ନୂଆଦିଲ୍ଲୀ,୫।୬:  RIC ଅର୍ଥାତ ରୁଷ-ଭାରତ ଓ ଚୀନ୍ ତ୍ରିପାକ୍ଷିକ ସମୁହକୁ ପୁଣି ଠିଆ କରିବାକୁ ଭାରତ ପ୍ରସ୍ତୁତ। ବନ୍ଧୁ ରାଷ୍ଟ୍ର ରୁଷର ପ୍ରସ୍ତାବକୁ ଗ୍ରହଣ କରିପାରେ। ଏପରିକି ଆମେରିକାର ଚାପ ମଧ୍ୟ କରିପାରିବନି ପ୍ରଭାବିତ। ଯାହାକି ଭାରତର ସ୍ବତନ୍ତ୍ର ବୈଦେଶିକ ନୀତିକୁ ଦର୍ଶାଉଛି। ତେବେ ଚୀନ୍ ସହ ବିଶ୍ବାସର ଅଭାବ ଆଗକୁ ସାଜିପାରେ ଚ୍ୟାଲେଞ୍ଜ।

ଗତ କିଛି ମାସରେ ବିଶ୍ବମଞ୍ଚରେ ଭୂ-ରାଜନୈତିକ ସମୀକରଣ ବଦଳିବାରେ ଲାଗିଛି। ଗୋଟିଏ ପଟେ ଆମେରିକା ରାଷ୍ଟ୍ରପତି ଡୋନାଲ୍ଡୋ ଟ୍ରମ୍ପ ନିଜର ଆକ୍ରାମକ ବାଣିଜ୍ୟ ନୀତି ଓ କୁଟନୈତିକ ଚାପ ବଢାଇବାରେ ଲାଗିଛନ୍ତି। ତେବେ ଭାରତ ନିଜର ସ୍ବତନ୍ତ୍ର ବୈଦେଶିକ ନୀତିକୁ ଆହୁରି ମଜବୁତ କରିବା ଦିଗରେ ଆଗକୁ ବଢୁଛି। ଏହା ଭିତରେ ଭାରତର ପୁରୁଣା ଓ ଭରସାଯୋଗ୍ୟ ବନ୍ଧୁ ରୁଷ-ଭାରତ-ଚୀନ୍‌ (ଆଇଆଇସି) ତ୍ରିପାକ୍ଷିକ ଶିଖର ସମ୍ମିଳନୀକୁ ପୁଣିଥରେ ଆରମ୍ଭ କରିବାର ପ୍ରସ୍ତାବ ରଖିଛି। ଏହାକୁ ଭାରତ ସକାରତ୍ମକ ଭାବରେ ନେଇଛି। ଏବେ କେବଳ ପ୍ରସ୍ତାବକୁ ମଞ୍ଜୁରୀ ଦେବାର ବାକି ଅଛି।

RIC ର ଆରମ୍ଭ ୧୯୯୦ ଦଶକରେ ରୁଷର ତତ୍କାଳୀନ ପ୍ରଧାନମନ୍ତ୍ରୀ ୟେଭେଗେନି ପ୍ରିମାକୋଭ ଆରମ୍ଭ କରିଥିଲେ। ଏହାର ଉଦେଶ୍ୟ ଥିଲା ଏଭଳି ବ୍ୟବସ୍ଥା ତିଆରି କରାଯିବ ଯେପରି ପାଶ୍ଚାତ୍ୟ ଦେଶ, ବିଶେଷ ଭାବରେ ଆମେରିକାର ନେତୃତ୍ବକୁ ଚ୍ୟାଲେଞ୍ଜ ଦେବା। ତେବେ ୨୦୨୦ ରେ ଭାରତ-ଚୀନ୍ ମଧ୍ୟରେ ଗଲଓ୍ବାନ ଘାଟିରେ  ସଂଘର୍ଷ ପରେ ଆରଆଇସି ନିଷ୍କ୍ରିୟ ହୋଇଯାଇଥିଲା। ଭାରତ-ଚୀନ୍ ଭିତରେ ବିବାଦ ଏତେ ବଢି ଯାଇଥିଲା ଯେ, ଦୁଇ ଦେଶର ନେତା ପରସ୍ପର ଦ୍ବିପାକ୍ଷିକ ଆଲୋଚନା ମଧ୍ୟ ବନ୍ଦ କରିଦେଇଥିଲେ। ଏହି ସମୟରେ ଆମେରିକା,ଜାପାନ ଓ ଅଷ୍ଟେ୍ରଲିଆ ସହ ଭାରତ କ୍ବାଡ ମେଣ୍ଟକୁ ଆହୁରି ମଜବୁତ କରିଥିଲା। ଯାହାକୁ ଚୀନ୍ ବିରୋଧରେ ଏକ ରଣନୈତିକ ପଦକ୍ଷେପ ଭାବରେ ଦେଖାଯାଉଥିଲା। ଅନ୍ୟପକ୍ଷେ ଭାରତ ଓ ଚୀନ ଭିତରେ ମଧ୍ୟସ୍ଥତା କରିବାକୁ ଚେଷ୍ଟା କରିଥିଲା ରୁଷ।