ଆଳି,୦୫/୧୨: ଅଙ୍ଗରଖ ଗାଁରେ ସଶସ୍ତ୍ର ଡକାୟତି । ଦୁର୍ବୃତ୍ତଙ୍କ ଭୁଜାଲି ମାଡରେ ଶ୍ୱଶୁର ଏବଂ ବୋହୂ ଆକ୍ରାନ୍ତ ହୋଇଛନ୍ତି । ପରିବାର ଲୋକଙ୍କୁ ଆକ୍ରମଣ କରି ଘରୁ ଲକ୍ଷାଧିକ ଟଙ୍କାର ସୁନା ଗହଣା ସହ ନଗଦ ଟଙ୍କା ଲୁଟ୍ କରି ନେଲେ ଦୁର୍ବୃତ୍ତ । କେନ୍ଦ୍ରାପଡ଼ା ଜିଲ୍ଲା ଆଳି ଥାନା ଅନ୍ତର୍ଗତ ଅଙ୍ଗରଖ ଗାଁରେ ବୁଧବାର ରାତିରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଅଙ୍ଗାରଖ ଗାଁ ଠାରୁ କିଛି ଦୂରରେ ଏକ ନିଛାଟିଆ ସ୍ଥାନରେ ପ୍ରଭାକର ପ୍ରଧାନଙ୍କ ଘର । ପରିବାରର ସମସ୍ତ ସଦସ୍ୟ ଘରେ ଟିଭି ଦେଖୁଥିବା ବେଳେ ବୋହୂ ବାହାର ବାରଣ୍ଡାରେ ଗୁରୁବାର ଓଷା ପାଇଁ ଝୋଟି ପକାଉଥିଲେ । ଏହି ସମୟରେ ରାତି ପ୍ରାୟ ୮ ଟା ବେଳେ ୬ ଜଣ ଡକାୟତ ମୁଖା ପିନ୍ଧି ବାଡ଼ି ଓ ଦାଣ୍ଡ ପଟେ ଜଗି ରହିଥିଲେ । ସେମାନେ ଘରେ ପଶିବା ପରେ ପ୍ରଭାକର ବେକରେ ଭୁଜାଲି ଲଗାଇ ଭୟଭୀତ କରିଥିଲେ । ପରେ ପ୍ରଭାକର ଏବଂ ତାଙ୍କ ବୋହୂ ଅନୁସ୍ମିତାଙ୍କୁ ଖଣ୍ଡା ଭୁଜାଲି ସାହାଯ୍ୟରେ ମରଣାନ୍ତକ ଆକ୍ରମଣ କରିଥିଲେ । କେବଳ ସେତିକି ନୁହେଁ, ଅନୁସ୍ମିତା ଙ୍କ କାନ ରୁ କାନଫୁଲ ଝାମ୍ପିନେବା ସହ ତାଙ୍କ ମୁଣ୍ଡକୁ ଆଘାତ ମଧ୍ୟ ଦେଇଥିଲେ । ଫଳରେ ଘଟଣା ସ୍ଥଳରେ ଅନୁସ୍ମିତାଙ୍କ ପ୍ରବଳ ରକ୍ତସ୍ରାବ ହୋଇ ଥିଲା ଏବଂ ସେ ଆହତ ହୋଇଥିଲେ । ପରେ ଘରେ ଥିବା ଆଲମାରୀ ଓ ବାକ୍ସ ଭାଙ୍ଗି ଲୁଟ୍ କରିଥିଲେ । ପାଖାପାଖି ୪ ଲକ୍ଷରୁ ୫ ଲକ୍ଷ ଟଙ୍କାର ସୁନାଗହଣା ସହିତ ନଗଦ ପଚାଶହଜାର ଟଙ୍କା ଲୁଟେରା ମାନେ ଲୁଟ୍ କରି ନେଇଥିଲେ । ପରେ ଏନେଇ ଆଳି ଥାନାରେ ଏକ ଲିଖିତ ଅଭିଯୋଗ କରିଥିଲେ ପ୍ରଭାକର ଏବଂ ତାଙ୍କ ପରିବାର ଲୋକେ । ଉକ୍ତ ଅଭିଯୋଗ ଆଧାରରେ ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଚଳାଇଛି ଆଳି ପୋଲିସ।
