ନୂଆଦିଲ୍ଲୀ: ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ୍‌ ଭାରତ ଆସିବେ । ବିଶ୍ବର ଅନ୍ୟତମ ଶକ୍ତିଶାଳୀ ରାଷ୍ଟ୍ର ଋଷର ରାଷ୍ଟ୍ରପତି ଭାରତ ଗସ୍ତରେ ଆସିବେ ବୋଲି ଜଣାପଡ଼ିଛି । ପୁଟିନ କେବେ ଭାରତ ଆସିବେ ସେନେଇ ତାରିଖ ଖୁବଶୀଘ୍ର ଘୋଷଣା ହେବ । ନିକଟ ଭବିଷ୍ୟତରେ ଭ୍ଲାଦିମିର ପୁଟିନ୍‌ ଭାରତ ଗସ୍ତ କରିବେ ବୋଲି ମଙ୍ଗଳବାର କ୍ରେମଲିନ୍‌ ମୁଖପାତ୍ର ଦିମିତ୍ରି ପେସକୋଭ୍‌ ସୂଚନା ଦେଇଛନ୍ତି । ଯଦିଓ ପୁଟିନଙ୍କ ଗସ୍ତ ତାରିଖ ଘୋଷଣା ହୋଇନାହିଁ, କିନ୍ତୁ ପୁଟିନ ଭାରତ ଆସିଲେ ଦୁଇ ବନ୍ଧୁ ରାଷ୍ଟ୍ରଙ୍କ ମଧ୍ୟରେ ଥିବା ସଂପର୍କ ଆହୁରି ମଜଭୁତ ହେବ । ସେପଟେ ନୂଆଦିଲ୍ଲୀ ପକ୍ଷରୁ ଏନେଇ କୌଣସି ସ୍ପଷ୍ଟ ସୂଚନା ମିଳିନାହିଁ ।

ପୁଟିନଙ୍କ ଭାରତ ଗସ୍ତକୁ ନେଇ ଦିମିତ୍ରି ପେସକୋଭ୍‌ କହିଛନ୍ତି, ‘ଖୁବଶୀଘ୍ର ତାରିଖ ଘୋଷଣା ହେବ ବୋଲି ଆଶା କରୁଛି । ପ୍ରଧାନମନ୍ତ୍ରୀ ମୋଦୀ ଦୁଇ ଦୁଇ ଥର ଋଷ ଗସ୍ତ କରିବା ପରେ ନିଶ୍ଚିତ ଭାବେ ଆମ ରାଷ୍ଟ୍ରପତି ଭାରତ ଗସ୍ତ କରିବେ । ତେଣୁ ଆମେ ଏଥିପ୍ରତି  ଯତ୍ନବାନ ରହିଛୁ ।’ ଚଳିତ ବର୍ଷ ଭାରତ ଏବଂ ଋଷ ନେତାଙ୍କ ମଧ୍ୟରେ ଅନେକ ଥର ଆଲୋଚନା ହୋଇଛି । ଦ୍ବିପାକ୍ଷିକ ସଂପର୍କ ସୁଦୃଢ଼ କରିବା ଉପରେ ଦୁଇ ଦେଶ ଜୋର ଦେଇଛନ୍ତି । ଗତ ସପ୍ତାହରେ ଋଷର ଉପ ପ୍ରଧାନମନ୍ତ୍ରୀ ଡେନିସ୍‌ ମାଣ୍ଟ୍ରୋଭ ପ୍ରଧାନମନ୍ତ୍ରୀ ମୋଦୀଙ୍କ ସହ ଭାରତ-ଋଷ ସହଯୋଗ ଉପରେ ଆଲୋଚନା କରିଥିଲେ ।  




ସୂଚନାଯୋଗ୍ୟ, ଗତ ମାସ କାଜାନରେ ଆୟୋଜତି ୧୬ ତମ ବ୍ରିକ୍ସ ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଋଷ ରାଷ୍ଟ୍ରପତି ଭ୍ଲାଦିମିର ପୁଟନଙ୍କୁ ସାକ୍ଷାତ କରିଥିଲେ । ଏହି ଅବସରରେ   ୨୦୨୫ରେ ହେବାକୁ ଥିବା ୨୩ ତମ ଭରତ-ଋଷ ବାର୍ଷିକ ସମିଟ୍‌ରେ ଯୋଗ ଦେବାକୁ ପୁଟିନଙ୍କୁ ଆମନ୍ତ୍ରଣ କରିଥିଲେ ପ୍ରଧାନମନ୍ତ୍ରୀ ମୋଦୀ ।    ଏହା ପୂର୍ବରୁ ଜୁଲାଇରେ ପ୍ରଧାନମନ୍ତ୍ରୀ ମୋଦୀ ଋଷିଆ ଗସ୍ତ କରିଥିଲେ । ୨୦୨୨ରେ ଆରମ୍ଭ ହୋଇଥିବା ଯୁଦ୍ଧ ପରେ ଏହା ଭାରତୀୟ ପ୍ରଧାନମନ୍ତ୍ରୀଙ୍କ ପ୍ରଥମ ଋଷ ଗସ୍ତ ଥିଲା ।