କଟକ,୨୬/୧୧: ଅସହାୟ ସ୍ଥିତିରେ ଅଜଣା, ଅଚିହ୍ନା ବୃଦ୍ଧ କିମ୍ବା ବୃଦ୍ଧା ରୋଗୀ ଜଣେ ଯଦି ଚିକିତ୍ସା ପାଇଁ ଏସ୍ସିବି ମେଡିକାଲ୍ରେ ଆସି ପହଞ୍ଚୁଛନ୍ତି, ତାଙ୍କ ପାଇଁ ଆଉ ଫେରିବାର ସୁଯୋଗ ଜୁଟୁନାହିଁ । ସୁସ୍ଥ ହେଲା ପରେ ମଧ୍ୟ ୱାର୍ଡରୁ ଡିସଚାର୍ଜ ହେବାର ସୁବିଧା ବା ସମ୍ଭାବନା ଦିଶୁନାହିଁ । ଯେଉଁଥିପାଇଁ ନିରାଶ୍ରୟ(ଡେଷ୍ଟିଚ୍ୟୁଟ୍) ୱାର୍ଡରେ ଏବେ ପ୍ରାୟ ୨୦୦ ଅସହାୟ ବୃଦ୍ଧ-ବୃଦ୍ଧା ଦୀର୍ଘ ମାସ ମାସ ଧରି ପଡ଼ି ରହିଛନ୍ତି । ନିଜ ଠିକଣା ହଜାଇଥିବା ଏହି ଅସହାୟଙ୍କ ପାଇଁ ଏସ୍ସିବି ମେଡିକାଲ ନିରାଶ୍ରୟ ୱାର୍ଡ ଏବେ ଜରାଶ୍ରମ ବା ବୃଦ୍ଧାଶ୍ରମ ପାଲଟିଛି ।
ସେମାନଙ୍କ ଶରୀରରେ କିଛି ରୋଗ ନାହିଁ । ତେଣୁ ଚିକିତ୍ସା ଦରକାର ପଡୁନାହିଁ । ତେବେ ଚିକିତ୍ସା ଆବଶ୍ୟକ ନଥିଲେ ମଧ୍ୟ ମାସ ମାସ ଧରି ଅନେକ ଅସହାୟ ଡାକ୍ତରଖାନା ଖଟିଆରେ ପଡ଼ି ରହିଛନ୍ତି । ପାଞ୍ଚ କି ଦଶ ଜଣ ନୁହଁ, ପ୍ରାୟ ଦୁଇ ଶହରୁ ଅଧିକ ଅସହାୟ ବୃଦ୍ଧ/ ବୃଦ୍ଧା ରୋଗ ନଥାଇ ବି ରୋଗୀଙ୍କ ମେଳରେ ରହୁଛନ୍ତି । ସେମାନେ ନିଜ ନାଁ, ଗାଁ ସଂପର୍କରେ କିଛି କହି ପାରୁନାହାନ୍ତି । ଯାହା ପଚାରିଲେ ବାଉଳି ଚାଉଳି ହୋଇ ମନଇଚ୍ଛା ପାଟିକୁ ଯାହା ଆସିଲା କହୁଛନ୍ତି । ପରିବାରଠାରୁ ଦୀର୍ଘ ଦିନ ହେଲା ଦୂରେଇ ରହିଥିବା ଏହି ଅସହାୟମାନଙ୍କୁ କୋଳେଇ ନେବା ପାଇଁ କେହି ଆଗେଇ ଆସୁନାହାନ୍ତି । ଏହି ବୃଦ୍ଧ/ବୃଦ୍ଧାଙ୍କ ଭବିଷ୍ୟତକୁ ନେଇ ଆଶଙ୍କା ଦେଖା ଦେଲାଣି ।
ଏସ୍ସିବି ମେଡିକାଲ୍ ମେଡିସିନ୍, ସର୍ଜରୀ, ଅର୍ଥୋପେଡିକ୍ ଆଦି ବିଭାଗରେ ଅସହାୟ ରୋଗୀମାନଙ୍କ ଚିକିତ୍ସା ଓ ଉପଯୁକ୍ତ ଦେଖାଶୁଣା ପାଇଁ ସ୍ୱତନ୍ତ୍ର ଭାବେ ନିରାଶ୍ରୟ (ଡେଷ୍ଟିଚ୍ୟୁଟ୍) ୱାର୍ଡ ଖୋଲାଯାଇଛି । ଉକ୍ତ ୱାର୍ଡରେ ନିରାଶ୍ରୟ ରୋଗୀଙ୍କ ଚିକିତ୍ସା ପାଇଁ ଉଦ୍ଦିଷ୍ଟ ଥିଲେ ହେଁ ତାହା ରୋଗୀଙ୍କ ଚିକିତ୍ସା ବଦଳରେ ଥଇଥାନ କେନ୍ଦ୍ର ଭାବେ ବ୍ୟବହାର ହେଉଛି । ମେଡିସିନ୍ ବିଭାଗର ନିରାଶ୍ରୟ ରୋଗୀଙ୍କ ପାଇଁ ଖୋଲାଯାଇଥିବା ୱାର୍ଡରେ ସ୍ୱତନ୍ତ୍ର ଭାବେ ୩୦ଟି ବେଡ୍ ରହିଛି । ମାତ୍ର ଏଠାରେ ଶହେରୁ ଅଧିକ ଅସହାୟ ରହୁଥିବା ଦେଖିବାକୁ ମିଳିଛି ।
ସେହିପରି ସର୍ଜରୀ ବିଭାଗ ୱାର୍ଡରେ ୨୧ଟି ବେଡ୍ ରହିଥିବା ବେଳେ ପାଖାପାଖି ୪୦ ଜଣ ଅସହାୟ ବୃଦ୍ଧ/ବୃଦ୍ଧା ରହୁଛନ୍ତି । ଅର୍ଥୋପେଡିକ୍ ବିଭାଗ ନିରାଶ୍ରୟଙ୍କ ଲାଗି ୧୫ ଟି ବେଡ୍ ଉପଲବ୍ଧ ରହିଥିଲେ ହେଁ ଏଠାରେ ୪୦ରୁ ଅଧିକ ଲୋକ ରହିଛନ୍ତି । ରୋଗୀଙ୍କ ଚିକିତ୍ସା ଲାଗି ଉକ୍ତ ବେଡ୍ ଗୁଡ଼ିକରେ ଅସହାୟ ବୃଦ୍ଧ/ବୃଦ୍ଧା ଶୋଇଥିବା ବେଳେ ଆଉ କେତେକ ଚଟାଣରେ ଗଡୁଛନ୍ତି । ଏପରି ସ୍ଥିତିରେ ଯଦି କେହି ଅସହାୟ ରୋଗୀ ଚିକିତ୍ସା ପାଇଁ ନିରାଶ୍ରୟ ୱାର୍ଡରେ ଭର୍ତ୍ତି ହେଉଛନ୍ତି ତାଙ୍କୁ ବେଡ୍ ମିଳିପାରୁନାହିଁ ।
ଫଳରେ ସମ୍ପୃକ୍ତ ରୋଗୀ ଚଟାଣରେ ଚିକିତ୍ସିତ ହେଉଛନ୍ତି । ଚିକିତ୍ସା ପାଇଁ ଆସୁଥିବା ଅସହାୟ ରୋଗୀମାନେ ଥରଟିଏ ୱାର୍ଡରେ ଭର୍ତ୍ତି ହୋଇଗଲା ପରେ ଆଉ ସେମାନଙ୍କୁ ଅନ୍ୟତ୍ର ପଠାଯିବାର ବନ୍ଦୋବସ୍ତ ନାହିଁ । ଫଳରେ ନିରାଶ୍ରୟ ୱାର୍ଡରେ ଅନାବଶ୍ୟକ ଭାବେ ଅନେକ ଅସହାୟଙ୍କର ଜୀବନ ଅନ୍ୟ ରୋଗୀଙ୍କ ମେଳରେ ବିତୁଛି । ସୁସ୍ଥ ହେବା ପରେ ସମ୍ପୃକ୍ତ ଅସହାୟମାନଙ୍କୁ ଡାକ୍ତରଖାନାରୁ ନେଇ ଅନ୍ୟତ୍ର କୌଣସି ବୃଦ୍ଧାଶ୍ରମ କିମ୍ବା ଆଶ୍ରୟସ୍ଥଳରେ ଥଇଥାନ କରିବା ଦାୟିତ୍ୱ ସିଏମ୍ସି ଏବଂ ଜିଲ୍ଲା ପ୍ରଶାସନର ହୋଇଥିଲେ ହେଁ ଏଥିପ୍ରତି ପ୍ରଶାସନିକ ସ୍ତରରେ ଉଦ୍ୟମ ହେଉନାହିଁ ।
ଅନ୍ୟପକ୍ଷରେ ବିଭିନ୍ନ ନିରାଶ୍ରୟ ୱାର୍ଡରେ ଥିବା ଅସହାୟଙ୍କୁ ସ୍ଥାନାନ୍ତର ଲାଗି ପ୍ରାୟ ଦୀର୍ଘ ଦିନ ହେଲା ଏସ୍ସିବି ପକ୍ଷରୁ ଜିଲ୍ଲା ପ୍ରଶାସନ ଓ ସିଏମ୍ସିକୁ ଚିଠି ଲେଖା ଚାଲିଥିଲେ ହେଁ ଫଳ ଶୂନ । ଗତ ସପ୍ତାହରେ ଏସ୍ସିବିରେ ଅନୁଷ୍ଠିତ ସ୍ୱାସ୍ଥ୍ୟ ବିକାଶ ସମିତି ବୈଠକରେ ଏନେଇ କ୍ଷୋଭ ପ୍ରକାଶ ପାଇଥିଲା । କଟକ ସାଂସଦ ଭର୍ତ୍ତୃହରି ମହତାବ ଆଲୋଚନାରେ ଅଂଶଗ୍ରହଣ କରି ବୃଦ୍ଧାଶ୍ରମ ନିର୍ମାଣ ଉପରେ ଗୁରୁତ୍ୱ ଦେବା ସହ ଅସହାୟଙ୍କୁ ସ୍ଥାନାନ୍ତର କରାଇବା ଦିଗରେ ପଦକ୍ଷେପ ନେବାକୁ ପରାମର୍ଶ ଦେଇଥିଲେ ।
