ରାଉରକେଲା,୦୪/୦୮: ରାଉରକେଲା ଇସ୍ପାତ କାରଖାନା (ଆରଏସପି) ଚଳିତ ଆର୍ଥିକ ବର୍ଷ ୨୦୨୫-୨୬ର ଏପ୍ରିଲ-ଜୁଲାଇ ଅବଧିରେ ପ୍ରମୁଖ ୟୁନିଟ୍ଗୁଡ଼ିକରେ ଉତ୍କୃଷ୍ଟ ପ୍ରଦର୍ଶନ ହାସଲ କରିଛି । ବ୍ଲାଷ୍ଟ ଫର୍ଣ୍ଣେସ୍-୫ (ବିଏଫ-୫) ‘ଦୁର୍ଗା' ଏପ୍ରିଲ-ଜୁଲାଇ ଅବଧିରେ ଏହାର ସର୍ବକାଳୀନ ଶ୍ରେଷ୍ଠ ପ୍ରଦର୍ଶନ ରେକର୍ଡ କରି ୧୦,୩୭,୮୪୪ ଟନ୍ ଉତ୍ତପ୍ତ ଧାତୁ ଉତ୍ପାଦନ କରିଛି ଏବଂ ୨୦୨୩ ମସିହାରେ ଅନୁରୂପ ଅବଧି ମଧ୍ୟରେ ହାସଲ କରିଥିବା ୯,୬୭,୦୯୭ ଟନ୍ ପୂର୍ବ ଶ୍ରେଷ୍ଠ ରେକର୍ଡକୁ ଅତିକ୍ରମ କରିଛି ।
ସେହିପରି, ବ୍ଲାଷ୍ଟ ଫର୍ଣ୍ଣେସ୍-୧ (ବିଏଫ- ୧) ‘ପାର୍ବତୀ' ୩,୬୧,୭୭୪ ଟନ୍ ଉତ୍ତପ୍ତ ଧାତୁ ଉତ୍ପାଦନ ପୂର୍ବକ ଏହାର ସର୍ବୋଚ୍ଚ ଏପ୍ରିଲ-ଜୁଲାଇ ଉତ୍ପାଦନ ହାସଲ କରିଛି ଏବଂ ୨୦୨୧ରେ ହାସଲ ହୋଇଥିବା ୩,୧୬,୧୯୯ ଟନ୍ ପୂର୍ବ ରେକର୍ଡକୁ ଅତିକ୍ରମ କରିଛି । ଉଲ୍ଲେଖନୀୟ ଯେ, ବିଏଫ-୧ ମଧ୍ୟ ୯୪,୦୧୫ ଟନ୍ ଉତ୍ତପ୍ତ ଧାତୁ ଟ୍ୟାପ୍ କରି ଏହାର ସର୍ବଶ୍ରେଷ୍ଠ ଜୁଲାଇ ମାସ ପ୍ରଦର୍ଶନ ପଞ୍ଜିକୃତ କରିଛି ।
ଷ୍ଟିଲ୍ ମେଲ୍ଟିଂ ସପ୍-୨ର କାଷ୍ଟର-୩ ମଧ୍ୟ ଉଲ୍ଲେଖନୀୟ ପ୍ରଦର୍ଶନ ସହକାରେ ୫,୨୫,୨୧୩ ଟନ୍ ସ୍ଲାବ୍ ତିଆରି କରି ଏ ପର୍ଯ୍ୟନ୍ତ ଏହାର ସର୍ବଶ୍ରେଷ୍ଠ ଏପ୍ରିଲ-ଜୁଲାଇ ପ୍ରଦର୍ଶନ ପଞ୍ଜିକୃତ କରିଛି । ଡାଉନଷ୍ଟ୍ରିମରେ, ହଟ୍ ଷ୍ଟ୍ରିପ୍ ମିଲ୍-୨ ସର୍ବକାଳୀନ ଶ୍ରେଷ୍ଠ ୮,୫୯,୧୯୨ ଟନ୍ ସ୍ଲାବ୍ ରୋଲ୍ କରି ୮,୩୯,୦୨୩ ଟନ୍ ଏଚ୍ଆର କଏଲ୍ ଉତ୍ପାଦନ କରିଛି । ଯାହା ଏପ୍ରିଲ-ଜୁଲାଇରେ ବିଭାଗର ସର୍ବକାଳୀନ ଶ୍ରେଷ୍ଠ ପ୍ରଦର୍ଶନ ରହିଛି । ଏଥିପୂର୍ବରୁ ୨୦୨୪ ମସିହା ଅନୁରୂପ ଅବଧିରେ ୮,୧୭,୬୭୫ ଟନ୍ ଏଚ୍ଆର କଏଲ୍ ଉତ୍ପାଦନ ବିଭାଗର ପୂର୍ବ ଶ୍ରେଷ୍ଠ ପ୍ରଦର୍ଶନ ଥିଲା । ଏଚ୍ଏସ୍ଏମ୍୨ର ସିଟ୍ ସିଅରିଂ ଲାଇନ୍ (ଏସଏସଏଲ) ପ୍ରଥମ ଚାରି ମାସରେ ୯୫୮୭୬ ଟନ୍ ଏଚ୍ଆର ପ୍ଲେଟ୍ ଉତ୍ପାଦନ କରି ଏକ ନୂତନ ମାନଦଣ୍ଡ ସ୍ଥାପନ କରିଛି ।
ନୂତନ ପ୍ଲେଟ୍ ମିଲ୍ (ଏନପିଏମ) ୩,୩୦,୭୮୯ ଟନ୍ ପ୍ଲେଟ୍ ରୋଲ୍ କରି ସର୍ବଶ୍ରେଷ୍ଠ ଏପ୍ରିଲ-ଜୁଲାଇ ପ୍ରଦର୍ଶନ ହାସଲ ପୂର୍ବକ ୨୦୨୧ରେ ହାସଲ ହୋଇଥିବା ପୂର୍ବ ଶ୍ରେଷ୍ଠ ୩,୧୦,୩୧୭ ଟନ୍ରେ ଉନ୍ନତି ଆଣିଛି । ଏନ୍ପିଏମ୍ ମଧ୍ୟ ୯୨୦୯୯ ଟନ୍ ପ୍ଲେଟ୍ ରୋଲ୍ କରି ଏହାର ସର୍ବକାଳୀନ ଶ୍ରେଷ୍ଠ ଜୁଲାଇ ପ୍ରଦର୍ଶନ ହାସଲ କରିଥିଲା । ସମତାଳରେ ପ୍ଲେଟ୍ ମିଲ୍ ମଧ୍ୟ ପ୍ରଥମ ଚାରି ମାସରେ ୧,୭୮,୭୫୨ ଟନ୍ ପ୍ଲେଟ୍ ରୋଲ କରି ୨୦୨୩ ଅନୁରୂପ ଅବଧିରେ ହାସଲ ହୋଇଥିବା ୧,୭୭,୨୨୬ ଟନ୍ ପ୍ଲେଟ୍ ରୋଲିଂ ରେକର୍ଡକୁ ଅତିକ୍ରମ କରିଛି ।
