ଖାରକିଭ: ୟୁକ୍ରେନର ଦ୍ୱିତୀୟ ବୃହତ୍ତମ ସହର ଖାରକିଭ୍ ରେ ଶନିବାର ଭୋରରୁ ରୁଷର ଏକ ଶକ୍ତିଶାଳୀ ଡ୍ରୋନ ଓ କ୍ଷେପଣାସ୍ତ୍ର ଆକ୍ରମଣର ଶିକାର ହୋଇଛି। ସହରର ମେୟର ଇଗୋର ଟେରେଖୋଭ ଏହାକୁ ୨୦୨୨ରେ ରୁଷର ଆକ୍ରମଣ ଆରମ୍ଭ ହେବା ପରେ ସବୁଠାରୁ ବଡ଼ ଆକ୍ରମଣ ବୋଲି କହିଛନ୍ତି। ଏହି ଆକ୍ରମଣରେ ୩ ଜଣଙ୍କର ମୃତ୍ୟୁ ହୋଇଥିବା ବେଳେ ୨୧ ଜଣ ଆହତ ହୋଇଛନ୍ତି। ଯେଉଁମାନଙ୍କ ମଧ୍ୟରେ ଜଣେ ଶିଶୁ ଓ ଜଣେ ୧୪ ବର୍ଷୀୟା ବାଳିକା ମଧ୍ୟ ଅଛନ୍ତି।
ଖାରକିଭ୍ ର ଆଞ୍ଚଳିକ ଗଭର୍ଣ୍ଣର ଓଲେହ ସିନିଏହୁବୋଭଙ୍କ ମୁତାବକ, ଏହି ଆକ୍ରମଣରେ ରୁଷ ପ୍ରାୟ ୫୩ଟି ଡ୍ରୋନ, ୪ଟି ଗାଇଡେଡ୍ ବମ୍ବ ଓ ଗୋଟିଏ କ୍ଷେପଣାସ୍ତ୍ର ବ୍ୟବହାର କରିଛି। ଏହା ଫଳରେ ସାଧାରଣ ନାଗରିକ ରହୁଥିବା ଅଞ୍ଚଳ ଓ ଶକ୍ତି ଭିତ୍ତିଭୂମିରେ ବ୍ୟାପକ କ୍ଷୟକ୍ଷତି ହୋଇଛି। ୟୁକ୍ରେନର ବିଦେଶ ମନ୍ତ୍ରୀ ଆନ୍ଦ୍ରି ସିବିହା ଏହାକୁ “ଆତଙ୍କବାଦ” କର୍ଯ୍ୟକଳାପ ବୋଲି କହିବା ସହ ଏହାର ଘୋର ନିନ୍ଦା କରିଛନ୍ତି।
ଏହା ପୂର୍ବରୁ ୟୁକ୍ରେନ ରୁଷର ୪ଟି ଏୟାରବେସ୍ରେ ଡ୍ରୋନ ଆକ୍ରମଣ କରିଥିଲା। ଯାହାକୁ କିଭ୍ ଯୁଦ୍ଧର ସବୁଠାରୁ ଦୂରଗାମୀ ଆକ୍ରମଣ ବୋଲି ଦାବି କରିଛି। ଏହି ଆକ୍ରମଣକୁ ରୁଷର ପ୍ରତିଶୋଧ ବୋଲି ଅନୁମାନ କରାଯାଉଛି। ଏହାସହ ଦେଶର ଅନ୍ୟ ଅଞ୍ଚଳ ଯଥା ଲିଭ୍, ଟେର୍ନୋପିଲ ଓ କିଭ୍କୁ ମଧ୍ୟ ଟାର୍ଗେଟ କରାଯାଇଛି ବୋଲି ସୂଚନା ମିଳିଛି।
ରାଷ୍ଟ୍ରପତି ଜେଲେନସ୍କି ରୁଷ ଉପରେ ଅଧିକ ଚାପ ସୃଷ୍ଟି କରିବା ପାଇଁ ଆନ୍ତର୍ଜାତୀୟ ସମୁଦାୟକୁ ଆହ୍ୱାନ ଦେଇଛନ୍ତି। ଖାରକିଭ, ଯାହା ରୁଷ ସୀମାନ୍ତ ନିକଟରେ ଅବସ୍ଥିତ, ଗତ ତିନି ବର୍ଷ ଧରି ନିରନ୍ତର ଭାବେ ଆକ୍ରମଣର ସାମ୍ନା କରୁଛି।
