ନୂଆଦିଲ୍ଲୀ,୧୩/୦୪: ଋଷ-ୟୁକ୍ରେନ ଯୁଦ୍ଧ ପୁଣି ଥରେ ଭୟଙ୍କର ହେବାକୁ ଯାଉଛି। ଋଷ ଏକ ବିପଜ୍ଜନକ ବାଲିଷ୍ଟିକ୍ କ୍ଷେପଣାସ୍ତ୍ର ସହିତ ୟୁକ୍ରେନର ସୁମି ଉପରେ ଆକ୍ରମଣ କରି ସୁମିରେ ବ୍ୟାପକ ଧ୍ୱଂସ ଘଟାଇଛି। ଏହି ଆକ୍ରମଣରେ ଅତି କମରେ ୨୧ ଜଣଙ୍କର ମୃତ୍ୟୁ ଘଟିଥିବା ଜଣାପଡ଼ିଛି। ଋଷର କ୍ଷେପଣାସ୍ତ୍ର ସହର ରାସ୍ତା, ସାଧାରଣ ଜୀବନ - ଆବାସିକ କୋଠା, ଶିକ୍ଷାନୁଷ୍ଠାନ, ରାସ୍ତାରେ କାରକୁ ଟାର୍ଗେଟ କରିଛି। ରବିବାର ଦିନ ଯେତେବେଳେ ଲୋକମାନେ ଚର୍ଚ୍ଚକୁ ଯାଉଥିଲେ ସେତେବେଳେ ଏହି ଆକ୍ରମଣ ହୋଇଥିଲା।
ଏହି ଆକ୍ରମଣ ଋଷ-ୟୁକ୍ରେନ ଯୁଦ୍ଧର ଏକ ନୂଆ ଅଧ୍ୟାୟ ଆରମ୍ଭ ହେବ ବୋଲି ବିବେଚନା କରାଯାଉଛି ଏବଂ ଏହା ପରେ ଯୁଦ୍ଧ ଏକ ବିପଜ୍ଜନକ ରୂପ ନେଇପାରେ। ପ୍ରାରମ୍ଭିକ ସୂଚନା ଅନୁଯାୟୀ, ପ୍ରାୟ ୨୧ ସାଧାରଣ ନାଗରିକଙ୍କର ମୃତ୍ୟୁ ଘଟିଥିଲା ଏବଂ ଅନେକ ଲୋକ ଆହତ ହୋଇଥିଲେ। ଉଦ୍ଧାର କାର୍ଯ୍ୟ ଚାଲିଛି ଏବଂ ସମସ୍ତ ଜରୁରୀ ସେବା ଘଟଣାସ୍ଥଳରେ କାର୍ଯ୍ୟ କରୁଛି ବୋଲି ଅଧିକାରୀମାନେ ସୂଚନା ଦେଇଛନ୍ତି।
ଜେଲେନସ୍କିଙ୍କ ଦ୍ବାରା ଜାରି ବିବୃତ୍ତିରେ କୁହାଯାଇଛି ଯେ ବିଶ୍ବ ଏହାର ଜବାବ ଦେବା ଉଚିତ୍। ଯୁକ୍ତରାଷ୍ଟ୍ର, ୟୁରୋପ, ଦୁନିଆର ସମସ୍ତେ ଏହି ଯୁଦ୍ଧ ଏବଂ ଏହି ହତ୍ୟାକାଣ୍ଡକୁ ଶେଷ କରିବାକୁ ଚାହୁଁଛନ୍ତି। ଋଷ ଚାହୁଁଛି ଏବଂ ଏହି ଯୁଦ୍ଧକୁ ଟାଣି ନେଉଛି। ଋଷ ଉପରେ ଚାପ ବିନା ଶାନ୍ତି ଅସମ୍ଭବ। କଥାବାର୍ତ୍ତା କେବେ ବାଲିଷ୍ଟିକ୍ କ୍ଷେପଣାସ୍ତ୍ର ଏବଂ ଏରିଲ୍ ବୋମାକୁ ବନ୍ଦ କରିବ ନାହିଁ। ଋଷ କେବଳ ଆତଙ୍କବାଦୀ ସ୍ବରୁପ ମନୋଭାବ ରଖୁଛି। କ୍ଷେପଣାସ୍ତ୍ର ଦ୍ବାରା ହୋଇଥିବା ବ୍ୟାପକ ଧ୍ୱଂସ ସୋସିଆଲ ମିଡିଆରେ ସେୟାର ହୋଇଥିବା ଚିତ୍ରରେ ସ୍ପଷ୍ଟ ଭାବରେ ଦେଖିବାକୁ ମିଳିଛି। ଯେଉଁଥିରେ ଅନେକ ଯାନବାହଦ କ୍ଷତିଗ୍ରସ୍ତ ହୋଇଛି ଏବଂ ବଡ଼ ବଡ଼ ଅଟ୍ଟାଳିକା ମଧ୍ୟ କ୍ଷତିଗ୍ରସ୍ତ ହୋଇଛି। ଏହି ଆକ୍ରମଣ ସାଉଦି ଆରବରେ ଗତ ମାସରେ ଅନୁଷ୍ଠିତ ଏକ ସଭାରେ ସକାରାତ୍ମକ ସିଦ୍ଧାନ୍ତରେ ପହଞ୍ଚିଥିବା ଅସ୍ତ୍ରବିରତି ଆଲୋଚନାକୁ କ୍ଷତି ପହଞ୍ଚାଇଛି।
