ପାଟଣାଗଡ, ୨୬।୬(ଆପ୍ର) : ପାଟଣାଗଡ଼ ବ୍ଳକ ଓ ଏନ୍ଏସିରେ ଦୀର୍ଘ ଆଠ ମାସ ହେଲା ବିଭିନ୍ନ ଉନ୍ନୟନମୂଳକ କାମ ଠପ୍ ହୋଇଯାଇଛି। ଏହାରି ପ୍ରତିବାଦରେ ବିଡ଼ିଓ କାର୍ଯ୍ୟାଳୟ ଓ ଏନ୍ଏସି କାର୍ଯ୍ୟାଳୟ ସମ୍ମୁଖରେ ଜନପ୍ରତିନିଧିଙ୍କ ଧାରଣା ୩ୟ ଦିନରେ ପହଞ୍ଚିଛି। ଜନପ୍ରତିନିଧିମାନଙ୍କୁ ପ୍ରଶାସନିକ ଅଧିକାରୀମାନଙ୍କ ଦ୍ଵାରା ଉପେକ୍ଷା ସହ ପାତରଅନ୍ତର କରୁଥିବା ନେଇ ଧାରଣାରତ ସମିତି ସଭ୍ୟସଭ୍ୟା ଓ କାଉନସିଲର ଅଭିଯୋଗ ଆଣିଛନ୍ତି।
ସୋମବାର ଠାରୁ ଏହି ଆନ୍ଦୋଳନକୁ ଆହୁରି ଜୋରଦାର କରାଯିବା ବୋଲି ବ୍ଳକ ଉପାଧ୍ୟକ୍ଷା ଲକ୍ଷ୍ମୀ ମାଝୀ, ସମିତି ସଭ୍ୟ ସଂଘ ସଭାପତି ଗୋବିନ୍ଦ ମେହେର, ଫଟାମୁଣ୍ଡା ସମିତି ସଭ୍ୟ ଜୟନ୍ତ କୁମ୍ଭାର, ଖୁଣ୍ଟସମଲାଇ ସମିତି ସଭ୍ୟା ସାବିତ୍ରୀ ନାଗ,ଶଙ୍କର ବାଗ, ଅଭିମନ୍ୟୁ ବାରଲେଣ୍ଡିଆ, କଳ୍ପନା ବାରିକ,ଭୂମିସୁତା ଧରୁଆ ସୂଚନା ଦେଇଛନ୍ତି। ଅପରପକ୍ଷରେ ଧାରଣାରତ କାଉନସିଲରମାନେ ମଧ୍ୟ ଏହି ଆନ୍ଦୋଳନକୁ ସୋମବାରରୁ ତିବ୍ରତର କରାଯିବ ବୋଲି ଏନ୍ଏସି ଅଧ୍ୟକ୍ଷା ମାନସୀ ବିଶ୍ଵାଳ କହିଛନ୍ତି।
