ମୁମ୍ବାଇ,୧୩/୦୧: ଭୀଷଣ ସଡକ ଦୁର୍ଘଟଣା । ନାସିକ ମୁମ୍ବାଇ ହାଇୱେ ଫ୍ଲାଏଓଭରରେ ଏକ ମର୍ମନ୍ତୁଜ ସଡକ ଦୁର୍ଘଟଣା ହୋଇଛି । ଟେମ୍ପୋ ଓ ଟ୍ରକ୍ ଧକ୍କା ହେବାକୁ ୬ ଜଣଙ୍କର ମୃତ୍ୟୁ ହୋଇଛି । ୫ ଜଣ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ ୨ ଜଣଙ୍କ ସ୍ବାସ୍ଥ୍ୟବସ୍ଥା ଗୁରୁତର ରହିଛି । ଆହତଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଥିବା ନାସିକ ପୋଲିସ ପକ୍ଷରୁ ସୂଚନା ମିଳିଛି ।
ଗୋଟିଏ ମିନି ଟ୍ରକ ସହ ଟେମ୍ପୋ ଧକ୍କା ହେବା ଫଳରେ ଅକାଳରେ ୬ଟି ଜୀବନ ଦୀପ ଲିଭି ଯାଇଛି । ଦୁର୍ଘଟଣାରେ ଆହତ ୫ ଜଣଙ୍କୁ ନାସିକ ଜିଲ୍ଲା ଡାକ୍ତରଖାନାରେ ଭର୍ତ୍ତି କରାଯାଇଛି । ସେମାନଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ଗୁରୁତର ରହିଛି । ଟ୍ରକଟି ଆଇରନ ରଡ ନେଇ ନେଇ ଯାଉଥିବାବେଳେ ଟେମ୍ପୋ ସହ ଧକ୍କା ହୋଇଥିଲା ।
ପୋଲିସର ସୂଚନା ଅନୁସାରେ ନାସିକ ମୁମ୍ବାଇ ଜାତୀୟ ରାଜପଥରେ ଫ୍ଲାଏଓଭର ଆୟାପ୍ପା ମନ୍ଦିର ନିକଟରେ ଦୁର୍ଘଟଣା ହୋଇଛି । ଟେମ୍ପୋ ଟ୍ରାଭେଲରରେ ୧୬ ଜଣ ଲୋକ ଥିଲେ । ନିପାହାଡରେ ଏକ ଧାର୍ମିକ କାର୍ଯ୍ୟକ୍ରମରେ ଯୋଗ ଦେଇ ସେମାନେ ନାସିକର ସିଆଇଡିସିଓକୁ ଫେରୁଥିଲେ । ଏହି ସମୟରେ ଟେମ୍ପୋଟି ଏକ ଆଇରନ ରଡ ବୋଝେଇ ଟ୍ରକ୍ ସହ ଧକ୍କା ଦେଇଥିଲା ।
ଟେମ୍ପୋ ଡ୍ରାଇଭର ନିୟନ୍ତ୍ରଣ ହରାଇଥିଲେ । ଏହା ପରେ ଟମ୍ପୋଟି ଟ୍ରକକୁ ପଛରୁ ଧକ୍କା ଦେଇଥିଲା । ଘଟଣାସ୍ଥଳରେ ହିଁ ୬ ଜଣଙ୍କର ମୃତ୍ୟୁ ହୋଇଥିଲା । ମୁମ୍ବାଇ ନାସିକ ରାସ୍ତାରେ ଟ୍ରାଫିକ୍ ଜାମ ରହୁଛି । ଏତେ ଟ୍ରାଫିକ ରହୁଛି ଯେ ୩ରୁ୪ କିମି ଯିବାକୁ ପ୍ରାୟ ୪୫ମିନିଟ ଲାଗିଯାଉଛି ।ଦୁର୍ଘଟଣା ପରେ ପୋଲିସ ମାମଲା ରୁଜ୍ଜୁ କରି ତଦନ୍ତ ଆରମ୍ଭ କରିଛି ।
