ଦୁବାଇ,୧୯/୧୨: ସଦ୍ୟ ପ୍ରକାଶିତ ଆଇସିସି ଟେଷ୍ଟ ବ୍ୟାଟିଂ ମାନ୍ୟତା ତାଲିକାରେ ଇଂଲଣ୍ଡର ଜୋ ରୁଟ୍ ପୁନର୍ବାର ଶୀର୍ଷ ସ୍ଥାନ ଫେରି ପାଇଛନ୍ତି । ଗତ ସପ୍ତାହରେ ସେ ଦ୍ୱିତୀୟକୁ ଖସିଥିଲେ । ତାଙ୍କ ସ୍ଥାନରେ ହ୍ୟାରୀ ବ୍ରୁକ୍ ପ୍ରଥମ କରି ଶୀର୍ଷ ସ୍ଥାନ ଦଖଲ କରିଥିଲେ । ନ୍ୟୁଜିଲାଣ୍ଡ ବିପକ୍ଷ ତୃତୀୟ ଟେଷ୍ଟରେ ସେ ଯଥାକ୍ରମେ ୩୨ ଓ ୫୪ ରନ୍ ସଂଗ୍ରହ କରିଥିଲେ । ଇଂଲଣ୍ଡ ଉକ୍ତ ଟେଷ୍ଟରେ ୪୨୩ ରନ୍ରେ ପରାଜିତ ହୋଇଥିଲା । ବ୍ରୁକ୍ ଉଭୟ ଇନିଂସରେ ୦ ଓ ୧ ରନ୍ କରି ଆଉଟ୍ ହୋଇଥିଲେ ।
ନ୍ୟୁଜିଲାଣ୍ଡର କେନ ୱିଲିୟମସନ ପୂର୍ବବତ ତୃତୀୟ ସ୍ଥାନରେ ରହିଥିଲେ ହେଁ ତୃତୀୟ ଟେଷ୍ଟ ସଫଳତା ପରେ ୨୮ ପଏଣ୍ଟ ଅର୍ଜନ କରିଥିଲେ । ସେ ଉଭୟ ଇନିଂସରେ ଯଥାକ୍ରମେ ୪୪ ଓ ୧୫୬ ରନ୍ ସଂଗ୍ରହ କରିଥିଲେ । ଭାରତୀୟଙ୍କ ମଧ୍ୟରେ ଯଶସ୍ୱୀ ଜୈସ୍ୱାଲ୍ ଚତୁର୍ଥ ସ୍ଥାନରେ ରହିଥିବାବେଳେ ରିଷଭ ପନ୍ତ ନବମ ସ୍ଥାନ ବଜାୟ ରଖିଛନ୍ତି । ଟେଷ୍ଟ ବୋଲିଂ ମାନ୍ୟତାରେ ଯଶପ୍ରୀତ ବୁମରା ଶୀର୍ଷ ସ୍ଥାନ ବଜାୟ ରଖିଛନ୍ତି । ଅଷ୍ଟ୍ରେଲିଆ ବିପକ୍ଷ ତୃତୀୟ ଟେଷ୍ଟରେ ସେ ୮ଟି ୱିକେଟ୍ ନେଇଥିଲେ । ଅନ୍ୟ ଭାରତୀୟଙ୍କ ମଧ୍ୟରେ ରବି ଅଶ୍ୱିନ ପଞ୍ଚମ ଓ ରବିନ୍ଦ୍ର ଜାଡେଜା ଷଷ୍ଠ ସ୍ଥାନରେ ରହିଛନ୍ତି।
