେଦାନରୁ ଇଣ୍ଡୋନେସିଆର ରାଜଧାନୀ ଜାକର୍ତ୍ତା ଅଭିମୁଖେ ଯାଉଥିଲା। ଏହି ସମୟରେ ପଶ୍ଚିମ ସୁମାତ୍ରାର ପାଡାଙ୍ଗ ସହରର ଏକ ବସ୍ ଟର୍ମିନାଲ ନିକଟରେ ଏହାର ବ୍ରେକ୍ ସମ୍ଭବତଃ ଖରାପ ହୋଇଯାଇଥିଲା। ସେ କହିଛନ୍ତି ଯେ, ପୋଲିସ ଦୁର୍ଘଟଣାର କାରଣ ସଂପର୍କରେ ତଦନ୍ତ କରୁଛି ।
ଦୁର୍ଘଟଣାରୁ ବର୍ତ୍ତି ଯାଇଥିବା ଯାତ୍ରୀମାନେ କର୍ତ୍ତୃପକ୍ଷଙ୍କୁ କହିଛନ୍ତି ଯେ, ପାଡାଙ୍ଗର ଅନେକ ପାହାଡ଼ ଥିବା ଅଞ୍ଚଳରେ ବ୍ରେକ୍ ଫେଲ୍ ହୋଇଯିବାରୁ ଡ୍ରାଇଭର ଗାଡ଼ି ଉପରୁ ନିୟନ୍ତ୍ରଣ ହରାଇଥିଲେ । ୨୩ ଜଣ ଆହତଙ୍କୁ ନିକଟବର୍ତ୍ତୀ ଦୁଇଟି ହସ୍ପିଟାଲକୁ ପଠାଯାଇଛି। ସିଦ୍ଦିକ କହିଛନ୍ତି ଯେ, ଆହତଙ୍କ ମଧ୍ୟରୁ ୧୩ ଜଣଙ୍କ ଅବସ୍ଥା ସଙ୍ଗୀନ ରହିଛି । ଡ୍ରାଇଭରଙ୍କ ସମେତ ଅନେକଙ୍କ ଅବସ୍ଥା ଗୁରୁତର ଅଛି।
