ନୂଆଦିଲ୍ଲୀ,୯।୬: ରୁଷ ଓ ୟୁକ୍ରେନ୍ ମଧ୍ୟରେ ତିନି ବର୍ଷ ଧରି ଚାଲିଥିବା ଯୁଦ୍ଧ ଏବେ ଭୟଙ୍କର ରୂପ ନେଇଛି। ଗତ ରାତିରେ ୟୁକ୍ରେନ୍ ଉପରେ ଜୋରଦାର ହମଲା କରିଛି ରୁଷ। ପ୍ରାୟ ୪୭୯ଟି ଡ୍ରୋନ୍ ଓ ୨୦ଟି ମିସାଇଲ ମାଡ଼ କରିଛି। ଏହା ଏପର୍ଯ୍ୟନ୍ତର ସବୁଠାରୁ ବଡ଼ ଏୟାର ଷ୍ଟ୍ରାଇକ୍। ୟୁକ୍ରେନ୍ ବାୟୁସେନା କହିଛି ଏହି ଆକ୍ରମଣ ବିଶେଷ ଭାବରେ ଦେଶର ମଧ୍ୟ ଓ ପଶ୍ଚିମ ଅଞ୍ଚଳକୁ ଟାର୍ଗେଟ କରି କରାଯାଇଛି। ଗତ କିଛି ଦିନ ତଳେ ରୁଷର ଏୟାରବେସ୍କୁ ମଧ୍ୟ ଟାର୍ଗେଟ କରିଥିଲା ୟୁକ୍ରେନ। ଏହାପରେ ଏହି ଆକ୍ରମଣକୁ ରୁଷର ସବୁଠାରୁ ବଡ଼ ହମଲା ବୋଲି ମନେ କରାଯାଉଛି।
ୟୁକ୍ରେନ ବାୟୁସେନା ଦାବି କରିଛି ଯେ, ସେ ୨୭୭ ଡ୍ରୋନ୍ ଓ ୧୯ଟି ମିସାଇଲ ଆକାଶମାର୍ଗରେ ହିଁ ନଷ୍ଟ କରିଛି। ୟୁକ୍ରେନ୍ର ଦାବି ଅନୁସାରେ, ୧୦ଟି ଡ୍ରୋନ୍ ଓ ମିସାଇଲ ନିଜର ଲକ୍ଷ୍ୟ ପଯ୍ୟନ୍ତ ପହଁଞ୍ଚି ପାରିଥିଲା। ଆକ୍ରମଣରେ ଜଣେ ବ୍ୟକ୍ତି ଆହତ ହୋଇଛନ୍ତି। ୟୁକ୍ରେନ୍ ରାଷ୍ଟ୍ରପତି ଭୋଲ୍ଡିମିର ଜେଲେନସ୍କି କହିଛନ୍ତି, ପୂର୍ବ ଓ ଉତ୍ତର-ପୂର୍ବ ଦିଗରେ ସ୍ଥିତି ଖୁବ୍ ଖରାପ ଅଛି। ତେବେ ରୁଷ ଆକ୍ରମଣରେ ହୋଇଥିବା କ୍ଷତି ଉପରେ ଅଧିକ ସୂଚନା ଦେଇ ନାହାନ୍ତି ଜେଲେନସ୍କି। ୟୁକ୍ରେନକୁ ନିଜର ପାଶ୍ଚାତ୍ୟ ସହଯୋଗୀଙ୍କଠାରୁ ବିଶେଷକରି ଏୟାର ଡିଫେନ୍ସ ସିଷ୍ଟମର ଅଧିକ ସାହାଯ୍ୟ ଆବଶ୍ୟକ, କିନ୍ତୁ ଆମେରିକାର ନୀତି ଉପରେ ଅନିଶ୍ଚିତତା ଯୋଗୁଁ ସ୍ଥିତି ଦୁର୍ବଳ ରହିଛି।
ରୁଷ ମଧ୍ୟ ଦାବି କରିଛି ସେ ନିଜ ଅଞ୍ଚଳରେ ୟୁକ୍ରେନର ୪୯ଟି ଡ୍ରୋନକୁ ଖସାଇ ଦେଇଛି। ରୁଷିଆର ଭୋରୋନେଜ ଅଞ୍ଚଳରେ ୨୫ଟି ଡ୍ରୋନକୁ ଗୁଳି କରି ଖସାଇ ଦିଆଯାଇଥିଲା, ଯାହା ଫଳରେ ଏକ ଗ୍ୟାସ ପାଇପଲାଇନ କ୍ଷତିଗ୍ରସ୍ତ ହୋଇଥିଲା ଏବଂ ନିଆଁ ମଧ୍ୟ ଲାଗିଥିଲା। ମସ୍କୋଠାରୁ ୬୦୦ କିଲୋମିଟର ପୂର୍ବରେ ଥିବା ରୁଷର ଚୁଭାସିଆ ଅଞ୍ଚଳରେ ଥିବା ଏକ ଇଲେକ୍ଟ୍ରୋନିକ୍ ଓ୍ବାର ଫେୟାର ପ୍ଲାଣ୍ଟକୁ ଦୁଇଟି ୟୁକ୍ରେନୀୟ ଡ୍ରୋନ୍ ଆକ୍ରମଣ କରିଥିଲେ। ୟୁକ୍ରେନର ଜେନେରାଲ ଷ୍ଟାଫ୍ ଦାବି କରିଛନ୍ତି ଯେ ଏହାର ସ୍ୱତନ୍ତ୍ର ବାହିନୀ ରୁଷିଆର ନୋଭଗୋରୋଡ ଅଞ୍ଚଳର ସାଭାସଲେକା ଏୟାରଫିଲ୍ଡ ଉପରେ ଦୁଇଟି ରୁଷର ଲଢ଼ୁଆ ବିମାନକୁ ଗୁଳି କରି ଖସାଇ ଦେଇଛନ୍ତି।
