ଭୁବନେଶ୍ୱର,୧୯/୦୬: ରାଜ୍ୟରେ ଝାଡ଼ାବାନ୍ତି, ହଇଜା ମାଡ଼ି ଚାଲିଛି । ଖରା ଛୁଟି ଏବେ ସରିବ । ସ୍କୁଲ, କଲେଜ, ବିଶ୍ୱବିଦ୍ୟାଳୟ ଖୋଲିବ। ଏଭଳି ପରିସ୍ଥିତିରେ ଛାତ୍ରଛାତ୍ରୀ, ଅଭିଭାବକଙ୍କୁ ଚିନ୍ତା ଲାଗିଲାଣି । ଶିକ୍ଷାନୁଷ୍ଠାନରେ ଥିବା ପାଣି ଟାଙ୍କିର ନିୟମିତ ସଫେଇ ହେଉନି । ଏପରିକି ଅଧିକାଂଶ ସ୍କୁଲରେ ବିଶୁଦ୍ଧ ପାନୀୟ ଜଳର ବ୍ୟବସ୍ଥା ନାହିଁ । ଯଦି ବା କେଉଁଠି ଅଛି ସେଠି ଟାଙ୍କି ଭାଙ୍ଗିରୁଜି ଗଲାଣି । ଏଭଳି ସ୍ଥିତିରେ କିପରି ପିଲାଙ୍କୁ ସ୍କୁଲ ଛାଡ଼ିବେ ତାକୁ ନେଇ ଚିନ୍ତାରେ ଅଛନ୍ତି ଅଭିଭାବକ ।
କେବଳ ଏତିକି ନୁହେଁ, ମଧ୍ୟାହ୍ନଭୋଜନ ପ୍ରସ୍ତୁତି ପାଇଁ ସିନା ବିଦ୍ୟାଳୟ ବିଭାଗ ମାର୍ଗଦର୍ଶିକା ଜାରି କଲା । ଏହାକୁ ଅଭିଭାବକ, ସ୍କୁଲ ପରିଚାଳନା କମିଟି, ଶିକ୍ଷକ ଶିକ୍ଷୟିତ୍ରୀ ଯାଞ୍ଚ କରିବେ । ହେଲେ ଯେଉଁଠିକୁ ଖାଦ୍ୟ ବାହାରୁ ଆସୁଛି ତାହା କେତେ ପରିଷ୍କାର ଆଉ ସୁରକ୍ଷିତ ତାକୁ ନେଇ ଅଭିଭାବକ ମାନେ ପ୍ରଶ୍ନ କରୁଛନ୍ତି ।
ଶୁକ୍ରବାର ଖୋଲିବ(କେବଳ କଟକ ଓ ଭୁବନେଶ୍ୱର ବ୍ୟତୀତ) ସରକାରୀ, ସରକାରୀ ଅନୁଦାନପ୍ରାପ୍ତ ସ୍କୁଲ । ଏହା ପୂର୍ବରୁ ମଧ୍ୟାହ୍ନଭୋଜନ ପାଇଁ ରହିଥିବା ସାମଗ୍ରୀର ଯାଞ୍ଚ କରିବାକୁ କୁହାଯାଇଛି । ମଧ୍ୟାହ୍ନଭୋଜନ ସ୍ଥାନକୁ ପରିଷ୍କାର କରିବାକୁ ପିଏମ୍ ପୋଷଣ ୟୁନିଟ୍ ପକ୍ଷରୁ ନିର୍ଦ୍ଦେଶ ଦିଆଯାଇଛି । ସ୍କୁଲରେ ଥିବା ପାଣିକୁ ଯାଞ୍ଚ କରିବା ଓ ବିଶୁଦ୍ଧ ପାଣି ଯୋଗାଇ ଦେବାକୁ ଦାବି ହୋଇଛି । ସେହିପରି କଲେଜ, ବିଶ୍ୱବିଦ୍ୟାଳୟରେ ଥିବା ହଷ୍ଟେଲର ଖାଦ୍ୟକୁ କିଭଳି ପରିସ୍ଥିତିରେ ପ୍ରସ୍ତୁତ ହେଉଛି ତାକୁ ନିୟମିତ ଯାଞ୍ଚ କରାଯାଉନି । ଅନେକ ହଷ୍ଟେଲରେ ଖାଦ୍ୟ ବାହାରୁ ଆସୁଛି । କ୍ୟାମ୍ପସ ବାହାରେ ଗୁପ୍ଚୁପ୍, ଦହିବରା ଭଳି ଫାଷ୍ଟଫୁଡ୍ର ଆସର ଜମୁଛି । ବର୍ଷ ବର୍ଷ ଧରି କ୍ୟାମ୍ପସରେ ଥିବା ପାଣି ଟାଙ୍କିକୁ ସଫା କରାଯାଉନି । ରକ୍ଷଣାବେକ୍ଷଣ ନିୟମିତ ଭାବେ କରାଯାଉନି ।
ସରକାରୀ ତଥ୍ୟ ଅନୁଯାୟୀ, ଯାଜପୁର, କେନ୍ଦୁଝର, ଢେଙ୍କାନାଳ, ଭଦ୍ରକ ଓ କଟକରେ ଝାଡ଼ାବାନ୍ତି ବ୍ୟାପିଛି । ମାତ୍ର ବେସରକାରୀ ତଥ୍ୟରେ ୯ ଜିଲ୍ଲା ରହିଛି । ଏହି ଝାଡ଼ାବାନ୍ତି ଓ ହଇଜାର ମୁଖ୍ୟ କାରଣ ଦୂଷିତ ପାଣି ଓ ନିମ୍ନମାନର ଖାଦ୍ୟ ବୋଲି ଡାକ୍ତର ମାନେ କହୁଛନ୍ତି । ଏବେ ଏହାର ମୁକାବିଲା କରିବା ଶିକ୍ଷା ବିଭାଗ ପାଇଁ ବଡ଼ ଆହ୍ୱାନ ପାଲଟିଛି । ପିଏମ ପୋଷଣର ରାଜ୍ୟ ନୋଡାଲ ଅଫିସର ଭବାନୀ ପ୍ରସାଦ ମିଶ୍ରଙ୍କ କହିବା ଅନୁସାରେ ସ୍ୱଚ୍ଛତା ସହ ମଧ୍ୟାହ୍ନ ଭୋଜନ ପ୍ରସ୍ତୁତ କରିବାକୁ ସ୍କୁଲ ଗୁଡ଼ିକୁ ନିର୍ଦ୍ଦେଶ ଦିଆଯାଇଛି । ଏସଏମସି, ପ୍ରଧାନଶିକ୍ଷକ, ଡିଇଓ, ବିଇଓ ଓ ସିଆରସିସି ସ୍ୱଚ୍ଛ ପରିବେଶରେ ଖାଦ୍ୟ ଦିଆଯାଉଛିକି ନାହିଁ ତାହା ଯାଞ୍ଚ କରିବେ।
