ନୂଆଦିଲ୍ଲୀ: ରୁଷ ପ୍ରତିରକ୍ଷା ମନ୍ତ୍ରୀ ଆଣ୍ଡ୍ରେଇ ବେଲୋସୋଭ ଭାରତୀୟ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ସହ ଫୋନରେ କଥା ହୋଇଛନ୍ତି । ରୁଷର ପ୍ରତିରକ୍ଷା ମନ୍ତ୍ରଣାଳୟ ଏକ ବିବୃତ୍ତିରେ ଏହି ସୂଚନା ଦେଇଛି । ମନ୍ତ୍ରଣାଳୟ କହିଛି ଯେ, ପାରସ୍ପରିକ ସମ୍ମାନ ଉପରେ ଆଧାର କରି ରୁଷ ଏବଂ ଭାରତ ମଧ୍ୟରେ ଏକ ଦୃଢ ଏବଂ ଦୀର୍ଘ ଦିନର ବନ୍ଧୁତା ରହିଛି। ଦ୍ୱିପାକ୍ଷିକ ସମ୍ପର୍କକୁ ମଜବୁତ କରିବା ଉପରେ ଦୁଇ ଦେଶର ନେତାଙ୍କ ମଧ୍ୟରେ ଆଲୋଚନା ହୋଇଛି।
ମନ୍ତ୍ରଣାଳୟ କହିଛି ଯେ, ଜୁଲାଇରେ ମସ୍କୋରେ ରାଷ୍ଟ୍ରପତି ଭ୍ଲାଦିମିର ପୁଟିନ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମଧ୍ୟରେ ହୋଇଥିବା ବୈଠକ ଏବଂ ଅକ୍ଟୋବରରେ କାଜାନରେ ହୋଇଥିବା ବ୍ରିକ୍ସ ଶିଖର ସମ୍ମିଳନୀରେ ହୋଇଥିବା ଆଲୋଚନାରେ ବିଶେଷ ରଣନୀତି ଗଭୀର ହୋଇଛି । ଏହି ବିବୃତ୍ତିରେ ବେଲୋସୋଭଙ୍କ ଉଦ୍ଧେଶ୍ୟରେ କୁହାଯାଇଛି ଯେ ସର୍ବୋଚ୍ଚ ସ୍ତରରେ ହୋଇଥିବା ସମସ୍ତ ଚୁକ୍ତିନାମାକୁ କାର୍ଯ୍ୟକାରୀ କରିବାକୁ ଆମେ ପ୍ରତିଶ୍ରୁତିବଦ୍ଧ।
ବିବୃତ୍ତି ଅନୁଯାୟୀ, ରୁଷ ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ, ରୁଷ ଏବଂ ଭାରତ ମଧ୍ୟରେ ସାମରିକ ସହଯୋଗ ସୁଦୃଢ ହେବ ।ସେମାନଙ୍କର ସାକ୍ଷାତ ଦୁଇ ଦେଶ ମଧ୍ୟରେ ପ୍ରତିରକ୍ଷା ଏବଂ ସୁରକ୍ଷା ସମ୍ପର୍କକୁ ଆହୁରି ମଜବୁତ କରିବ ।
ରୁଷର ପ୍ରତିରକ୍ଷା ମନ୍ତ୍ରଣାଳୟ ଆହୁରି ମଧ୍ୟ କହିଛି ଯେ ଏହି ସମୟରେ ଭାରତ ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ ଭାରତ ଉପରେ ଅନେକ ପ୍ରକାରର ସରକାରୀ ତଥା ବେସରକାରୀ ଚାପ ରହିଛି। କିନ୍ତୁ ଭାରତ ନିଷ୍ପତ୍ତି ନେଇଛି ଯେ ଏହା କେବଳ ରୁଷ ସହିତ ନିଜର ଘନିଷ୍ଠ ସମ୍ପର୍କକୁ ବଜାୟ ରଖିବ ନାହିଁ, ବରଂ ଏହି ସମ୍ପର୍କକୁ ଆହୁରି ଗଭୀର ଏବଂ ବିସ୍ତାର କରିବ । ଆମେ ସବୁବେଳେ ଆମର ରୁଷୀୟ ସାଥୀ ମାନଙ୍କ ସହିତ ରହିବୁ।
