ମୁମ୍ବାଇ,୩୦/୧୧: ବର୍ତ୍ତମାନ ସାଉଥ ଅଭିନେତ୍ରୀ ସାମନ୍ଥା ରୁଥ୍ ପ୍ରଭୁଙ୍କ ଉପରେ ଏକ ଦୁଃଖର ବାଦଲ ଛାଇଯାଇଛି । ଅଭିନେତ୍ରୀଙ୍କ  ପିତା ଜୋଶେଫ ପ୍ରଭୁଙ୍କ ହୋଇଛି ଦେହାନ୍ତ। ଏନେଇ  ଅଭିନେତ୍ରୀ ସାମନ୍ଥା ରୁଥ୍ ସୋସିଆଲ ମିଡ଼ିଆରେ ଏକ ପୋଷ୍ଟ ସେୟାର କରି ସୂଚନା ଦେଇଛନ୍ତି । ତେବେ ଜୋଶେଫଙ୍କ ମୃତ୍ୟୁର କାରଣ ଅସ୍ପଷ୍ଟ ରହିଥିବା ଜଣାପଡିଛି । ତେବେ ତାଙ୍କ ଦେହାନ୍ତରେ ଫିଲ୍ମ ଇଣ୍ଡଷ୍ଟ୍ରି ସହ ଜଡ଼ିତ ଅନେକ କଳାକାର, ବନ୍ଧୁ, ପରିଜନ ଓ ଅଗଣିତ ପ୍ରଶଂସକମାନେ ସାମନ୍ଥାଙ୍କୁ  ସମବେଦନା ଜଣାଇଛନ୍ତି । 

ଜୋଶେଫ ପ୍ରଭୁ ଓ ନିନେଟ୍ଟେ ପ୍ରଭୁଙ୍କ ଝିଅ   ସାମନ୍ଥା ଚେନ୍ନାଇରେ ଜନ୍ମଲାଭ କରିଥିଲେ । ପୂର୍ବରୁ ଏକ ସାକ୍ଷାତକାର ଅବସରରେ ସାମନ୍ଥା ପିତାଙ୍କ ସହ ଥିବା ନିବିଡ଼ ସମ୍ପର୍କକୁ ନେଇ ଖୁଲାସା କରିଥିଲେ । ତାଙ୍କ ପିତା ସର୍ବଦା ତାଙ୍କ ପାଇଁ ପ୍ରେରଣାଦାତାର ଭୂମିକା ନିର୍ବାହ କରିବା ସହ ତାଙ୍କର ଆତ୍ମବିଶ୍ୱାସ ବଢ଼ାଇବା ଦିଗରେ ସହାୟକ ହୋଇଥିବା ସାମନ୍ଥା ପ୍ରକାଶ କରିଥିଲେ । ଏନେଇ ସାମନ୍ଥା ପିତାଙ୍କ ସହ ଅତୀତରେ ବିତାଇଥିବା କିଛି ଗୌରମବୟ ମୁହୂର୍ତ୍ତକୁ ମନେପକାଇଛନ୍ତି ।  ସୂଚନାଯୋଗ୍ୟ ଯେ, ନାଗା ଚୈତନ୍ୟଙ୍କୁ ଅଲଗା ହେବାର ୧ ବର୍ଷ ପରେ  ଜୋଶେଫ ୨୦୨୨ରେ ସାମନ୍ଥାଙ୍କର ବିବାହ ସମୟର ଫଟୋ ଫେସବୁକରେ ସେୟାର କରିଥିଲେ ।