ଭୁବନେଶ୍ବର ୦୮/୦୮: ପ୍ରଖ୍ୟାତ ଶିକ୍ଷାବିଦ ପ୍ରଫେସର ଶାନ୍ତନୁ କୁମାର ସ୍ୱାଇଁଙ୍କୁ ସିକ୍କିମ ବିଶ୍ୱବିଦ୍ୟାଳୟର ନୂତନ କୁଳପତି ଭାବରେ ନିଯୁକ୍ତ କରାଯାଇଛି। ଏହି ନିଯୁକ୍ତି ଭାରତର ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁଙ୍କ ଦ୍ୱାରା ବିଶ୍ୱବିଦ୍ୟାଳୟର ଭିଜିଟର ଭାବରେ କରାଯାଇଛି।
ଓଡିଶା ରାଜ୍ୟର ପୁରୀ ଜିଲ୍ଲାର ରୁଷିପଡ଼ା ଗାଁର ନିବାସୀ ପ୍ରଫେସର ସ୍ୱାଇଁ ଶିକ୍ଷା ଖେତ୍ରରେ ୪୩ ବର୍ଷର ଅନୁଭବ ଥିବା ଏକ ପ୍ରତିଷ୍ଠିତ ବିଦ୍ୱାନ। ସେ ବନାରସ ହିନ୍ଦୁ ବିଶ୍ୱବିଦ୍ୟାଳୟ (BHU),ବାରାଣସୀର ଶିକ୍ଷା ସଂକାୟରେ ପ୍ରମୁଖ ଓ ଡିନ୍ ଭାବରେ କାର୍ଯ୍ୟରତ ଥିଲେ। BHU କୁ ଭାରତ ସରକାର ଦ୍ୱାରା "ଇନ୍ଷ୍ଟିଟ୍ୟୁଟ୍ ଅଫ୍ ଏମିନେନ୍ସ" ର ମର୍ଯ୍ୟାଦା ମିଳିଛି ଓ ଏହା ୧୯୧୬ ମସିହାରେ ଭାରତ ରତ୍ନ ପଣ୍ଡିତ ମଦନ ମୋହନ ମାଳବୀୟଙ୍କ ଦ୍ୱାରା ପ୍ରତିଷ୍ଠିତ ହୋଇଥିଲା।
ପ୍ରଫେସର ସ୍ୱାଇଁ MA (ସ୍ବର୍ଣ୍ଣ ପଦକ ସହିତ), M.Phil., Ph.D., ଓ D.Litt. (ଶିକ୍ଷାରେ) ଏବଂ ଇଂଲ୍ୟାଣ୍ଡର ଲିଡ୍ସ ବିଶ୍ୱବିଦ୍ୟାଳୟରୁ EPPM ଡିଗ୍ରୀ ଅର୍ଜନ କରିଛନ୍ତି । ସେ UNESCO, IIEP, OECD, ବିଶ୍ୱ ବ୍ୟାଙ୍କ (ପ୍ୟାରିସ୍), ଓ IBE (ଜିନେଭା) ଭଳି ଆନ୍ତର୍ଜାତୀୟ ସଂସ୍ଥାଗୁଡିକ ସହିତ କାମ କରିବାର ଅନୁଭବ ରଖନ୍ତି । ସେ ଲିଡ୍ସ ବିଶ୍ୱବିଦ୍ୟାଳୟର ଏକ ଗବେଷଣା ଛାତ୍ର (Scholar) ଭାବରେ ମଧ୍ୟ ରହିଛନ୍ତି।
BHU ରେ ତାଙ୍କ କାର୍ଯ୍ୟକାଳ ଦ୍ୱାରା ସେ ଶିକ୍ଷା ସଂକାୟରେ ନବୋନ୍ମେଷ, ପ୍ରତିଷ୍ଠାନତ୍ମକ ବିକାଶ ଓ ଛାତ୍ର କଳ୍ୟାଣକୁ ଅଗ୍ରଧାରା ଦେଇଥିଲେ, ଯାହା ଦ୍ୱାରା ବିଶ୍ୱବିଦ୍ୟାଳୟରେ ଧନାତ୍ମକ ପରିବର୍ତ୍ତନ ଦେଖିବାକୁ ମିଳିଥିଲା। ତାଙ୍କ ନେତୃତ୍ୱରେ ୬୭ ରୁ ଅଧିକ ଗବେଷକ ପିଏଚ୍ଡି ଉପାଧି ଅର୍ଜନ କରିଛନ୍ତି । ପ୍ରଫେସର ସ୍ୱାଇଁ ଓଡିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ, କୋରାପୁଟର ଶିକ୍ଷା ପରିଷଦ (Academic Council) ର ସଦସ୍ୟ ଭାବେ କାର୍ଯ୍ୟରତ ଥିଲେ। ପ୍ରଫେସର ସ୍ୱାଇଁ ତାଙ୍କ ଶିକ୍ଷାତ୍ମକ ଅବଦାନ,ନେତୃତ୍ୱ କ୍ଷମତା ଓ ଦୂରଦର୍ଶୀ ଚିନ୍ତାଧାରା ପାଇଁ ସମଗ୍ର ଦେଶରେ ସମ୍ମାନିତ ।
