ଯାଜପୁରସଦର,୩୦ା୩(ଆପ୍ର): ଯାଜପୁର ଜିଲ୍ଲାର ଅଧିଷ୍ଠାତ୍ରୀ ଦେବୀ ମା’ ବିରଜାଙ୍କ ମନ୍ଦିରରେ ଢ଼ିଲା ସୁରକ୍ଷା ବ୍ୟବସ୍ଥା ଯୋଗୁଁ ଆଜି ଏକ ଅଭାବନୀୟ ଘଟଣା ଘଟିଯାଇଛି । ରବିବାର ଅପରାହ୍ଣରେ ୨୦ ରୁ ୨୫ ଜଣ ବିଦେଶୀ ପର୍ଯ୍ୟଟକ ସୁରକ୍ଷାକର୍ମୀଙ୍କୁ ନାଲିଆଖି ଦେଖାଇ ମନ୍ଦିର ଭିତରେ ପ୍ରବେଶ କରିବା ସହ ପ୍ରାୟ ୨୦ମିନିଟ୍ ଧରି ଭିତରେ ବୁଲାବୁଲି କରିଥିବାର ଦୃଶ୍ୟ ଦେଖିବାକୁ ମିଳିଥିଲା । ଏଭଳି ଘଟଣା ଦେଖି ମନ୍ଦିର ପରିସରରେ ଥିବା ସେବାୟତ, ଶ୍ରଦ୍ଧାଳୁ ଆଶ୍ଚର୍ଯ୍ୟଚକିତ ହୋଇପଡ଼ିଥିବା ବେଳେ ମନ୍ଦିର ସୁରକ୍ଷା ଦାୟିତ୍ୱରେ ଥିବା ପୁଲିସର ଅକଲ ଗୁଡ଼ୁମ ହୋଇଯାଇଥିଲା । ପରେ ସେବାୟତ ଓ ପୁଲିସର ମିଳିତ ଉଦ୍ୟମରେ ସମସ୍ତ ବିଦେଶୀ ପର୍ଯ୍ୟଟକଙ୍କୁ ମନ୍ଦିର ବାହାରକୁ ଅଣାଯାଇଥିଲା ।
ଖବର ପ୍ରଚାରିତ ହେବା ପରେ ମନ୍ଦିରର ସୁରକ୍ଷା ବ୍ୟବସ୍ଥାକୁ ନେଇ ସ୍ଥାନୀୟ ବାସିନ୍ଦା ଓ ବୁଦ୍ଧିଜୀବୀ ମହଲରେ ଉତ୍ତେଜନା ପ୍ରକାଶ ପାଇଥିବା ଜଣାପଡ଼ିଛି । ଅପରାହ୍ଣ ପ୍ରାୟ ପ୍ରାୟ ୩ଟା ୪୫ରେ ୨୦ ରୁ ୨୫ଜଣ ଋଷୀୟ ପୁରୁଷ ଓ ମହିଳା ପର୍ଯ୍ୟଟକ ଏକ ଟ୍ରାଭେଲର୍ସ ଗାଡ଼ିରୁ ଓହ୍ଲାଇ ମନ୍ଦିର ଉତ୍ତରପାଶ୍ୱର୍ରେ ଖୋଲାଥିବା ପ୍ରବେଶ ପଥ ଦେଇ ମନ୍ଦିର ଭିତରକୁ ପ୍ରବେଶ କରିଥିଲେ । ପ୍ରବେଶ ପଥରେ ଉପସ୍ଥିତ ସୁରକ୍ଷାକର୍ମୀ ସେମାନଙ୍କୁ ଅଟକାଇବାରୁ ସେମାନେ ନାଲିଆଖି ଦେଇ ଜବରଦସ୍ତ ଭିତରକୁ ପଶିଥିଲେ । ଭିତରେ ସେମାନେ ଦଳବଦ୍ଧ ଭାବେ ବୁଲାବୁଲି କରିଥିଲେ । କିଏ ମୋବାଇଲ୍ରେ ମନ୍ଦିର ଫଟୋ ଉତ୍ତୋଳନ କରୁଥିଲା ତ ଆଉ କିଏ ମନ୍ଦିର ସମ୍ମୁଖରେ ସେଲ୍ଫ ି ନେଉଥିଲା । ଏହି ଦୃଶ୍ୟ ଦେଖି ମନ୍ଦିରରେ ଥିବା ସେବାୟତ ଓ ଶ୍ରଦ୍ଧାଳୁ ମନ୍ଦିର ସୁରକ୍ଷାରେ ଥିବା ପୁଲିସ କର୍ମଚାରୀଙ୍କୁ ଡ଼ାକିଥିଲେ । ସୁରକ୍ଷା କର୍ମଚାରୀ, ସେବାୟତ ଓ କିଛି ଶ୍ରଦ୍ଧାଳୁଙ୍କ ଉଦ୍ୟମରେ ପ୍ରାୟ ୨୦ ମିନିଟ ପରେ ସମସ୍ତ ବିଦେଶୀ ପର୍ଯ୍ୟଟକଙ୍କୁ ମନ୍ଦିର ବାହାରକୁ ଅଣାଯାଇଥିଲା । ଏଥିପାଇଁ ମନ୍ଦିର ସୁରକ୍ଷାରେ ଥିବା କର୍ମଚାରୀଙ୍କ ଅବହେଳାକୁ ଦାୟୀ କରାଯାଇଥିବା ବେଳେ ମନ୍ଦିରରେ ବାରମ୍ବାର ଏଭଳି ଘଟଣା ଘଟୁଥିବାରୁ ଜିଲ୍ଲା ପ୍ରଶାସନ ପକ୍ଷରୁ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି ।
